រាជធានីភ្នំពេញ ៖ បុរសម្នាក់រួមនឹងស្រីស្រស់សោភា៣នាក់ទៀតជាជនជាតិចិនបើករថយន្តស៊េរីទំនើប១គ្រឿងបើកក្នុងល្បឿនលឿនពេកបួងចង្កូតបត់អត់ទាន់ក៏ជ្រុលបុកបង្គោលភ្លើងបាក់អស់២បង្គោលធ្វើឲ្យខ្ទេចរថយន្តអស់មួយកំណាត់ខាងមុខរងរបួសស្ត្រី៣នាក់ ហេតុការណ៍នេះបានកើតឡើងកាលពីវេលាម៉ោង៣និង៣០នាទីទាបភ្លឺ ថ្ងៃទី១៨ ខែមេសា ឆ្នាំ២០១៨ តាមបណ្តោយផ្លូវស្ពានហង្សកោះពេជ្រ នៅចំណុចក្បែរនឹងរដ្ឋសភា ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញបុរសម្នាក់រួមនឹងស្ត្រី៣នាក់ទៀតជាជនជាតិចិនជិះរថយន្តសេរីទំនើបមួយគ្រឿង ពណ៌ខ្មៅ ពាក់ផ្លាកលេខ ភ្នំពេញ ២AP-៥១០៨ បើកបរតាមបណ្តោយផ្លូវស្ពានហង្ស ទិសដៅពីកើតទៅលិចក្នុងល្បឿនយ៉ាងលឿនដូចហោះ ខណៈបើកមកដល់ចំណុចកើតហេតុខាងលើក៏ស្រាប់តែបួងចង្កូតអត់ទាន់ក៏ជ្រុលទៅបុកបង្គោលភ្លើងបាក់អស់២ដើមដួលរាបរាយបាយនៅមុខលក់ផ្កាយីហោ ស៊ីក្រិត ហ្គាឌេន និងរងរបួសស្ត្រី៣នាក់ រីឯរថយន្តបង្កវិញខូចខាតខ្ទេចអស់មួយកំណាត់ខាងមុខផ្ទុះពោងទាំងសងខាង ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកយកទៅព្យាបាលចំនួន២នាក់ និងម្នាក់ទៀតជិះរថយន្តខ្លួនឯងទៅព្យាបាល ។ ចំណែករថយន្តបង្កត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ