ខេត្តកំពត ៖ ពិធីបុណ្យចូលឆ្នាំប្រពៃណីជាតិខ្មែររយៈពេលបីថ្ងៃបានបញ្ចប់ទៅដោយភាពសប្បាយរីករាយក្រៃលែង ទាំងកំពតសង្ក្រាន្ត និងតាមគោលដៅទេសចរណ៍នានាក្នុងខេត្ត រក្សាបាននូវសន្តិសុខ និងសុវត្ថិភាពល្អ។ ហើយរយៈពេលបីថ្ងៃ (១៤-១៥-១៦) ភ្ញៀវជាតិ និងអន្តរជាតិកើនឡើង ៤៥.២១ភាគរយ ប្រើប្រៀបធៀប រយៈពេលដូចគ្នាកាលពីឆ្នាំ២០១៧។ លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា ពិធីបុណ្យចូលឆ្នាំថ្មី២០១៨នេះ មានភាពល្អប្រសើរជាងឆ្នាំមុន ដោយសារឆ្នាំនេះ រដ្ឋបាលខេត្តបានរៀបចំកំពតសង្ក្រាន្ត ដែលបានបង្កើតកម្មវិធីលេងល្បែងកម្សាន្តតាមបែបប្រពៃណីខ្មែរជាច្រើន ដឹកនាំលេងដោយ មន្ត្រីមន្ទីរវប្បធម៌ មន្ត្រីសាលាខេត្ត និងក្រុមយុវជន។ ម្យ៉ាងទៀតក្រុងកំពតត្រូវបានតុបតែងលម្អ រក្សាអនាម័យ បរិស្ថានស្អាត និងបំពាក់ដោយបង្គោលអំពូលភ្លើង LED តាមដងផ្លូវ ជុំវិញផ្សារ សួនច្បារសាធារណៈ និងតាមដងព្រែក។ កត្តាទាំងនេះបានធ្វើឲ្យភ្ញៀវទេសចរណ៍កើនឡើងដល់ ៤៥.២១ភាគរយ បើធៀបនឹងឆ្នាំមុន(២០១៧)។
លោកបានឲ្យដឹងទៀតថា ភ្ញៀវទេសចរណ៍សរុបមានចំនួន ១៣៤.៩៣០នាក់ ក្នុងនោះ ភ្ញៀវទេសចរណ៍ក្នុងស្រុកចំនួន១៣១.៨៥១នាក់ កើនឡើង៤៤.៦២ភាគរយ ភ្ញៀវទេសចរណ៍អន្តរជាតិចំនួន ៣.០៧៩នាក់ កើនឡើង៧៦.៦២ភាគរយ។ លោកក៏បានបញ្ជាក់អំពីមធ្យោបាយធ្វើដំណើរ របស់ភ្ញៀវទេសចរណ៍ដែរថា រថយន្តគ្រប់ប្រភេទចំនួន ១៥.២២៤ គ្រឿង និងម៉ូតូគ្រប់ប្រភេទចំនួន ១៣.៩៤៣ គ្រឿង។ ទោះយ៉ាងណាក៏ដោយទន្ទឹមនឹងវត្តមានភ្ញៀវទេសចរណ៍កើនឡើងច្រើនបញ្ហានៃការចោលសំរាមក៏នៅតែជាបញ្ហាប្រឈមដែលត្រូវបន្តជំរុញធ្វើការអប់រំឲ្យបានខ្លាំងក្លា និងទូលំទូលាយឲ្យដល់ប្រជាជនមហាជនបន្តទៀត។
គួរបញ្ជាក់ថា កំពតសង្ក្រាន្តលើកទីមួយនេះ អាចប្រព្រឹត្តទៅបានដោយរលូន អាស្រ័យដោយមានការយកចិត្តទុកដាក់ ឧបត្ថមគាំទ្រ ទាំងស្មារតី និងថវិកាផ្ទាល់ខ្លួន របស់ឯកឧត្តម ជាវ តាយ អភិបាលនៃគណអភិបាលខេត្ត និងគ្រួសារ។ ហើយរយៈពេលបីថ្ងៃនេះ លោកបានចូលរួមគ្រប់កម្មវិធីតាមបែបសាសនា និងវិធីកម្សាន្តនានា និងកីឡាបាល់ទាត់ពានរង្វាន់ឯកឧត្តម នៃ ប៉េណា អនុប្រធានទី១ព្រឹទ្ធសភានៃព្រះរាជាណាចក្រកម្ពុជា និងបានធ្វើដំណើរដោយថ្មើជើង ទៅជួបសំណេះសំណាលប្រជាពលរដ្ឋ និងភ្ញៀវទេសចរណ៍ដែលមកកម្សាន្តនៅខេត្តកំពតយ៉ាងសប្បាយរីករាយ៕
ចែករំលែកព័តមាននេះ