ខេត្តកំពង់ចាម ៖ ដើម្បីបង្កើតនូវភាពសប្បាយរីករាយអបអរសាទរសង្ក្រាន្តឆ្នាំថ្មី ចំនួន០៣ថ្ងៃ គឺចាប់ពីថ្ងៃ
ទី១៤ដល់ទី១៦ មេសា ២០១៨ ក្រោមការដឹកនាំពីលោក គួច ចំរើន អភិបាលនៃគណៈអភិបាលខេត្ត បានពង្រីកដល់ទៅ០៥កន្លែង ក្នុងនោះមានដូចជា៖ ១-ឆ្នេរខ្សាច់កោះប៉ែន ២-វត្តនគរបាជ័យក្រៅ ៣-វត្តភ្នំប្រុសភ្នំស្រី ៤-រមណីយដ្ឋានទឹកឆា និង៥-រមណីយដ្ឋានភ្នំហាន់ជ័យ។ ជាមួយនោះការលេងល្បែង របាំប្រជាប្រិយផ្សេងៗ មានបោះអង្គុយ ចោលឈូង ទាញព្រ័ត្រ គោះត្រដោកបិទមុខ។ល។ ដើម្បីបញ្ជ្រាបដល់ស្រទាប់យុវជនជំនាន់ក្រោយបានចងចាំផងដែរ។ លោក ជួន សុផាត ប្រធានមន្ទីរវប្បធម៌ និងវិចិត្រសិល្បៈខេត្ត មានប្រសាសន៍ឲ្យដឹងថា ក្នុងនាមរូបលោកជាគណៈកម្មការ រៀបចំបង្កើតឲ្យមានលេងល្បែងប្រជាប្រិយ នៅតាមទីតាំងទាំង០៥កន្លែងខាងលើ ដោយមានកិច្ចសហការជាមួយនឹងមន្ទីរទេសចរណ៍ខេត្ត មន្ទីរធម្មការ និងសាសនាខេត្ត ព្រមទាំងសមត្ថកិច្ចផងនោះ បង្កើតឲ្យមានកម្មវិធីលេងល្បែងប្រជាប្រិយ ដោយមានក្រុមការងារមន្ត្រីវប្បធម៌ខេត្ត បានចុះដោយផ្ទាល់តែម្តង។
លោក ជួន សុផាត ប្រធានមន្ទីរវប្បធម៌ និងវិចិត្រសិល្បៈខេត្ត មានប្រសាសន៍រំឮកថា កាលពីឱកាស
បុណ្យចូលឆ្នាំប្រពៃណីជាតិខ្មែរឆ្នាំ២០១៧កន្លងទៅ បានរៀបចំសង្ក្រាន្តធ្វើឡើងតែមួយកន្លែងនៅត្រង់
ចំណុចមុខសាលាខេត្ត។ តែមកដល់ឆ្នាំ២០១៨នេះ ឯកឧត្តមអភិបាលខេត្ត បានជំរុញ និងឲ្យរៀបចំសង្ក្រា
ន្តដល់ទៅចំនួន០៥កន្លែង ដែលមានទីតាំងដូចខាងលើ ដោយក្នុងនោះលោកអភិបាលខេត្ត និងលោក
ជំទាវ ព្រមទាំងសមាជិកក្រុមគ្រួសារ អមដោយប្រធានមន្ទីរនានាជុំវិញខេត្ត បានដឹកនាំអញ្ជើញចូលរួម
លេងរបាំប្រជាប្រិយនៅរមណីយដ្ឋានទឹកឆា ស្ថិតនៅក្នុងស្រុកព្រៃឈរ។ បន្ទាប់មកដឹកនាំលេងនៅវត្ត
នគរបាជ័យក្រៅ ស្រុកកំពង់សៀម រមណីយដ្ឋានឆ្នេរខ្សាច់កោះប៉ែន និងនៅថ្ងៃទី១៦ មេសា លោកអភិបាលខេត្ត និងលោកជំទាវផ្ទាល់បានចូលរួមដឹកនាំលេង របាំប្រជាប្រិយ នៅរមណីយដ្ឋានភ្នំហាន់ជ័យ មានទាញព្រ័ត្រ ចោលឈូង លាក់កន្សែង ឡើងសសរខ្លាញ់ និងចុងក្រោយមានពិធីស្រង់ព្រះ។
ហើយនៅតាមលំនៅឋានរបស់ប្រជាពលរដ្ឋក៏បានរៀបចំពិធីស្រង់ព្រះ នេះដែរ ដោយកូនៗបាននាំគ្នាងូតទឹកឲ្យឪពុកម្តាយ ដែលជាអ្នកមានគុណផ្តល់កំណើតឲ្យយើង គ្រប់ៗរូបមានជីវិតរស់រានមកដល់សព្វថ្ងៃនេះ មានជីវភាពធូរធាផងដែរ។ ដោយឡែកនៅរសៀលថ្ងៃទី១៦ មេសា លោកអភិបាលខេត្ត និងលោកជំទាវ បានចូលរួមស្រង់ព្រះនៅលើភ្នំហាន់ជ័យ ដើម្បីបួងសួងសុំសេចក្តីសុខពីទេវតាឆ្នាំថ្មីសម្រាប់ពលរដ្ឋនៅក្នុងខេត្តកំពង់ចាមទាំងមូល សូមឲ្យទទួលបាននូវសេចក្តីសុខសាន្តតរៀងរហូតទៅ៕
ចែករំលែកព័តមាននេះ