ខេត្តតាកែវ ៖ ខណៈពេលរដូវចូលឆ្នាំថ្មីទើបតែបញ្ចប់ហើយ មានវត្តខ្លះក៏មិនទាន់បញ្ចប់ផងដែរ តែអ្វីដែលធ្វើឲ្យមហាជនដែលធ្វើដំណើរតាមតំបន់ទេសចរណ៍នានាជាច្រើននោះ គេក៏សង្កេតឃើញវត្តមួយដែលបានកសាងឡើងនៅលើភ្នំមានឈ្មោះថា «វត្តពុទ្ធគីរីកម្ពុជា» ស្ថិតនៅលើទឹកដីភូមិត្រពាំងស្ការ ឃុំត្រពាំងក្រញូង ស្រុកត្រាំកក់ ខេត្តតាកែវ ។
អ្វីដែលធ្វើឲ្យភ្ញៀវទេសចរណ៍ជាតិ និងអន្តរជាតិចាប់អារម្មណ៍ខ្លាំងនោះ គឺវត្តមួយនេះបានកសាងព្រះពុទ្ធបដិមាយ៉ាងច្រើនអង្គដែលធ្វើឲ្យអ្នកទស្សនាប្លែកភ្នែក ដោយឃើញមានព្រះពុទ្ធបដិមាដែលប្រតិស្ឋានឡើងពីលើភ្នំជាជួរចុះមកក្រោមមើលទៅគួរជាទីជ្រះថ្លាដល់ពុទ្ធសាសនិកដែលជាអ្នកជឿជាក់ក្នុងព្រះពុទ្ធសាសនា ចំពោះព្រះពុទ្ធបដិមានេះ ទើបតែកសាងបានប្រមាណ២០.០០០អង្គប៉ុណ្ណោះ នៅក្នុងគំរោងកសាងសរុបចំនួន ៨៤.០០០អង្គឯណោះ ។
ក្នុងន័យកសាងព្រះពុទ្ធបដិមាចំនួន៨៤.០០០អង្គនេះ គឺប្រតិស្ឋានឡើងដើម្បីឧទ្ទិសចំពោះព្រះធម៌ដែលព្រះដ៏មានព្រះភាគជាម្ចាស់បានទ្រង់ត្រាស់សម្តែងទុកក្នុងគម្ពីរព្រះត្រៃបិដកចំនួន៨៤.០០០ព្រះធម្មខន្ធផងដែរ ដែលមានព្រះត្រៃបិដកសរុប១១០ក្បាលបែងចែកជាបីផ្សេងគ្នា មានព្រះវិន័យ ព្រះសូត្រ និងព្រះអភិធម្ម សម្រាប់បូជាតំណាងឲ្យព្រះពុទ្ធរូបមួយព្រះអង្គសម្រាប់តំណាងឲ្យមួយព្រះធម្មខន្ធផងដែរ ។ ប៉ុន្តែការប្រឹងប្រែងប្រមូលថវិកាកសាងនូវសមិទ្ធផលបានមកនេះ ក៏មានការរិះគន់ខ្លះដែរពីសំណាក់មហាជន ដោយមហាជនមួយចំនួនលើកឡើងថា ព្រោះតែការជឿ ការជ្រះថ្លាពេក ក៏ធ្វើឲ្យអ្នកផ្តើមកសាងភ្លេចគិតពីការបំផ្លាញធម្មជាតិនៅលើភ្នំទាំងស្រុង ដើមឈើទាំងធំទាំងតូចត្រូវបំផ្លាញខ្ទេចខ្ទីរ ដែលផ្ទុយពីការសម្តែងរបស់ព្រះដ៏មានព្រះភាគជាម្ចាស់ ដែលណែនាំមនុស្សឲ្យចេះស្រលាញ់ធម្មជាតិ ហើយថែរក្សាធម្មជាតិ រហូតដល់ព្រះអង្គទ្រង់បញ្ញត្តិសិក្ខាបទ ហាមមិនឲ្យភិក្ខុទាំងឡាយកាប់ដើមឈើទៀតផង ។ ក្នុងការដែលព្រះអង្គសម្តែងចំពោះភិក្ខុនេះ គឺជាធំលើបរិស័ទទាំងអស់ ទាំងភិក្ខុ ទាំងសាមណេរ ទាំងឧបាសក និងឧបាសិកា ដោយយកភិក្ខុជាធំ ។
នាឱកាសបុណ្យចូលឆ្នាំថ្មីប្រពែណីជាតិរយៈពេល៣ថ្ងែ នេះ វត្តខាងលើកំពុងតែទាញភ្លៀវទេសចរណ៍ជាតិ អន្តរជាតិចូលមកទស្សនាយ៉ាងច្រើន ហើយក៏មានការបូជានូវថវិកាបជាច្រើនផងដែរ ហើយសម្រាប់នៅប្រទេសកម្ពុជាវិញ គឺមានតែវត្តមួយនេះទេ ដែលបានប្រតិស្ឋាននូវព្រះពុទ្ធបដិមាឱ្យបានចំនួន៨៤.០០០អង្គដោយធ្វើបណ្តើៗរហូតគ្រប់ចំនួន ហើយបើសិនជាបងប្អូនមានចំណាប់អារម្មណ៍នោះអាចជៀវរូបពុទ្ធបដិមាយកមកដាក់នៅវត្តនេះ ព្រោះជាវត្តមួយមានរូបបដិមាក៏ច្រើនជាង ដោយមិនមានទីអារាមណាមួយនៅកម្ពុជាដូចវត្តនេះទេ ៕
ចែករំលែកព័តមាននេះ