ខេត្តកំពង់ស្ពឺ ៖ អ្នកចូលរួមអបអរពិធីចូលឆ្នាំនៅខេត្តកំពង់ស្ពឺបានប្រាប់ថា បើយើងធ្វើដំណើរតាមផ្លូវជាតិលេខ៤ពីភ្នំពេញមកចំណាយពេលមិនដល់២ម៉ោងនោះទេ យើងនឹងមកដល់មកចន្លោះបង្គោលគីឡូម៉ែត្រ៤៥និង៤៦ ងាកទៅខាងឆ្វេងដៃនឹងមានស្លាកសម្គាល់ថា «សាលាខេត្តកំពង់ស្ពឺ» ហើយបន្តដំណើរចូលតាមផ្លូវកៅស៊ូឆ្កងស្ពានថ្មបន្តិចនឹងដល់កន្លែងដែលខាងរដ្ឋបាលខេត្តប្រារព្ធពិធីសង្ក្រានកំពង់ស្ពឺនៅជិតសួនច្បារសាលខេត្ត ដែលបានរៀបចំយ៉ាងល្អប្រណីតទទួលបងប្អូនប្រជាពលរដ្ឋ ក៏ដូចជាអ្នកភ្នំពេញដែលមានបំណងមកចូលរួមពិធីសង្ក្រាននៅកំពង់ស្ពឺនេះដែរ។
អំឡុងពេលអបអរសាទរ ពិធីបុណ្យចូលឆ្នាំថ្មីប្រពៃណីជាតិបានប្រារព្ធធ្វើឡើងរយៈពេល៣ថ្ងៃ គឺចាប់ពីថ្ងៃទី១៤-១៦ មេសា ឆ្នាំ២០១៨ នៅសួនច្បារសម្ដេចសង្ឃរាជ ជួន ណាត ។ អ្វីដែលជាការកត់សម្គាល់នៅថៃ្ងចុងក្រោយ ដែលប្រជាពលរដ្ឋយើងយល់ថាជា ថ្ងៃឆ្លង ឬឡើងស័ក្តិនោះ ក៏មានវត្ដមានពីសំណាក់ឯកឧត្ដម ក្រុមប្រឹក្សាខេត្ត អភិបាលខេត្ដ អញ្ជើញចូលរួមពិធីតាមទំនៀមនោះ គឺពិធីស្រង់ព្រះផងដែរ។ ក្នុងនោះផងដែរ មានកិច្ចការពារពីគ្រប់កងកម្លាំងចំណុះ ពិសេសកងកម្លាំងនគរបាលខេត្ដកំពង់ស្ពឺការពាររក្សាសន្តិសុខ ក្នុងឱកាសបុណ្យចូលឆ្នាំថ្មីនេះ។
លោកស្រី ហុង ពៅពិសី មកពីក្រុងភ្នំពេញបានប្រាប់ថា លោកស្រី និងក្រុមគ្រួសារមិនបានទៅកំសាន្តនៅឯណា ក្រៅពីមកចូលរួមពិធីសង្ក្រាន្តនៅកំពង់ស្ពឺនេះទេ រយៈពេល៣ថ្ងៃឃើញថា ទាំងសន្តិសុខ ក៏ដូចជាការរៀបចំសណ្តាប់ធ្នាប់ គឺមានរបៀបរៀបរយល្អ។ ជាងនេះទៀតរយៈពេល៣ថ្ងៃនៃពិធីបុណ្យមានការរៀបចំ ល្បែងប្រជាប្រិយខ្មែរផ្សេងៗដូចជា ទាញព្រ័ត្រ បោះអង្គុញ វាយក្អម ចោលឈូង លាក់កន្សែង ចាប់កូនខ្លែង ដណ្ដើមស្លឹកឈើ ខាំប៉ិគក់ ពាំពងមាន់ អូសធៀងស្លា និងមានការប្រគុំតន្ត្រីសម័យ បុរាណផងដែរ។
លោកស្រីបន្តថា សុំឱ្យឆ្នាំក្រោយៗទៀតខាងសាលាខេត្តរៀបចំពិធីនេះដូចឆ្នាំនេះអ៊ីចឹង ព្រោះថា ខេត្តមួយនេះពីមុនៗមកមិនដែលមានពិធីសប្បាយបែបនេះទេ ម្យ៉ាងទៀតខេត្តមួយនេះក៏នៅមានរមណីយដ្ឋានជាច្រើនកន្លែងដូចជា អំពែភ្នំ រមណីយដ្ឋានបុរាណវិទ្យាចាស់ រមណីយដ្ឋានទឹកធ្លាក់ជ្រាវ នៅស្រុកថ្ពង ដែលសុទ្ធសឹងជាតំបន់ទេសចរណ៍ មានដើមស្រល់លើភ្នំគិរីរម្យ ទឹកធ្លាក់ចំបក់តេ ទឹកពុះស្រុកឱរ៉ាល់ និងរមណីយដ្ឋានភ្នំព្រះជាដើម៘ ហើយលោកស្រី និងក្រុមគ្រួសារបានមកលេងកំសាន្ត៣ថ្ងៃពេញតែម្តង៕
ចែករំលែកព័តមាននេះ