ខេត្តព្រៃវែង ៖ ប្រជាពលរដ្ឋបាននាំគ្នាចោមរោមមើលបុរសជាជនអនាថាម្នាក់ ដែលដេកដួលនៅតាមចិញ្ចើមផ្លូវក្នុងសភាពញ័រទទ្រីត ងើបអង្គុយមិនកើត ដើរក៏មិនរួច ចំណែកដងខ្លួនពោរពេញដោយស្នាមរបួស។
បុរសអនាថាម្នាក់នេះ ត្រូវបានគេប្រទះឃើញមានម៉ូតូកង់៣មួយគ្រឿង ដឹកយកមកទំលាក់ចោលនៅលើចិញ្ចើមផ្លូវត្រង់ចំណុចមុខដេប៉ូលក់ខ្សាច់មួយកន្លែង ស្ថិតក្នុងភូមិអ្នកលឿង ឃុំអ្នកលឿង ស្រុកពាមរក៍ កាលពីវេលាម៉ោង៣រសៀល ថ្ងៃទី១៥ មេសា ដែលជាថ្ងៃចូលឆ្នាំទី២ តែពីដំបូងគ្មានអ្នកណាចាប់អារម្មណ៍ទេ រហូតដល់ព្រឹកស្អែកឡើងថ្ងៃទី១៦ មេសា ដោយឃើញបុរសរូបនេះនៅដេកស្តូកស្តឹងមិនទៅណាសោះ ទើបធ្វើឱ្យអ្នកស្រុកងឿងឆ្ងល់ ហើយនាំគ្នាចោមរោមមើល និងរាយការណ៍មកអ្នកយកព័ត៌មានកោះសន្តិភាពឱ្យជួយ ទាក់ទងហៅសមត្ថកិច្ច និងឡានពេទ្យ។
បុរសអនាថាម្នាក់នេះមិនត្រូវបានគេស្គាល់ថាឈ្មោះអ្វីនោះទេ នៅលើដងខ្លួនឃើញមានស្នាមរបួសជាច្រើនកន្លែង ហើយពេលសួរនាំក៏ឆ្លើយមិនដឹងរឿង ហាក់ដូចជាវង្វេងវង្វាន់ស្មារតី ទើបធ្វើឱ្យគេសង្ស័យថា បុរសរូបនេះទំនងជាមានជំងឺប្រគ្រៀវកាច់ ឯស្នាមរបួសនៅលើដងខ្លួនទំនងជាជួបគ្រោះថ្នាក់អ្វីមួយ។
ទោះជាយ៉ាងណាក៏ដោយ ក្រោយមកបានទាក់ទងហៅរថយន្តសង្គ្រោះរបស់មន្ទីរពេទ្យបង្អែកស្រុកពាមរក៍ ដឹកយកបុរសអនាថារូបនេះទៅព្យាបាលនៅមន្ទីរពេទ្យបង្អែកអ្នកលឿង នៅព្រឹកថ្ងៃទី១៦ មេសាហើយបច្ចុប្បន្នបុរសរូបនេះកំពុងសម្រាកព្យាបាលនៅក្នុងមន្ទីរពេទ្យនៅឡើយ ហើយក៏ជូនជាដំណឹងដល់សាច់ញាតិ និងក្រុមគ្រួសារបុរសខាងលើ សូមទៅទទួលយកបុរសរូបនេះវិញផង៕
ចែករំលែកព័តមាននេះ