រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ព្រឹត្តិការណ៍មហាសង្ក្រាន្តវត្តភ្នំនៅរាជធានីភ្នំពេញ រយៈពេល០២ថ្ងៃកន្លងមកនេះ មានការចូលរួមពីមហាជនយ៉ាងច្រើនកុះករ គឺច្រើនជាងឆ្នាំកន្លងទៅ ជាពិសេសជនបរទេសដែលបានចូលរួមកម្សាន្តប្រកបដោយភាពសប្បាយរីករាយ និងមិនមានបញ្ហាអ្វីកើតឡើងគួរឲ្យកត់សំគាល់ឡើយ។…
រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ព្រឹត្តិការណ៍មហាសង្ក្រាន្តវត្តភ្នំនៅរាជធានីភ្នំពេញ រយៈពេល០២ថ្ងៃកន្លងមកនេះ មានការចូលរួមពីមហាជនយ៉ាងច្រើនកុះករ គឺច្រើនជាងឆ្នាំកន្លងទៅ ជាពិសេសជនបរទេសដែលបានចូលរួមកម្សាន្តប្រកបដោយភាពសប្បាយរីករាយ និងមិនមានបញ្ហាអ្វីកើតឡើងគួរឲ្យកត់សំគាល់ឡើយ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា សម្រាប់មហាសង្ក្រាន្តវត្តភ្នំក្នុងរយៈពេល២ថ្ងៃកន្លងមកនេះ មានមហាជនចូលរួមកម្សាន្តសប្បាយមានការកើនឡើងពីមួយថ្ងៃទៅមួយថ្ងៃប្រកបដោយស្នាមញញឹម និងសំរែកសើចក្អាកក្អាយ របស់ពុកម៉ែ ពូមីង បងប្អូន បានធ្វើឱ្យវត្តភ្នំមានមោទនភាពយ៉ាងខ្លាំង ឯក្រុមការងាររៀបចំក៏បាត់អស់នូវភាពនឿយហត់ ព្រមទាំងទទួលបានមកវិញនូវកំលាំងចិត្តដែលពិបាកនឹងពណ៌នា ។
លោកបានបន្តថា សង្ក្រាន្តវត្តភ្នំរយៈពេល០២ថ្ងៃនៅរមណីយដ្ឋានវប្បធម៌ប្រវត្តិសាស្ត្រវត្តភ្នំឆ្នាំនេះ មានការចូលរួមយ៉ាងច្រើនកុះករពីយុវជន យុវនារី និងប្រជាពលរដ្ឋសរុបប្រមាណចន្លោះពី២ម៉ឺនទៅ២៥.០០០នាក់ គឺថ្ងៃទី១ មានប្រមាណ១ម៉ឺននាក់ និងថ្ងៃទី២មានប្រមាណពី១២.០០០នាក់ ទៅ១៥.០០០នាក់ ហើយសង្ឃឹមថា ថ្ងៃទី៣នេះ នឹងមានការកើនឡើង ដែលនេះជាលទ្ធផលដ៏ល្អមួយទៀត ដែលរដ្ឋបាលរាជធានីភ្នំពេញបានខិតខំរៀបចំកម្មវិធីសង្ក្រាន្តនេះឡើង ដើម្បីបម្រើ និងផ្តល់នូវភាពសប្បាយរីករាយជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិយើង ។
លោក ម៉េត មាសភក្តី បានបញ្ជាក់ថា សម្រាប់រយៈពេល២ថ្ងៃកន្លងមកនេះ សភាពការណ៍ទូទៅនៅរាជធានីភ្នំពេញ មានស្ថានភាពល្អប្រសើរ ជាពិសេសការងារសន្តិសុខ និងសណ្តាប់ធ្នាប់ ដូចជា អំពើលួចឆក់ប្លន់ និងលូកហោប៉ៅយកលុយ ហាក់មិនមានបញ្ហាអ្វីកើតឡើងគួរឲ្យកត់សម្គាល់នោះទេ ដែលបង្កឲ្យប្រជាពលរដ្ឋចូលរួមដោយភាពសប្បាយរីករាយ ក្នុងនោះក៏មានជនបរទេសផងដែរ គឺមិនដូចការចោទប្រកាន់ពីប្រភពព័ត៌មានខាងក្រៅនោះទេ ៕
ចែករំលែកព័តមាននេះ