រាជធានីភ្នំពេញ ៖ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងមុននេះបន្តិចថា សម្រាប់ថ្ងៃទី១នៃពិធីបុណ្យចូលឆ្នាំថ្មីប្រពៃណីជាតិខ្មែរ ដែលរដ្ឋបាលរាជធានីភ្នំពេញ រៀបចំសង្ក្រាន្ត វត្តភ្នំឆ្នាំនេះ មានប្រជាពលរដ្ឋកម្សាន្តសប្បាយមានចំនួនច្រើនលើសពីការរំពឹងទុក គិតត្រឹមម៉ោង៦ល្ងាច។ លោកបន្តថា សង្ក្រានវត្តភ្នំឆ្នាំនេះ មានជនបរទេស ចូលរួមលេងល្បែងប្រជាប្រិយខ្មែរច្រើន ជាពិសេសវាំវង់តែម្តង។
លោក ម៉េត មាសភក្តី បានឲ្យដឹងទៀតថា សម្រាប់សង្ក្រាន្តវត្តភ្នំឆ្នាំនេះ គោលបំណងធំរបស់រដ្ឋបាលរាជធានីភ្នំពេញគឺចង់ផ្សព្វផ្សាយនូវ វប្បធម៌ប្រពៃណីជាតិខ្មែរ ពិសេសទស្សនីយភាព និងសំណង់បុរាណគ្រប់ទម្រង់គឺផ្ទះខ្មែរបែបជនបទ ដែល មានរចនាបទខុសៗគ្នាដាក់ជូនឲ្យបងប្អូនបានទស្សនា។
ក្រៅពីទស្សនីយភាពសំណង់បុរាណ ក៏នៅមាន ការដាក់តាំងបង្ហាញជាផ្សារភូមិដែលមានតូបរចនាបថបែបសម័យអង្គរ សម្រាប់ផលិតផលខ្មែរ ដែលធ្វើ ក្នុងស្រុកមកបង្ហាញ និងមានល្បែងប្រជាប្រិយចោលឈូង វាយក្អម ទាញព្រ័ត្រចំនួន១៥ប្រភេទទៀត យកមកសប្បាយជូនទស្សនា ក្នុងនោះល្បែងទាញព្រ័ត្រដែលជាបេតិកភណ្ឌពិភពលោក និងទទួលបានការចាប់អារម្មណ៍ផងដែរ៕
ចែករំលែកព័តមាននេះ