សាធារណរដ្ឋកូរ៉េ ៖ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានប្រកាសថា ព្រឹត្តិការណ៍ដ៏ ធំប្រចាំឆ្នាំ២០១៨ “មហាសង្ក្រាន្ដខ្មែរនៅកូរ៉េ” ជាលើកទី២ បានមកដល់ហើយ ដើម្បីអបអរសាទរពិធី បុណ្យចូលឆ្នាំថ្មីប្រពៃណីជាតិខ្មែរ ហើយកាន់តែអធិកអាធ័ម និងសប្បាយរីករាយ លើការបង្ហាញវប្បធម៌ ប្រពៃណី និងទំនៀមទម្លាប់ជូនដល់ភ្ញៀវជាតិ និងអន្ដរជាតិនៅលើទីកដីនៃសាធារណរដ្ឋកូរ៉េ បានមកដល់ ហើយ នៅថ្ងៃអាទិត្យ ១កើត ខែពិសាខ ឆ្នាំច សំរឹទ្ធស័ក ពុទ្ធសករាជ២៥៦២ ត្រូវនឹងថ្ងៃវរៈវនបត ទី១៥ ខែមេសា ឆ្នាំ២០១៨ នាទីក្រុងសេអ៊ូល ស្ថានីយរថភ្លើង Guil ខ្សែលេខ១ ច្រកចេញលេខ១ សូមអញ្ជើញ ចូលរួមដោយសេរីឲ្យបានច្រើនកុះករ។ លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានថ្លែងថា ការរៀបចំពិធីចូលឆ្នាំខ្មែរ នៅសាធារណរដ្ឋកូរ៉េ នៅឆ្នាំនេះ នឹងរឹតតែមាន អធិកអាធ័ម ហើយ មានសកម្មភាពកម្សាន្តរួមទាំងការដាក់បង្ហាញផលិតផលជាច្រើន នៅពេលប្រមុខរដ្ឋាភិបាល នៅភ្នំពេញ បានប្រកាសជំរុញការរាំចង្វាក់សារ៉ាវ៉ាន់ ចំណែកសង្ក្រាន្ត កូរ៉េពលរដ្ឋខ្មែរនៅទីនោះក៏នឹងរាំចង្វាក់ខ្មែរ សារ៉ា វ៉ាន់ ទ្រង់ទ្រាយធំដូចគ្នាដែរ។
លោកបន្តថា អ្វីដែលជាលក្ខណៈសម្បត្តិ ពិសេសរបស់ការរៀបចំ ព្រឹត្តិការណ៍ មហាសង្ក្រាន្ដខ្មែរនៅកូរ៉េ ដោយសារមានការចូលរួមរៀបចំពីសំណាក់ បណ្ដាសហគមន៍ សមាគម ក្រុមមូលនិធិស្ទើរទាំងអស់មកពីគ្រប់តំបន់ នៅសាធារណរដ្ឋកូរ៉េ ដែលនេះគឺសបញ្ជាក់ពី ការរួបរួម ស្រលាញ់ វប្បធម៌ អរិយធម៌ និងការចូលរួមសប្បាយរីករាយក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ។ ព្រឹត្តិការណ៍មហាសង្ក្រាន្ដខ្មែរ នៅកូរ៉េឆ្នាំនេះ គឺកាន់តែពិសេសជាងឆ្នាំមុន ដោយបាន រៀបចំបន្ថែមនូវកម្មវិធី និងការសម្ដែងដូចជា ៖ ពិធីពូនភ្នំខ្សាច់ និងស្រង់ព្រះ ការសម្ដែងក្បាច់គុន យុទ្ធ ក្រមខម ការតាំងពិព័រណ៍ ផលិតផលកសិកម្មខ្មែរ ដែលនាំចូលមកកូរ៉េ ការតាំងពិព័រណ៍ ផលិតផល របស់ ខេត្តកំពតការសម្ដែងអាយៃឆ្លងឆ្លើយ ដោយក្រុមសិល្បៈមកពីកម្ពុជា (នាយកុយ និងអ្នកនាង ខាត់ សុ ឃីម) ដែលនឹងរំពឹងថា មានអ្នកចូលរួមរាំប្រមាណ ៦ពាន់នាក់ ខ្លោងទ្វារនៃព្រឹត្តិការណ៍មហាសង្ក្រាន្ដ ដែលរំលេចដោយរចនាបថខ្មែរសុទ្ធសាធ។
លោក ឡុង ឌីម៉ង់ បានឲ្យដឹងទៀតថា ព្រឹត្តិការណ៍ មហាសង្ក្រាន្ដខ្មែរ នៅកូរ៉េ ត្រូវបានរៀបចំជាលើកទីពីរ ដើម្បីអបអរសាទរ ពិធីបុណ្យចូលឆ្នាំថ្មីប្រពៃណី ជាតិខ្មែរ ឲ្យកាន់តែអធិកអាធ័ម និងសប្បាយរីករាយ លើការបង្ហាញវប្បធម៌ ប្រពៃណី និងទំនៀមទម្លាប់ ជូនដល់ភ្ញៀវជាតិ និងអន្ដរជាតិ នៅលើទីកដី នៃសាធារណរដ្ឋកូរ៉េ ដែលប្រព្រឹត្តិទៅនៅថ្ងៃអាទិត្យ ទី១៥ ខែមេសា នាទីក្រុង សេអ៊ូល ស្ថានីយរថភ្លើង Guil។ ដោយផ្អែកលើកត្តាភូមិសាស្ត្រ ពេលវេលា និង សតិអារម្មណ៍របស់សហគមន៍ខ្មែរនៅកូរ៉េមហាសង្ក្រាន្ដខ្មែរ ឆ្នាំនេះគណៈកម្មការរៀបចំសង្ឃឹមថា នឹងមាន បងប្អូនប្រជាពលរដ្ឋមកចូលរួមមិនតិចជាង៨ពាន់នាក់។ កាលពីឆ្នាំមុនមានបងប្អូនបានមកចូលរួម កម្សាន្តសប្បាយប្រមាណ១ម៉ឺន៥ពាន់នាក់ហួសការ រំពឹងទុក។ ស្ថានទូតសង្ឃឹមថា មហាសង្ក្រាន្ដខ្មែរនៅ កូរ៉េនេះនឹងបានផ្ដល់ស្នាមញញឹម ក្ដីសង្ឃឹម និងមោទនភាពជាតិខ្មែរ ដែលមិនទាន់មានបណ្ដាប្រទេស ដែលមានបញ្ចូនពលករ មកបម្រើការងារ នៅសាធារណរដ្ឋកូរ៉េ មួយណា បានរៀបចំកម្មវិធី ដ៏ធំសម្បើម បែបនេះនៅឡើយ។
ហើយស្ថានទូត រំពឹងថា បងប្អូនប្រជាពលរដ្ឋខ្មែរដែលកំពុងរស់នៅធ្វើការ និងសិក្សា នៅសាធារណរដ្ឋកូរ៉េនឹងឆ្លៀតពេលពីភារកិច្ចដ៏មមាញឹករបស់បងប្អូនប្រជាពលរដ្ឋខ្មែរនៅកូរ៉េ ចូលរួម ព្រឹត្តិការណ៍នេះឲ្យបានច្រើនកុះករដូចឆ្នាំមុន។ គួររំលឹកថា បច្ចុប្បន្នសហគមន៍ខ្មែរ នៅសាធារណរដ្ឋកូរ៉េ ចំនួនប្រមាណជាង៦ម៉ឺននាក់ ក្នុងនោះរួមមាន ៖ ស្ត្រីរៀបការស្វាមីកូរ៉េ ប្រមាណ៧.០០០នាក់ និស្សិត កំពុងសិក្សាប្រមាណ៤០០នាក់ និងពលករ ប្រមាណ៥ម៉ឺន៣ពាន់នាក់ ដែលកំពុងបម្រើការលើវិស័យបី ធំៗ រួមមានវិស័យកសិកម្ម សំណង់ និងឧស្សាហកម្ម ហើយពលករ និងប្រជាពលរដ្ឋ ដែលកំពុងរស់នៅ តាមតំបន់ផ្សេងៗបានចងក្រង បង្កើតជាមូលនិធិសមាគម សហគមន៍ ដែលងាយស្រួលក្នុង ការទំនាក់ទំនង និងរៀបចំកម្មវិធីផ្សេងៗ ដែលបច្ចុប្បន្នមាន ៖ សមាគមចំនួន២៤ សហគមន៍ចំនួន១ និងមូលនិធិចំនួន២ ដែលបាន និងកំពុងធ្វើការ៕
ចែករំលែកព័តមាននេះ