រាជធានីភ្នំពេញ ៖ក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំចរ មហាជនគ្រប់ស្រទាប់វណ្ណៈប្រាថ្នាសិរីសួស្តី ជ័យមង្គល ទាំងក្រុមគ្រួសារ និងប្រទេសជាតិ ។ ចំពោះតារាចម្រៀង និងតារាសម្តែងមួយចំនួនបានបង្ហើរពាក្យពេចន៍ជូនពរដល់ជនរួមជាតិខ្មែរទាំងក្នុង និងក្រៅប្រទេស ។
តារាចម្រៀងអ្នកនាងឈួន សុវណ្ណឆៃកាលពីពេល ថ្មីៗកន្លងថ្លែងថា «នាឱកាសបុណ្យចូលឆ្នាំខ្មែរឆ្នាំថ្មីនេះនាងខ្ញុំគ្មានអ្វីក្រៅពីសុំពរជ័យទេវតាឆ្នាំថ្មីដែលមកគ្រប់គ្រងផែនដីយើងប្រទានពរជ័យដល់ប្រជាជនខ្មែរក្នុង និងក្រៅប្រទេសជួបប្រទះតែសំណាងល្អ មានសុខភាពល្អទៅកាន់ទីជិតឆ្ងាយជួបប្រទះតែលសុខសុវត្ថិភាព ។ ជាពិសេសកុំភ្លេចចូលរួមលេងល្បែងប្រជាប្រិយខ្មែរ និងរាំចង្វាក់ប្រពៃណីខ្មែរឱ្យបានច្រើនទាំងអស់គ្នា » ។
អ្នកនាងខាត់ សុឃីម ថ្លែងថា «នាងខ្ញុំសូមជូនពរឆ្នាំថ្មីបងប្អូនប្រជាជនកម្ពុជាយើងទាំងអស់ជួបនូវរូបភាព ល្អៗ ចម្រុងចម្រើន ប្រកបការងារអ្វីឱ្យចេះតែរីកចម្រើនទាំងអស់គ្នា ។
ជាពិសេសអគុណដល់បងប្អូនដែលគាំទ្រស្នាដៃសម្តែងរបស់នាងខ្ញុំរហូតមក មានតែការអរគុណដែលស្រឡាញ់ក្រុមក្រួសារត្រកូលខាត់។ ឱកាសជួបជុំសាច់ញាតិត្រូវចេះអធ្យាស្រ័យគ្នា បើកបរត្រូវមានល្បឿនកំណត់ ប្រុងប្រយ័ត្នឱ្យខ្ពស់ទាំងអស់គ្នា» ។
តារាចម្រៀងអ្នកនាងគឹម សុគន្ធា ថ្លែងថា «នាងខ្ញុំចូលរួមជូនពរឆ្នាំថ្មីដល់ប្រជាជនខ្មែរនាឱកាសចូលឆ្នាំថ្មីនេះប្រកបដោយសុខសុវត្ថិភាពនិងរកទទួលទានមានបាន និងមានសុភមង្គលគ្រប់ក្រុមគ្រួសារ ប៉ងប្រាថ្នាអ្វីបានសម្រេចដូចបំណងប្រាថ្នា »។
តារាចម្រៀង និងជាបេក្ខជន The Cambodia កញ្ញាម៉ង់ ចាន់កញ្ញា ថ្លែងថា «នាងខ្ញុំសូមសំណូមពរដល់ប្រជាជនខ្មែរគ្រប់ខេត្តក្រុង សូមធ្វើដំណើរដោយសុខសុវត្ថិភាព ហើយបើស្រវឹងសូមកុំបើកបរ សូមគោរពច្បាប់ចរាចរណ៍ និងចេះយោគយល់គ្នាទៅវិញទៅមក និងសូមជូនពរដល់បងប្អូនខ្មែរទាំងក្នុង និងក្រៅប្រទេសជួបតែសំណាងល្អគ្រប់ក្រុមក្រួសារ» ៕
ចែករំលែកព័តមាននេះ