ក្មេងៗចូលចិត្តមើលវីដេអូនៅលើ YouTube ណាស់ ហើយសេវាកម្មនេះមានវីដេអូដែលបង្កើតសម្រាប់ក្មេងៗជាច្រើនផងដែរ ។ ប៉ុន្តែក្រុមការពារក្មេង និងអតិថិជន អះអាងថា YouTube បានប្រមូលទិន្នន័យពីអ្នកមើលវីដេអូមិនទាន់គ្រប់អាយុ ដោយខុសច្បាប់ ។
កាលពីថ្ងៃចន្ទ ក្រុមសកម្មជនប្រមាណ២០ក្រុមបានផ្ញើពាក្យបណ្តឹងទៅកាន់ FTC ឲ្យស៊ើបអង្កេតក្រុមហ៊ុនរបស់ Google ដែលល្មើសនឹងច្បាប់ការពារឯកជនលើអ៊ីនធើរណេតរបស់ក្មេង ដោយដាក់កម្រិតលើក្រុមហ៊ុនមិនឲ្យប្រមូលទិន្នន័យពីក្មេងក្រោមអាយុ១៣ឆ្នាំ ។ ក្រោមច្បាប់នេះ ក្រុមហ៊ុនត្រូវតែប្រាប់ដំណឹងដល់ឪពុកម្តាយ និងទទួលបានការយល់ព្រមពីពួកគេសិន មុននឹងអាចប្រមូលបាន ។
បណ្តឹងនេះសរសេរថា ៖« Google អាចរកប្រាក់ចំណេញបានយ៉ាងច្រើនពីការប្រមូល និងការប្រើប្រាស់ទិន្នន័យផ្ទាល់ខ្លួនពីក្មេងៗលើ YouTube ។ ការប្រមូលខុសច្បាប់នេះ បានកើតមានឡើងអស់រយៈពេលជាច្រើនឆ្នាំហើយ ក្នុងនោះមានក្មេងអាមេរិករាប់សិបលាននាក់ » ។
Channel ដែលផ្តោតសំខាន់លើក្មេងៗមានចំនួនអ្នកតាមដានយ៉ាងច្រើន និងរកប្រាក់ចំណូលបានយ៉ាងខ្ពស់ផងដែរលើការផ្សាយពាណិជ្ជកម្ម ។
អ្នកនាំពាក្យរបស់ Google បានប្រាប់ថា ៖« ការការពារក្មេងៗ និងគ្រួសារ តែងតែជាការងារចម្បងសម្រាប់ពួកយើង ។ ពួកយើងនឹងអានពាក្យបណ្តឹងដោយល្អិតល្អន់ និងវិភាគថា តើមានអ្វីដែលអាចធ្វើបាន ដើម្បីធ្វើឲ្យវាល្អប្រសើរឡើង។ កម្មវិធី YouTube មិនមែនសម្រាប់ក្មេងៗប្រើប្រាស់ទេ ពួកយើងបានវិនិយោគយ៉ាងខ្លាំងលើការបង្កើតកម្មវិធី YouTube Kids ដើម្បីផ្តល់សេវាកម្មច្នៃឡើងសម្រាប់ក្មេងៗផងដែរ » ។
ពាក្យបណ្តឹងនេះបានព្យាករថា YouTube បានប្រមូលទិន្នន័យដោយខុសច្បាប់ពីក្មេងៗប្រមាណ២៣លាននាក់ក្នុង១ឆ្នាំ ។ ក្រុមសកម្មជនខាងលើក៏បានស្នើដល់ FTC ឲ្យពិន័យ YouTube ប្រមាណ៤១.៤៨៤ដុល្លារក្នុង១ករណីថែមទៀត បើសរុបករណីទាំងអស់អាចស្មើរាប់ប៊ីលានដុល្លារឯណោះ ៕
ចែករំលែកព័តមាននេះ