មហាសេដ្ឋី Jack Ma ជំរុញឱ្យហ្វេសប៊ុកដោះស្រាយបញ្ហាភាពឯកជន
កាលពីថ្ងៃចន្ទកន្លងមក មហាសេដ្ឋី Jack Ma ស្ថាបនិកក្រុមហ៊ុន Alibaba បានជំរុញដល់ក្រុមហ៊ុន Facebook Inc ឲ្យដោះស្រាយបញ្ហាភាពឯកជននៃទិន្នន័យរបស់ខ្លួន…
កាលពីថ្ងៃចន្ទកន្លងមក មហាសេដ្ឋី Jack Ma ស្ថាបនិកក្រុមហ៊ុន Alibaba បានជំរុញដល់ក្រុមហ៊ុន Facebook Inc ឲ្យដោះស្រាយបញ្ហាភាពឯកជននៃទិន្នន័យរបស់ខ្លួន ។
លោកសេដ្ឋី Ma បាននិយាយក្នុងវេទិកា Boao សម្រាប់អាស៊ីក្នុងខេត្តហៃណាន ថា លោកត្រូវបានសួរនាំពីបញ្ហាភាពឯកជន ដែលជាប់ពាក់ព័ន្ធនឹងហ្វេសប៊ុក ក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីក្រុមហ៊ុនបាននិយាយថា ព័ត៌មានឯកជនរបស់អ្នកប្រើប្រាស់ប្រមាណ៨៧លាននាក់ អាចនឹងត្រូវបានចែករំលែកជាមួយនឹងក្រុមហ៊ុនប្រឹក្សាយោបល់នយោបាយ Cambridge Analytica ។
លោកសេដ្ឋី Ma បាននិយាយថា ៖« អ្នកគ្រប់គ្រងថ្នាក់ខ្ពស់គួរតែទទួលខុសត្រូវ និងនិយាយថា ចាប់ពីពេលនេះទៅ ពួកយើងចាប់ផ្តើមដោះស្រាយវា » ។
លោកបានបន្តថា ៖« ខ្ញុំនឹងមិនបញ្ចេញមតិពីហ្វេសប៊ុកទេ ប៉ុន្តែខ្ញុំនឹងនិយាយថា ហ្វេសប៊ុកកាលពី១៥ឆ្នាំមុន មិនដែលគិតថា វានឹងរីកចម្រើនមកដូច្នេះទេ ។ ប្រាកដណាស់ វាជាបណ្តាញសង្គម វាមានអ្នកប្រើប្រាស់ប្រមាណ២ប៊ីលាននាក់ ។ ដូច្នេះ រាល់បញ្ហាទាំងអស់ដែលពួកគេមិនដឹងបានកើតមានឡើង ។ វាជាពេលដែលពួកយើងដោះស្រាយវា » ។
លោកបានបន្ថែមទៀតថា ៖« ប៉ុន្តែខ្ញុំគិតថា បញ្ហានេះអាចនឹងដោះស្រាយបាន ពួកយើងមិនត្រូវសម្លាប់ក្រុមហ៊ុន ព្រោះតែបញ្ហាទាំងនេះទេ » ។
កាលពីថ្ងៃសុក្រ ហ្វេសប៊ុកបានគាំទ្រសេចក្តីព្រាងច្បាប់ដែលតម្រូវឲ្យប្រព័ន្ធសង្គមប្រកាសពីអត្តសញ្ញាណរបស់អតិថិជនដែលផ្សាយពាណិជ្ជកម្ម និងយុទ្ធនាការនយោបាយលើអ៊ីនធើរណេតផងដែរ ។
លោក Ma បាននិយាយថា ៖« ដំណោះស្រាយដែលសំខាន់ជាងគេ គឺអ្នកគោរពទិន្នន័យ អ្នកគោរពសន្តិសុខ និងអ្នកគោរពភាពឯកជន» ៕
ចែករំលែកព័តមាននេះ