ខេត្តស្វាយរៀង ៖ លោកឧត្តមសេនីយ៍ កឹង ឃន ស្នងការនៃស្នងការដ្ឋាននគបាលខេត្តបានរៀបចំពង្រាយកម្លាំងចម្រុះជិត១,០០០នាក់ ដាក់ការពារសុវត្ថិភាព សន្តិសុខសណ្តាប់ធ្នាប់ក្នុងពិធីសង្ក្រាន្តស្វាយរៀង គឺដាក់ពង្រាយទូទាំងក្រុងស្វាយរៀងតែម្តង។
បើតាមលោកឧត្តមសេនីយ៍ទោបានឲ្យដឹងនាព្រឹកថ្ងៃទី១៣ មេសានេះថា ស្នងការនគបាលខេត្ត បានដាក់ផែនការរៀបចំកម្លាំងចម្រុះជិត១០០០នាក់ដើម្បីការពារសុវត្ថិភាព សន្តិសុខ សណ្តាប់ធ្នាប់ក្នុងឱកាសសង្ក្រាន្តស្វាយរៀងរយៈពេល៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ មេសា ដើម្បីអបអរសាទរក្នុងពិធីបុណ្យចូលឆ្នាំថ្មីប្រពៃណីខ្មែរនៅក្នុងក្រុងស្វាយរៀង។
នៅក្នុងឱកាសនេះដែរ លោក ឌី វិជ្ជា ប្រធានសហភាពសហព័ន្ធយុវជនកម្ពុជាខេត្ត ក៏បានដាក់កម្លាំងយុវជនដឹកនាំលេងល្បែងប្រជាប្រីយនៅខាងមុខសាលាខេត្ត នៅរង្វង់មូលវិមានឯករាជ្យ នៅសួនកុមារ និងមន្ទីរវប្បធម៌ និងវិចិត្រសិល្បៈខេត្ត ដូចជា ល្បែងលាក់កន្សែង ទាញព្រាត់ ចោលឈូង ទាញព្រាត់នៅលើទឹកសាប៊ូ វាយក្អម និងមានការប្រគំតន្ត្រីរាំលេងផងដែរ។ ចំណែកនៅតាមវត្តអារាម ក៏មានសម្តែងសិល្បៈប្រពៃណីដូចជា របាំត្រុត របាំគោះត្រឡោក របាំកណ្តូបសេះជាដើម និងប្រគំតន្ត្រីនៅរង្វង់មូលវិមានឯករាជ្យនៃទន្លេវ៉ៃគោក្រុងស្វាយរៀង ហើយមានក៏រថយន្តបាញ់ទឹកធ្វើជាទឹកភ្លៀង ដើម្បីឲ្យប្រជាពលរដ្ឋចូលរួមងូតលេងពេលមានកំដៅថ្ងៃក្តៅខ្លាំងផងដែរ ។
រដ្ឋបាលខេត្តឯកឧត្តមអភិបាលខេត្តក៏បានប្រកាសអញ្ជើញដល់ប្រជាពលរដ្ឋ មន្ត្រីរាជការ ជាពិសេសយុវជន ចូលរួមកំសាន្តសប្បាយទាំងអស់គ្នានៅបរិវេណខាងមុខសាលាខេត្ត និងទីតាំងដែលបានរៀបចំសង្ក្រាន្ត យើងមានទាំងស្តង់ពិព័រណ៍លក់ទំនិញគ្រប់ប្រភេទ ក្នុងពិធីសង្ក្រាន្តស្វាយរៀងលើកទី២នេះពិតជាមានសប្បាយៗជាងឆ្នាំមុនៗ៕
ចែករំលែកព័តមាននេះ