រាជធានីភ្នំពេញ ៖ មន្ត្រីរដ្ឋបាលរាជធានីភ្នំពេញបានឲ្យដឹងថា ដើម្បីបញ្ចៀសនូវឧបទ្ទវហេតុណាមួយកើតឡើងជាយថាហតុ រដ្ឋបាលរាជធានីភ្នំពេញ សូមផ្អាកការធ្វើចរាចរណ៍របស់នាវាចរណ៍ជាបណ្តោះអាសន្នក្រោមការដ្ឋានស្ពានដែកបាឡេឆ្លងកាត់ទន្លេសាបនៅខណ្ឌប្ញស្សីកែវទៅខណ្ឌជ្រោយចង្វារ ចាប់ពីថ្ងៃទី១៣ ដល់១៦ មេសា ខាងមុខនេះ ។ ព្រោះការរដ្ឋានសាងសង់ស្ពានបាឡេឆ្លងកាត់ទន្លេសាប ពីផ្លូវជាតិលេខ៥ ទៅកាន់តំបន់ជ្រោយចង្វានឹងត្រូវដំឡើងគ្រោងស្ពានបញ្ចប់ដែលនៅសល់ផ្នែកកណ្តាលចំនួនពីរកំណាត់។
មន្ត្រីដដែលបានបញ្ជាក់ថា ដើម្បីបញ្ចៀសឧបទ្ទវហេតុណាមួយកើតឡើងជាយថាហតុ រដ្ឋបាលរាជធានីភ្នំពេញនឹងផ្អាកនាវាចរណ៍ជាបណ្តោះអាសន្ននៅខាងក្រោមការដ្ឋានមួយរយៈដោយបង្វែធ្វើចរាចរតាមគន្លងសងខាងទីតាំងដំឡើងគ្រោងស្ពានជំនួសវិញ ។
គួររំលឹកថា កាលពីថ្ងៃទី២៣ តុលា ២០១៧កន្លងមកនេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា បានអញ្ជើញជាអធិបតីក្នុងពិធីបើកការដ្ឋានសាងសង់ស្ពានបេតុង អារមេខ្សែកាប និងស្ពានបេឡេស្របគ្នា ឆ្លងកាត់ទន្លេសាបតភ្ជាប់ពីផ្លូវជាតិលេខ៥ទៅផ្លូវជាតិលេខ៦ ដើម្បីរំដោះចរាចរណ៍ឲ្យកំណាត់ផ្លូវជាតិទាំងពីរនេះ មានភាពប្រសើរឡើង ជាពិសេសពង្វាង និងរំដោះចរាចរណ៍នៅតំបន់ស្ពានជ្រោយចង្វារ បន្ទាប់ពីស្ពានជ្រោយចង្វារចាស់ត្រូវបានបិទដើម្បីជួសជុល ។ ស្ពានទាំងពីរនេះ ស្ថិតនៅទីតាំងឆ្លងទន្លេសាប លើតម្រង់ផ្លូវសាលាដែកក្នុងខណ្ឌឫស្សីកែវ និងខណ្ឌជ្រោយចង្វារ មានបណ្តោយ៩២២ម៉ែត្រ កម្ពស់នាវាចរណ៍ក្រោមស្ពាន អតិបរមានៅរដូវវស្សា១០.៥ម៉ែត្រ កម្ពស់នាវាចរណ៍ក្រោមស្ពាន អប្បបរមានៅរដូវប្រាំង ២០.៥ម៉ែត្រ ។
ស្ពាននេះពិតជាមានសារសំខាន់ណាស់ក្នុងការចូលរួមបញ្ជៀស និងរំដោះចរាចរណ៍ពីផ្លូវជាតិលេខ៦ ឆ្លង ចូលផ្លូវជាតិលេខ៥ ជាពិសេសជួយពង្វាង និងរំដោះចរាចរណ៍នៅតំបន់ស្ពានជ្រោយចង្វារ បន្ទាប់ពីស្ពានជ្រោយចង្វារចាស់ត្រូវបានបិទទាំងស្រុង ដើ ម្បីធ្វើការជួសជុល ៕
ចែករំលែកព័តមាននេះ