រាជធានីភ្នំពេញ ៖ ស្ត្រីម្នាក់ឈ្លោះប្រកែកជាមួយប្តីប្រពន្ធបន្តិចបន្តួច បានសម្រេចចិត្តចងកនឹងចម្រឹងបង្អួចផ្ទះបាយសម្លាប់ខ្លួន បន្សល់ទុកកូនស្រីអាយុ២ឆ្នាំ បង្កឲ្យមានការភ្ញាក់ផ្អើលកាលពីវេលាម៉ោង៦ល្ងាច ថ្ងៃទី១១ ខែមេសា ឆ្នាំ២០១៨ ស្ថិតក្នុងបុរី ឡាយគង់ ផ្ទះលេខ១៣JEo ផ្លូវលេខ០៩ ភូមិម័ល សង្កាត់ដង្កោ ខណ្ឌដង្កោ។ សពស្ត្រីចងកមានឈ្មោះ ប៉ុស ស្រីពាង អាយុ៣២ឆ្នាំ ស្នាក់នៅក្នុងបុរី ឡាយគង់ ផ្ទះលេខ១៣JEo ផ្លូវលេខ០៩ ភូមិម័ល សង្កាត់ដង្កោ ខណ្ឌដង្កោ មានស្រុកកំណើតនៅភូមិស្ទឹងជ្រៅ ឃុំដើមមាន ក្រុងតាខ្មៅ ខេត្តកណ្តាល មានប្តីឈ្មោះ ទួ សៅលី អាយុ៣៣ឆ្នាំ មុខរបរលក់ប្រេងម៉ាស៊ីន ក្រុមហ៊ុន ស្នាក់នៅផ្ទះកើតហេតុ មានស្រុកកំណើតស្រុកបាទី ខេត្តតាកែវ មានកូនស្រីម្នាក់ ឈ្មោះ ស្រីពេជ្រ អាយុ២ឆ្នាំ។
តាមប្រភពព័ត៌មានពីសមត្ថកិច្ចបានឲ្យដឹងថា មុនកើតហេតុមានបងប្អូនខាងស្ត្រីរងគ្រោះបានទូរស័ព្ទមកជនរងគ្រោះជាច្រើនដងគ្មានអ្នកលើក លុះពេលមានអ្នកលើកទូរស័ព្ទស្រាប់តែឮសំឡងកូនក្មេងនិយាយ តែនិយាយមិនច្បាស់នោះទេ ដោយមិនអស់សង្ស័យពួកគាត់ជាសាច់ញាតិ ក៏បានទូរស័ព្ទឲ្យមិត្តភក្តិរបស់ជនរងគ្រោះម្នាក់ដែលនៅភ្នំពេញស្រាប់ជួយទូរសព្ទ័ទៅប្រាប់បុរសជាប្តីនៅកន្លែងធ្វើការឲ្យមកជួយមើលប្រពន្ធនៅផ្ទះ ពេលបុរសជាប្តីបានមកដល់ផ្ទះក៏ប្រទះឃើញស្ត្រីជាប្រពន្ធបានចងកសម្លាប់ខ្លួនជាប់នឹងចម្រឹងដែកបង្អួចផ្ទះបាយស្លាប់បាត់ទៅហើយ។ ដោយឡែកបុរសជាប្តីស្ត្រីចងកបានឲ្យដឹងថា ពួកគាត់មិនមានរឿងអ្វីធំដុំនោះទេគឺពេលខ្លះគ្រាន់តែរឿងឈ្លោះប្រកែកគ្នា បន្តិចបន្តួចតែប៉ុណ្ណោះ និងមានរឿងមួយទៀតក្នុងគ្រួសារគឺបងប្អូនទាំងសង្ខាងមិនបានពេញចិត្តពួកគាត់ទាំងពីរនាក់យកគ្នាជាប្តីប្រពន្ធទេ ហើយពួកគាត់បានយកគ្នាជាប្តីប្រពន្ធដោយចិត្តឯង។
ក្រោយកើតហេតុសមត្ថកិច្ចមូលដ្ឋាន បានចុះទៅកន្លែងកើតហេតុ រួចហើយក៏បានទំនាក់ទំនងហៅខាងជំនាញកោសល្យវិច្ច័យខណ្ឌដង្កោ ចុះទៅពិនិត្យសព តែខាងជំនាញខណ្ឌដង្កោ ចុះទៅដល់កន្លែងកើតហេតុ ពិនិត្យឃើញថា សពមានសភាពខុសប្រក្រតី ហើយខាងបងប្អូនស្ត្រីរងគ្រោះមិនអស់ចិត្ត និងទាមទាររកយុត្តិធម៌ដោយសង្ស័យថា ជាករណីឃាតកម្មទើបសមត្ថកិច្ចគ្រប់ជំនាញដែលពាក់ពន្ធ័ ព្រមទាំងពេទ្យតុលាការបានចុះមកធ្វើការពិនិត្យយ៉ាងល្អិតល្អន់ ដើម្បីក្រុមគ្រួសារអស់ចិត្តរហូតទាល់តែម៉ោង១យប់ទើបបញ្ចប់។ ក្រោយពេលកើតហេតុ សមត្ថកិច្ចបានបញ្ជាក់ថា សពស្ត្រីខាងលើ ពិតជាបានចងក សម្លាប់ខ្លួនឯងពិតប្រាកដមែន ដោយមិនមានរឿងទាក់ទិននឹងករណីឃាតកម្មនោះទេ រួចហើយក៏បានធ្វើលិខិតប្រគល់សពជនរងគ្រោះឲ្យក្រុមគ្រួសារយកទៅធ្វើបុណ្យនៅស្រុកកំណើតខេត្តកណ្ដាល៕
ចែករំលែកព័តមាននេះ