ខេត្តកំពង់ធំ ៖ ម៉ូតូសេ១២៥ បានបុកគ្នាជាមួយម៉ូតូវេវសណ្ដោងរ៉ឺម៉កស្លាប់ម្នាក់របួសធ្ងន់ស្រាលបីនាក់ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ១១និង១០នាទីព្រឹកថ្ងៃទី១២ ខែមេសា ឆ្នាំ២០១៨ នៅលើកំណាត់ផ្លូវជាតិលេខ០៦ ទល់មុខអធិការដ្ឋាននគរបាលស្រុកស្ទោង ស្ថិតក្នុងភូមិត្នោត ឃុំកំពង់ចិនជើង ស្រុកស្ទោង ខេត្តកំពង់ធំ ។
លោកវរសេនីយ៍ត្រី តាន់ ឆេងនឿន អធិការរងនគរបាលស្រុកស្ទោងទទួលខាងសណ្តាប់ធ្នាប់ បានឲ្យដឹងថា នៅមុនពេលកើតហេតុ គេឃើញអ្នកបើកបរម៉ូតូសណ្តោងរ៉ឺម៉កដឹងទឹកកក ម៉ាកវេវ ពណ៌ក្រហម គ្មានស្លាកលេខ បើកបរដោយឈ្មោះ អេន ភេទប្រុស អាយុ៣២ឆ្នាំ រស់នៅ ភូមិចក ឃុំកំពង់ចិនជើង ស្រុកស្ទោង បើកបរពីត្បូងទៅជើងបញ្ច្រាសទិសគ្នាជាមួយម៉ូតូសេ១២៥ លុះដល់ចំណុចកើតហេតុខាងលើ ម៉ូតូរ៉ឺម៉កក៏បានបត់ឆ្វេង ដើម្បីយកទឹកកកដាក់ឲ្យម៉ូយ ដោយខ្វះការប្រុងប្រយ័ត្នក៏បានបុកគ្នាមួយ និងម៉ូតូម៉ាកសេ C125 ពណ៌ខ្មៅ ពាក់ស្លាកលេខ កំពង់ធំ 1E- 6858 ឌុបគ្នា៣នាក់ ក្នុងទិសដៅបញ្ច្រាសទិសគ្នា យ៉ាងពេញទំហឹង បណ្តាលឲ្យអ្នកបើកបរម៉ូតូសណ្ដោងរ៉ឺម៉កដឹកទឹកកករបួសធ្ងន់ ។
ចំណែកខាងម៉ូតូឌុបគ្នា៣នាក់រួមមានទី១ អ្នកបើកបរម៉ូតូ ឈ្មោះ ឈន ភីន ភេទប្រុស អាយុ ២៩ឆ្នាំ របួសស្រាល អ្នករួមដំណើរជាមួយឈ្មោះ ភឹម គឿន អាយុ ៥៥ឆ្នាំ ត្រូវជាម្ដាយស្លាប់នៅកន្លែងកើតហេតុ និងម្នាក់ទៀតឈ្មោះ ឈរ យឿន អាយុ១៤ឆ្នាំ ត្រូវជាប្អូនស្រី របួសធ្ងន់ អ្នកទាំង៣ រស់នៅក្នុងភូមិក្រសាំង ឃុំពពក ស្រុកស្ទោង ខេត្តកំពង់ធំ ។
ករណីគ្រោះថ្នាក់ចរាចរណ៍បង្កឡើងដោយម៉ូតូសណ្តោងរ៉ឺម៉កបើកបត់ឆ្វេងខ្វះការប្រុងប្រយ័ត្ន គួបផ្សំជាមួយម៉ូតូសេ១២៥ បើកលឿន ក្រោយកើតហេតុសមត្ថកិច្ចចុះវាស់វែងធ្វើកំណត់ហេតុ បញ្ចូលជនរងគ្រោះទៅមន្ទីពេទ្យ ។
ចំណែកវត្ថុតាងរក្សារទុកនៅអធិការដ្ឋានស្រុកស្ទោង ហើយសពប្រគល់ឲ្យសាច់ញាតិក្រុមគ្រួសារចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ