រាជធានីភ្នំពេញ ៖ សិល្ប និងល្បែងប្រជាប្រិយគ្រប់ទម្រង់នៅរមណីយដ្ឋានវត្តក្នុងពិធីបុណ្យចូលឆ្នាំប្រពៃណីជាតិខ្មែររយៈពេល៣នេះ មន្ទីរវប្បធម៌ និងវិចិត្រសិល្បរាជធានីភ្នំពេញនឹងដាក់តាំងបង្ហាញអំពីសំណង់ ផ្ទះបុរាណ ល្បែងប្រជាប្រិយគ្រប់ទម្រង់ នៅរមណីយដ្ឋានវត្តភ្នំ ដើម្បី ផ្សព្វផ្សាយ និងបង្ហាញឲ្យភ្ញៀវជាតិ អន្តរជាតិ ពិសេសក្មេង ជំនាន់បានស្គាល់ពីអត្តសញ្ញាណជាតិ ខ្មែរពិតៗ ដែលដូនតាបានបន្សល់ទុកឲ្យ ។
លោក ជំ វុទ្ឍី ប្រធានមន្ទីរវប្បធម៌ និងវិចិត្រសិល្ប រាជធានីភ្នំពេញបានឲ្យដឹងថា សម្រាប់ សង្ក្រាន្តវត្តភ្នំឆ្នាំនេះ គោលបំណងធំរបស់រដ្ឋបាលរាជធានីភ្នំពេញក៏ដូចមន្ទីរ ចង់ផ្សព្វផ្សាយ នូវ វប្បធម៌ប្រពៃណីជាតិខ្មែរ ពិសេសទស្សនីយភាព និងសំណង់បុរាណគ្រប់ទម្រង់ គឺផ្ទះខ្មែរបែបជនបទដែលមានរចនាបទខុសៗគ្នា ដាក់ជូនឲ្យបងប្អូនបានទស្សនា ។
ក្រៅពីទស្សនីយភាពសំណង់បុរាណក៏នៅមានការដាក់តាំងបង្ហាញជាផ្សារភូមិដែលមានតូប រចនាបទ បែបសម័យអង្គរសម្រាប់ផលិតផលខ្មែរ ដែលធ្វើក្នុងស្រុកមកបង្ហាញ និងលក់ដែលមានចំនួនជាង២០តូប ។
លោកបន្តថា នៅមានល្បែងប្រជាប្រិយចោលឈូង វាយក្អម ទាញព្រ័ត្រចំនួន១៥ប្រភេទទៀត យកមកសប្បាយជូនទស្សនាក្នុងនោះ ល្បែងទាញព្រ័ត្រ ដែលជាបេតិកភណ្ឌពិភពលោក និងទទួលបានការចាប់អារម្មណ៍ខ្លាំងជាងគេ ។ លោកជំ វុទ្ឍី បានឲ្យដឹងទៀតថា សង្ក្រាន្តវត្តភ្នំឆ្នាំនេះ មានរៀបចំធំជាងឆ្នាំមុនដោយជ្រើសរើយកអ្នកចេះលេងល្បែងមកដឹកនាំ ដើម្បីឲ្យប្រជាពលរដ្ឋចូលរួមមកលេង មកទស្សនា សម្រាប់បង្ហាញយុវវ័យជំនាន់ ក្រោយឲ្យបានដឹង ដែល បុព្វបុរសខ្មែរជំនាន់មុនបន្សល់ទុក ។ ម្យ៉ាងក្នុងរយៈពេល៣ថ្ងៃនេះ នៅពេលយប់នឹងមានប្រគំ តន្ត្រីសម័យ និងពេលថ្ងៃមានល្បែងប្រជាប្រិយ ។ ក្រៅពីល្បែងកម្សាន្តមានពូនភ្នំខ្សាច់មានបង្ហាញក្បាច់គុណខ្មែរល្បុគ្គតោ ការប្រើប្រាស់ កន្សែងយ័ន មន្តអាគមន៍គាថាជាដើម ។
លោកបន្តថា ការរៀបចំ និងការបង្ហាញអំពីសមិទ្ធផលនៃស្នាដៃរបស់ខ្មែរនៅក្នុងសង្ក្រាន្តវត្តភ្នំនាពេលនេះ គឺចង់ឲ្យភ្ញៀវជាតិបានស្គាល់នូវអ្វីដែលជារបស់ខ្មែរ ពិសេសចង់ឲ្យខ្មែរខ្លួនឯង បានស្គាល់អំពី អត្តសញ្ញាណជាតិខ្លួនដែលបន្សល់ទុកតាំងពីបុព្វបុរសខ្មែរមកក្នុងនោះរដ្ឋបាលរាជធានីភ្នំពេញក៏បានបង្ហាញនូវសិល្បគ្រប់ទម្រង់ទាំងតន្ត្រីសម័យ តន្ត្រីបុរាណ ដើម្បីជូនបងប្អូននៅក្នុងរាជធានីភ្នំពេញ និងបងប្អូនដែលមិនបានទៅស្រុកកំណើត មានឱកាសបានចូលរួមសប្បាយរីករាយ ដើម្បីអបអរពិធីបុណ្យចូលឆ្នាំខ្មែរ និងបង្កើតភាពសប្បាយក្នុងពិធិបុណ្យចូលឆ្នាំរយៈពេល៣ថ្ងៃនេះ ។
សូមបញ្ជាក់ថា ៖ មហាសង្ក្រាន្តឆ្នាំថ្មី ឆ្នាំចនេះនឹងឈានចូលមកដល់នៅថ្ងៃទី១៤ ខែមេសា វេលាម៉ោង៩ និង១២នាទីព្រឹកទេវតាព្រះនាមមហោធរៈទេវីជាបុត្រីទី៧ នៃកបិល មហាព្រហ្ម តាមទំនៀមពីធីចូលឆ្នាំប្រព្រឹត្តទៅចំនួន៣ថ្ងៃ គឺថ្ងៃទី១ ជាវរៈសង្ក្រាន្ត ថ្ងៃទី២ជាថ្ងៃវារៈវ័នបទ និងថ្ងៃទី៣ជាថ្ងៃវារៈឡើងស័កតែម្តង ៕
ចែករំលែកព័តមាននេះ