ខេត្តកំពត ៖ រដ្ឋបាលខេត្តកំពតបានធ្វើពិធីប្រកាស ចូលកាន់មុខតំណែងអភិបាលរងនៃគណៈអភិបាលខេត្តក្រោមអធិបតីភាព ឯ.ឧ សក់ សេដ្ឋា រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់សម្ដេចក្រឡាហោមស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ…
ខេត្តកំពត ៖ រដ្ឋបាលខេត្តកំពតបានធ្វើពិធីប្រកាស ចូលកាន់មុខតំណែងអភិបាលរងនៃគណៈអភិបាលខេត្តក្រោមអធិបតីភាព ឯ.ឧ សក់ សេដ្ឋា រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់សម្ដេចក្រឡាហោមស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃទី១២ ខែមេសា ឆ្នាំ២០១៧ ។
ឯ.ឧ ជាវ តាយ អភិបាលនៃគណៈអភិបាល ខេត្ត បានធ្វើរបាយការណ៍ជំរាបជូនថ្នាក់ដឹកនាំក្នុងអង្គពិធីនាពេលនេះ ឲ្យបានដឹងអំពីការអភិវឌ្ឍន៍មានភាពរីកចម្រើននៅទូទាំងខេត្តរួចមក ។
យោងតាមអនុក្រឹត្យ រាជរដ្ឋាភិបាលត្រូវបានប្រកាសតែងតាំង លោកប៉ឹល កុសល ឋានន្តរស័ក្តិឧត្តមមន្ត្រី ថ្នាក់លេខ៤ ឲ្យកាន់មុខតំណែងជាអភិបាលរង នៃគណៈអភិបាលខេត្តកំពត ។ មានប្រសាសន៍សំណេះសំណាលនាពេលនេះឯ.ឧ សក់ សេដ្ឋា រដ្ឋលេខាធិ ការក្រសួងមហាផ្ទៃ តំណាងដ៍ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំអាជ្ញាធរខេត្តដែលសម្រេចបានសមិទ្ធិផល ធ្វើឲ្យមន្ត្រីរាជការគ្រប់លំដាប់ថ្នាក់កងកម្លាំងប្រដាប់អាវុធ និងប្រជាពលរដ្ឋទូទាំងខេត្តកំពតទាំងមូលដែលតែងបានរួមសាមគ្គីសហការគ្នា ក្នុងការអភិវឌ្ឍន៍មូលដ្ឋាន និងបម្រើសេវាសាធាណៈ ទាំងសេវាសំណូមពរ និងសេវាតម្រូវការជូនប្រជាពលរដ្ឋបានយ៉ាងល្អប្រសើរ ដែលគួរជាទីមោទនផងដែរ ។
ជាពិសេសបានចូលរួមថែរក្សា សន្តិសុខ សណ្ដាប់ធ្នាប់សង្គម ការជួយសង្គ្រោះប្រជាពលរដ្ឋពីគ្រោះធម្មជាតិនានា ដែលជាការរួមចំណែក យ៉ាងសំខាន់នៅក្នុងកិច្ចអភិវឌ្ឍន៍សង្គមជាតិ និងការកាត់បន្ថយភាពក្រីក្រជូនប្រជាពលរដ្ឋ ។
ឯ.ឧ សក់ សេដ្ឋាក៏បានថ្លែងបញ្ជាក់់ទៀតថា ៖ ការតែងតាំងការផ្លាស់ប្ដូរការផ្ទេរមុខតំណែង គឺជាដំណើរការធម្មតានៃនីតិវិធីស្របទៅតាមសហលក្ខន្តិកៈ មន្ត្រីរាជការស៊ីវិល ក្នុងមុខងារសាធារណៈរបស់ក្រសួង ស្ថាប័ននីមួយៗ នៃរាជរដ្ឋាភិ បាលកម្ពុជា គឺសំដៅធ្វើយ៉ាងណា ដើម្បីឆ្លើយតបទៅនឹងតម្រូវការចាំបាច់ ក្នុងការបម្រើសេវាសាធាណៈជូនប្រជាពលរដ្ឋឲ្យបានកាន់តែមានប្រសិទ្ធភាព និងបានប្រសើរឡើងថែមទៀត ។ ដូចនេះអាជ្ញាធរខេត្ត មន្ត្រីរាជការគ្រប់លំដាប់ថ្នាក់កងកម្លាំងប្រដាប់អាវុធទាំងអស់ ពិសេសលោកប៉ឹល កុសល ដែលទើបតែបានទទួលចូលកាន់មុខតំណែងអភិបាលរងខេត្ត នាពេលនេះ ត្រូវខិតខំរួមសហការសាមគ្គីគ្នាដើម្បីធ្វើការអភិវឌ្ឍន៍ និងបម្រើសេវាសាធារណៈជូនប្រជាពលរដ្ឋក្នុងខេត្តឲ្យបានកាន់តែរីកចម្រើន និងប្រសើរឡើងបន្ថែមទៀត ។
នៅក្នុងចំណុច ការបំរើសេវាសាធារណជូនប្រជាពលរដ្ឋ លោករដ្ឋលេខាធិការក្រសួងមហាផ្ទៃក៏បានរំលឹកឡើងវិញថា នៅពេលនេះយើងមានវត្តមាន មេភូមិ មេឃុំ ស្មៀនឃុំ ដូច្នេះយើងដឹងហើយថា កន្លងមកប្រជាពលរដ្ឋត្រូវការលក់ម៉ូតូក៏ប្រាប់មេភូមិ លក់គោក៏ទៅប្រាប់មេភូមិ លក់ដីក៏ទៅរកមេឃុំ ដូច្នេះការបំរើសេវាសាធារណ ជូនប្រជាពលរដ្ឋ របស់មន្ត្រីថ្នាក់ដឹកនាំក្នុងមូលដ្ឋានយើងមួយចំនួននៅមាន បាតុភាពមិនល្អក្នុងការបំរើសេវាសាធារណៈជូនប្រជាពលរដ្ឋធ្វើឲ្យប្រជាពលរដ្ឋ មានការថ្នាំងថ្នាក់ការបង់សេវាខុសពីប្រក្រតី ដោយមិនទាន់មានភាពយុត្តិធម៌ និងមានតម្លាភាពជូនប្រជាពលរដ្ឋបាន១០០%នោះនៅឡើយទេ ។
ដូច្នេះយើងត្រូវ រួមគ្នាគិតឡើងវិញនូវចំណុចណាដែលខ្វះខាតកន្លងមកត្រូវកែលំអរ ឡើងវិញ ហើយត្រូវបន្តរួមគ្នាថែរក្សាសុខសន្តិភាព ស្ថិរភាពនយោបាយ និងសណ្ដាប់ធ្នាប់សង្គម ពិសេសក្នុងខេត្តកំពតទាំងមូល សំដៅធានាបាននូវកំណើនសេដ្ឋកិច្ច តាមរយៈផលិតកម្មលើគ្រប់ផ្នែកគ្រប់វិស័យ ដើម្បីលើកកម្ពស់ជីវភាព រស់នៅរបស់ប្រជាជនឲ្យបានកាន់តែប្រសើរឡើងថែមទៀត៕
ចែករំលែកព័តមាននេះ