ខេត្តបន្ទាយមានជ័យ ៖ អគារខារ៉ាអូខេមួយកន្លែងឈ្មោះ «ហ្គោលថោន» ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ត្រូវគេប្រាប់ថា បានឆ្លងចរន្តអគ្គិសនី បណ្តាលឱ្យឆេះហុយផ្សែងពេញបន្ទប់…
ខេត្តបន្ទាយមានជ័យ ៖ អគារខារ៉ាអូខេមួយកន្លែងឈ្មោះ «ហ្គោលថោន» ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ត្រូវគេប្រាប់ថា បានឆ្លងចរន្តអគ្គិសនី បណ្តាលឱ្យឆេះហុយផ្សែងពេញបន្ទប់ កាលពីអំឡុងម៉ោង១១ព្រឹកថ្ងៃទី១០ មេសា ។
ក្នុងការពន្លត់ភ្លើងដែលឆេះក្នុងអគារដែលបិទជិតនេះ សមត្ថកិច្ចបានប្រើប្រាស់អេស្កាទ័រ១គ្រឿងទម្លុះជញ្ជាំង២កន្លែង ដើម្បីឱ្យរថយន្តពន្លត់អគ្គិភ័យចំនួន៤គ្រឿងរបស់ស្នងការដ្ឋាននគរបាលខេត្តបាញ់ទឹកពន្លត់ ប៉ុន្តែរហូតដល់ម៉ោង១ និង៣០នាទីរសៀលថ្ងៃដដែល នៅមិនទាន់ពន្លត់បានទាំងស្រុង និងបាត់ហុយនៅឡើយទេ ។ លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តថ្លែងថា មូលហេតុ
បណ្តាលឲ្យមានអគ្គិភ័យឆេះបន្ទប់ខារ៉ាអូខេខាងលើនេះ គឺមកពីឆ្លងចរន្តអគ្គិសនីផ្ទុះឆេះពិតានក្នុងអគារចំនួន៨បន្ទប់ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្ត ថ្លែងថា អគារខារ៉ាអូខេហ្គោលថោនខេធីវី ដែលត្រូវអគ្គិភ័យឆាបឆេះនេះ ក្រុមពន្លត់បានប្រើប្រាស់រថយន្តពន្លត់អគ្គិភ័យចំនួន៤គ្រឿងធ្វើអន្តរាគមន៍ ។ អាចថាជាសំណាងដែរ ដែលការឆេះនេះនៅពេលថ្ងៃ បើសិនជាពេលយប់វិញប្រហែលទាំងភ្ញៀវ និងនាងៗភ្នែកនៅកញ្ចឹងកមិនខាន ។ ទោះបីជាបែបណា ការត្រៀមបម្រើសេវានៅថ្ងៃបុណ្យចូលឆ្នាំខាងមុខ ក៏ជួបឧបសគ្គដែរ ៕
ចែករំលែកព័តមាននេះ