រាជធានីភ្នំពេញ ៖ នៅក្នុងប្រទេសកម្ពុជាស្ទើរតែមិនមានអ្នកចាប់អារម្មណ៍ប៉ុន្មានឡើយពីកីឡាស្គីទឹកកក ដោយសារតែកម្ពុជាមិនមែនជាប្រទេសធ្លាក់ព្រឹលទឹកកក និងមិនសូវមានទីលានទឹកកកដើម្បីឱ្យមហាជនផ្ដោតការចាប់អារម្មណ៍ ។ បើទោះជានៅទីតាំងមួយចំនួនមានការសាងសង់ទីលានទឹកកក ប៉ុន្តែគេនៅតែមើលឃើញថា ទីលានទាំងនោះបង្កើតឡើងដើម្បីតែបម្រើឱ្យអ្នកចង់ជិះលេងប៉ុណ្ណោះ ដោយគេចាត់ទុកថាជាការកម្សាន្ត…
រាជធានីភ្នំពេញ ៖ នៅក្នុងប្រទេសកម្ពុជាស្ទើរតែមិនមានអ្នកចាប់អារម្មណ៍ប៉ុន្មានឡើយពីកីឡាស្គីទឹកកក ដោយសារតែកម្ពុជាមិនមែនជាប្រទេសធ្លាក់ព្រឹលទឹកកក និងមិនសូវមានទីលានទឹកកកដើម្បីឱ្យមហាជនផ្ដោតការចាប់អារម្មណ៍ ។ បើទោះជានៅទីតាំងមួយចំនួនមានការសាងសង់ទីលានទឹកកក ប៉ុន្តែគេនៅតែមើលឃើញថា ទីលានទាំងនោះបង្កើតឡើងដើម្បីតែបម្រើឱ្យអ្នកចង់ជិះលេងប៉ុណ្ណោះ ដោយគេចាត់ទុកថាជាការកម្សាន្ត ហើយមិនបានគិតថាសកម្មភាពជិះស្គីទឹកកកដែលគិតលុយជាវិនាទី និងម៉ោងពេលនោះ គឺជាប្រភេទកីឡាឡើយ។
មិនមែនជាឆ្នាំដំបូងនោះទេ ដែលសហព័ន្ធកីឡាស្គីទឹកកកកម្ពុជាបានបើកដំណើរការ ប៉ុន្តែបើនិយាយពីការចាប់អារម្មណ៍ស្ទើរមិនមានតែម្ដង ដោយសារតែកីឡាប្រភេទនេះមិនសូវផុសផុល ហើយអាចមកពីមនុស្សភាគច្រើនយល់ថាកម្ពុជាជាប្រទេសមិនមានទឹកកក និងទីលានទឹកកក មិនគួរនឹងមានវត្តមានកីឡាប្រភេទនេះលេចឡើងឡើយ ។
បើទោះជាសហព័ន្ធទាំងមូល បានប្រឹងប្រែងបណ្ដុះបណ្ដាលកីឡាករកីឡាការិនីឱ្យក្លាយជាអ្នកជំនាញខាងសម្ដែង និងបញ្ចេញក្បាច់លើទឹកកក ដែលគេហៅថាជាទម្រង់នៃវិញ្ញាសាកីឡាស្គីទឹកកកយ៉ាងណាក៏ដោយ ក៏អ្នកជំនាញទាំងនោះស្ទើរមិនមានការចាប់អារម្មណ៍ ឬមិនមានអ្នកចង់ដឹង ជាពិសេសក្នុងពេលដែលសកម្មភាពទាំងមូលមិនមានការផ្សព្វផ្សាយឱ្យទូលំទូលាយផង ។ យុវវ័យច្រើននាក់ក៏មិនសូវផ្ដោតការចាប់អារម្មណ៍ទៅលើការហ្វឹកហាត់កីឡានេះដែរ ដោយសារតែការលេងស្គីគឺសម្រាប់តែកូនអ្នកមានទ្រព្យធន ហើយអ្នកលេងទាំងនោះមិនមែនជាអ្នកចង់ក្លាយជាកីឡាករឬកីឡាការិនីដើម្បីប្រកួតប្រជែង។
ស្របគ្នាដែលកន្លែងជិះស្គីទឹកកកមិនមានច្រើនធ្វើឱ្យអ្នកចង់ហ្វឹកហាត់ក៏មិនមានច្រើនព្រោះតែឆ្ងាយ និងចំណាយលុយច្រើន ខណៈដែលកីឡាមួយនេះក៏ត្រូវគេចាត់ទុកជាល្បែងកម្សាន្តដ៏គ្រោះថ្នាក់សម្រាប់ការហាត់សមដំបូងៗ ដែលត្រូវបានឪពុកម្ដាយភាគច្រើនមិនលើកទឹកចិត្តឱ្យហ្វឹកហាត់ ។ យ៉ាងណាមិញ សហព័ន្ធកីឡាស្គីទឹកកក ដែលនៅតែត្រដាបត្រដួសខិតខំបង្វែរអារម្មណ៍មហាជនឱ្យចាប់អារម្មណ៍នឹងកីឡាមួយនេះ ដោយបានទាំងប្រមូលផ្ដុំយុវវ័យក្មេងៗហ្វឹកហាត់ឱ្យក្លាយជាកីឡាករកីឡាការិនីកាន់តែច្រើនធ្វើឱ្យកីឡាស្គីទឹកកកក្លាយជាចំណាប់អារម្មណ៍កាន់តែប្រសើររបស់យុវវ័យខ្មែរនាពេលចុងក្រោយផងដែរ ។ ជាក់ស្ដែង មុននេះបន្តិចសហព័ន្ធកីឡាស្គីទឹកកកកម្ពុជា បានចំណាយការរៀបចំព្រឹត្តិការណ៍ប្រកួតស្វែងរកកីឡាករល្អៗប្រចាំសហព័ន្ធដើម្បីបណ្តុះបណ្ដាលឱ្យក្លាយជាជើងខ្លាំងត្រៀមប្រកួតនៅក្រៅប្រទេស។
មានការលើកឡើងថា កីឡាស្គីទឹកកកនឹងមិនមានជីវិតរស់នៅកម្ពុជានោះទេប្រសិនបើកីឡាករដែលជម្រើសបានមិនត្រូវបានបញ្ជូនឱ្យចេញប្រកួតនៅក្រៅប្រទេស នៅក្នុងកាលៈទេសៈដែលកម្ពុជាក៏មិនសូវមានការចាប់អារម្មណ៍ចំពោះការជិះស្គីទឹកកក ដោយសារវាមិនមែនជាកីឡាដែលអំណោយផលសម្រាប់អ្នកក្រ ឬអ្នកមធ្យម ព្រោះតែអ្នកចង់ហ្វឹកហាត់កីឡាមួយនេះត្រូវចំណាយអស់ច្រើនទម្រាំតែថ្នឹកនឹងលំនឹងជិះស្គីទឹកកក ។
តាមការរៀបរាប់ពីមន្ត្រីពាក់ព័ន្ធ កីឡាករកីឡាការិនីត្រូវបានជម្រើសចេញភាគច្រើនពីអ្នកចូលចិត្តជិះស្គីលេងលើទឹកកក ហើយមួយចំនួនផ្សេងទៀត គឺកីឡាករកីឡាការិនីទាក់ទាញឱ្យចូលមកប្រកួតទើបធ្វើឱ្យសហព័ន្ធទាំងមូលសន្សំកីឡាករកីឡាការិនីជើងខ្លាំងៗបានច្រើន ។ ប៉ុន្តែក៏មានការបារម្ភជុំវិញកីឡាករមួយចំនួនដែលមិនអាចតស៊ូជាមួយសហព័ន្ធបានយូរផងដែរ ជាពិសេសកីឡាករកីឡាការិនីដែលត្រូវជ្រើសរើសហើយមិនមានឈ្មោះបានចេញទៅប្រកួតនៅក្រៅប្រទេស ឬមិនត្រូវបានបញ្ជូនឱ្យចេញហ្វឹកហាត់ក្រៅប្រទេសព្រោះតែតម្រូវការចេញក្រៅមានកំណត់។
កញ្ញា ឡុង សុធារី អគ្គលេខាធិការសហព័ន្ធកីឡាស្គីទឹកកកកម្ពុជាបានឲ្យដឹងថា ការប្រកួតជ្រើសរើសជើងឯកស្គីទឹកកកប្រចាំឆ្នាំ២០១៨ដែលទើបតែបានបញ្ចប់មុននេះមានអ្នកចូលរួមប្រកួតរហូតដល់៤០នាក់ ដោយអ្នកដែលបានបង្ហាញខ្លួនក៏មានសមត្ថភាពចេះជិះស្គីទឹកកកបានល្អផងដែរ ដោយសារតែកីឡាករកីឡាការិនីទាំងនោះគាត់មានលទ្ធភាពហ្វឹកហាត់ជិះលេងតាំងពីមិនទាន់ត្រូវបានជ្រើសរើសចូលប្រកួត និងបន្ទាប់ពីយកមកបង្វឹកបន្ថែមឱ្យត្រូវការចង់បានរបស់សហព័ន្ធស្គីទឹកកកអន្តរជាតិ។
វិញ្ញាសាដែលបានដាក់ឲ្យប្រកួតសសម្រាប់ឆ្នាំនេះមានច្រើនជាងឆ្នាំមុនៗ ហើយក៏បានបន្ថែមវិញ្ញាសាអន្តរជាតិកម្រិតខ្ពស់មួយចំនួនផងដែរដើម្បីឱ្យគណៈកម្មការ និងចៅក្រមមកពីក្រៅប្រទេសងាយស្រួលក្នុងការកាត់ក្តីជ្រើសរើសអ្នកប្រកួតឱ្យតំណាងកម្ពុជាបានចេញទៅប្រកួតនៅក្រៅប្រទេស ។ កញ្ញាថា ការប្រកួតឆ្នាំនេះអ្នកជាប់លេខ១ នឹងត្រូវបានបញ្ជូនចេញក្រៅ ហើយតម្រូវឱ្យចេញទៅហ្វឹកហាត់ក្រៅប្រទេស ដែលកញ្ញាបានហៅឱកាសនេះថាជាការជំរុញឱ្យសហព័ន្ធកីឡាស្គីទឹកកក ឬកីឡាជិះស្គីទឹកកក មានការផុសផុលឡើង និងមានការចាប់អារម្មណ៍ជាងមុន ។
កញ្ញានិយាយថា ដើម្បីបញ្ជ្រាបឱ្យអ្នកចូលរួមប្រកួតបានដឹងពីទម្រង់កីឡាស្គីអន្តរជាតិ ការប្រកួតឆ្នាំនេះ សហព័ន្ធបានដាក់បញ្ចូលវិញ្ញាសាអន្តរជាតិកម្រិតខ្ពស់ដើម្បីឲ្យក្រុមជម្រើសជាតិប្រកួតប្រជែងពង្រឹងគុណភាពឆ្ពោះទៅចូលរួមព្រឹត្តិការណ៍អន្តរជាតិនានា។ វិញ្ញាសាអន្តរជាតិកម្រិតខ្ពស់នេះ មានកីឡាករ-កីឡាការិនីចូលរួម១០រូបដែលត្រូវសម្រេចជ្រើសរើសដោយចៅក្រមអាជ្ញាកណ្តាលអន្តរជាតិ ហើយអ្នកប្រកួតត្រូវបានផ្ដល់ពិន្ទុដោយអាជ្ញាកណ្ដាល និងចៅក្រុមចំនួន៦នាក់មកពីប្រទេសម៉ាឡេស៊ី ឥណ្ឌូណេស៊ី ជប៉ុន កូរ៉េខាងត្បូង និងថៃ ដែលឡូយជាងមុន ។ ក្រៅពីទទួលបានលទ្ធផលទៅតាម
ប្រភេទវិញ្ញាសានីមួយៗ សហព័ន្ធរកឃើញយុវជន២នាក់ដែលលេចធ្លោជាងគេនឹងចេញទៅប្រកួតអន្តរជាតិនៅប្រទេសអូស្ត្រាលីនាពេលខាងមុខ ។ អ្នកឈ្នះតំណែងដែលគួរឱ្យចាប់អារម្មណ៍នោះ គឺកីឡាករវ័យក្មេង ពន្លឺ សុទ្ធ និងយុវតី ហេង សិរីយ៉ា ដោយអ្នកទាំងពីរនឹងតំណាងឲ្យកម្ពុជាចេញទៅប្រកួតនៅប្រទេសអូស្ត្រាលី ចាប់ពីថ្ងៃទី១២-២០ ខែឧសភា ឆ្នាំ២០១៨ ខាងមុខ ។
កញ្ញាបានហៅការបោះជំហានរបស់កីឡាករ-កីឡាការិនីទាំង២ថា ជាឱកាសជួយឱ្យសហព័ន្ធទាំងមូលមានការចាប់អារម្មណ៍ឡើងវិញពីយុវវ័យដែលចង់ក្លាយជាអ្នកជំនាញជិះស្គីទឹកកក បើទោះជាកីឡាមួយនេះមិនសូវត្រូវបរិបទនៅកម្ពុជា និងត្រូវបានគេចាត់ទុកថាជាកីឡាថ្មីនៅកម្ពុជា ។ យ៉ាងណាមិញ កញ្ញាថា កីឡានេះនៅក្រៅប្រទេស ពោលគឺប្រទេសដែលមិនមានទីលានទឹកកកធម្មជាតិ មិនមានទឹកកកធ្លាក់ ក៏មានការរីកចម្រើនផងដែរ ទើបកញ្ញារំពឹងថាមិនពិបាកនោះទេក្នុងការធ្វើឱ្យកីឡាមួយនេះឈានឡើងឱ្យតែមានសហព័ន្ធនៅអន្តរជាតិជ្រោមជ្រែងយកកីឡាករពីកម្ពុជាចេញប្រកួតឱ្យបានច្រើនទៅគឺជោគជ័យហើយ៕
ចែករំលែកព័តមាននេះ