ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនខេត្តបានចូលរួមសហការពីកម្លាំងការិយាល័យអនុវត្តនីតិវិធី និងកម្លាំងអធិការដ្ឋាននគរបាលក្រុងសៀមរាបក្រោមការដឹកនាំបញ្ជាផ្ទាល់របស់លោកឧត្តមសេនីយ៍ត្រី អ៊ុំ អមរា ស្នងការរងទទួលផែនប្រឆាំងបទល្មើសដោយមានការសម្របសំរួលពីលោក សំរិទ្ធ សុខុន ព្រះរាជអាជ្ញារង អមសាលាដំបូងខេត្តសៀមរាបបានចុះបង្ក្រាបករណីរក្សាទុក ចាត់ចែង និងប្រើប្រាស់ដោយខុសច្បាប់នូវសារធាតុញៀន រហូតឈានដល់ធ្វើការឃាត់ខ្លួនបានជនសង្ស័យប្រុសស្រីចំនួន៥នាក់ ។ ការចុះប្រតិបត្តិការដ៏ក្តៅគគុកដូចភ្លៀងរលឹមនោះបានធ្វើឡើងនៅវេលាម៉ោង១១និង៥០នាទីយប់ ថ្ងៃទី០៩ ខែមេសា ឆ្នាំ២០១៨ ក្នុងភោជនីយ៍ដ្ឋាន SOUL TRAIN REGGAE BAR ស្ថិតនៅភូមិមណ្ឌល១ សង្កាត់ស្វាយដង្គំ ក្រុង/ខេត្តសៀមរាប ។
លោកឧត្តមសេនីយ៍ត្រី អ៊ុំ អមរា ស្នងការរងទទួលផែនប្រឆាំងបទល្មើសបានប្រាប់ថា ជនសង្ស័យចំនួន០៥នាក់ ដែលសមត្ថកិច្ចឃាត់ខ្លួនបាននោះមាន ទី១-ឈ្មោះ RACHEL DENISE PRINS ភេទស្រី ជនជាតិអូស្ត្រាលី កាន់លិខិតឆ្លងដែនលេខPA6318712 មុខរបរម្ចាស់ហាង SOUL TRAIN REGGAE BAR សព្វថ្ងៃស្នាក់នៅផ្ទះជួលភូមិកក្រាញ់ សង្កាត់ សៀមរាប ក្រុង ខេត្តសៀមរាប (រក្សាទុក និងជួញដូរ មានសារធាតុញៀនក្នុងខ្លួន, ទី២-ឈ្មោះ យ៉ា ជា ហៅចេឌី ភេទប្រុស មុខរបរម្ចាស់ហាង SOUL TRAIN REGGAE BAR ទីលំនៅភូមិកក្រាញ់ សង្កាត់សៀមរាប ក្រុង ខេត្តសៀមរាប (រក្សាទុកនិងជួញដូរមានសារធាតុញៀនក្នុងខ្លួន), ទី៣-ឈ្មោះ សុខ មនិច ហៅស៊ីឡូ ភេទស្រី មុខរបរបុគ្គលិកហាង ទីលំនៅភូមិវត្តស្វាយ សង្កាត់សាលាកំរើក ក្រុង ខេត្តសៀមរាប (ជួញដូរគ្មានសារធាតុញៀនក្នុងខ្លួន), ទី៤-ឈ្មោះ ផេង វីណា ភេទប្រុស មុខរបរបុគ្គលិកហាង ទីលំនៅភូមិវត្តស្វាយ សង្កាត់សាលាកំរើក ក្រុង-ខេត្តសៀមរាប (ជួញដូរ គ្មានសារធាតុញៀនក្នុងខ្លួន) និងទី៥-ឈ្មោះ ពេជ្រ សំណាង ភេទប្រុស មុខរបរបុគ្គលិកហាង ទីលំនៅភូមិគោកដូង សង្កាត់ទឹកវិល ក្រុង-ខេត្តសៀមរាប (ជួញដូរ គ្មានសារធាតុញៀនក្នុងខ្លួន) ។
លោកបានបញ្ជាក់ថា ក្រោយសមត្ថកិច្ចជំនាញយើងបានឃាត់ខ្លួនក្នុងនោះដកហូតបានវត្ថុតាងរួមមាន កញ្ឆាក្រៀមចំនួន០៧កញ្ចប់ស្មើនឹងទំងន់ ២១,៥២ក្រាម (ទំងន់សុទ្ធ), កញ្ឆាមូរជាបារីចំនួន២៥ដើម, ដើមកញ្ឆាត្រាំជាមួយស្រាចំនួន១០ដប, ដើមកញ្ឆាស្រស់ចំនួន០១ថង់, ដើមកញ្ឆាស្ងោររួចចំនួន០១ថង់, ទឹកកញ្ឆាចំនួន០២ដប, និងទូរស័ព្ទចំនួន០៣គ្រឿង ។ បច្ចុប្បន្នជនសង្ស័យប្រុសស្រីទាំង៥នាក់ និងវត្ថុតាងត្រូវបានកម្លាំងជំនាញរៀបចំកសាងសំណុំរឿងបញ្ចូនទៅសាលាដំបូងដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ