រាជធានីភ្នំពេញ ៖ បើទោះបីជាអ្នកនាងម៉ៅ ស៊ីណាត មើលសភាពខាងក្រៅឃើញសើចញញឹមញញែម ប៉ុន្តែបើដឹងសាច់រឿងជីវិតឯកជនរបស់នាងនឹងនឹកអាណិតដល់នាង ។ ជីវិតប្រចាំថ្ងៃរបស់នាងមានសភាពស្រងេះស្រងោច ។ អ្នកនាងម៉ៅ…
រាជធានីភ្នំពេញ ៖ បើទោះបីជាអ្នកនាងម៉ៅ ស៊ីណាត មើលសភាពខាងក្រៅឃើញសើចញញឹមញញែម ប៉ុន្តែបើដឹងសាច់រឿងជីវិតឯកជនរបស់នាងនឹងនឹកអាណិតដល់នាង ។ ជីវិតប្រចាំថ្ងៃរបស់នាងមានសភាពស្រងេះស្រងោច ។
អ្នកនាងម៉ៅ ស៊ីណាត បានចាត់ទុកខ្សែជីវិតរបស់ខ្លួនរងសម្ពាធខ្លាំងណាស់ បើអ្នកចិត្តស្រាលល្មមៗ ពិបាកប្រឈម ។ កាលពីពេល ថ្មីៗកន្លងមកតារាចម្រៀងម៉ៅ ស៊ីណាតនិយាយថា «រយៈពេលជិត២ឆ្នាំចុងក្រោយនេះ នាងខ្ញុំពើបប្រទះក្នុងឆាកជីវិតលំបាកច្រើនស្ទើរតែឆ្អែតក្នុងជាតិនេះ ។ រយៈពេលខ្ញុំលំបាកនាងខ្ញុំដឹងច្បាស់ណាស់ អ្នកណាល្អ អ្នកណាស្អប់នាងខ្ញុំស្រឡាញ់នាងខ្ញុំ ។ ចំពោះអ្នកដែលធ្វើអ្វីលើនាងខ្ញុំទាំងប៉ុន្មាន ច្បាស់ជាដឹងហើយ នាងខ្ញុំមិនបន្ទោសទេ នេះជាកម្មរបស់នាងខ្ញុំ ។
ពេលនាងខ្ញុំឡើងកូដរកលុយបាន អ្នកនៅជុំវិញនាងខ្ញុំបានផ្តល់ជូននូវសេចក្តីសុខច្រើនណាស់ អត់គិតអ្វីទាំងអស់ ។ ប៉ុន្តែគ្រាន់តែនាងខ្ញុំចាកចេញពីស្វាមីមុនអស់ទ្រព្យអស់ប្រាក់មក បាត់អស់ ។ គួរសង្វេគទៀតអំឡុងពេលនាងខ្ញុំមានកូនម្នាក់ទៀត មិនមានគេជិតដិតនៅយកចិត្តឱ្យអស់ពីពោះនោះឡើយ ។ នាងខ្ញុំមិនបន្ទោសអ្នកណាទាំងអស់ក្នុងជាតិនេះ គ្រាន់តែម៉ៅ ស៊ីណាត ជាមនុស្សម្នាក់ដូចខ្លួនមួយ អុីចឹងហើយចង់បញ្ជាក់ថា នារីម្នាក់នេះតស៊ូពង្រឹងជំហរបន្តទៀតគ្មានអ្វីនឹងចុះថយទៀតទេ ។ នាងខ្ញុំនឹងពុះពារឡើងវិញដើម្បីកូនទាំង២ ក្រោយកាន់តែដឹងច្បាស់គ្រប់រូបភាពដែលគេធ្វើដាក់នាងខ្ញុំ ។
ម៉ៅ ស៊ីណាត មិនដួលទេ បើថ្ងៃក្រោយជីវិត១នេះចប់ទៅ ក៏មិនពឹងគេដែរ ជីវិតមានតែកូនទាំង២ ព្រោះនាងខ្ញុំយល់ច្បាស់ហើយពេលលំបាកគ្មានអ្នកណាមើលឡើយ សូម្បីតែបងប្អូនគឺសោះអង្គើយណាស់ធ្វើដូចអ្នកដទៃ »។
មួយរយៈចុងក្រោយនេះអ្នកនាងម៉ៅ ស៊ីណាត ចេញមុខក្នុងពិភពសិល្បៈវិញតាមរយៈកម្មវិធីកម្សាន្តនានារបស់ស្ថានីយទូរទស្សន៍ ធំៗ ។ លើសពីនេះនាងបានចូលរួមសកម្មភាពនានាក្នុងសង្គម ដូចជាកម្មវិធីបរិច្ចាគឈាម និងកម្មវិធីផ្សព្វផ្សាយនានាជាមួយសិស្សនិស្សិតតាមសាកលវិទ្យាល័យនានា ៕
ចែករំលែកព័តមាននេះ