រាជធានីភ្នំពេញ ៖ គម្រោងផ្លូវរថភ្លើងដឹកអ្នកដំណើរពីភ្នំពេញ-ព្រលានយន្តហោះអន្តរជាតិ ប្រវែងប្រហែល១០គីឡូម៉ែត្រ ដែលមហាជនទន្ទឹងរង់ចាំមើលសមិទ្ធផលជាស្នាដៃរបស់ក្រសួងសាធារណការ និងដឹកជញ្ជូន ពេលនេះបានប្រកាសដាក់ឲ្យដំណើរការជាបណ្ដោះអាសន្ន ដូចបានសន្យាកន្លងមកហើយ កាលពីព្រឹកថ្ងៃទី១០ មេសា…
រាជធានីភ្នំពេញ ៖ គម្រោងផ្លូវរថភ្លើងដឹកអ្នកដំណើរពីភ្នំពេញ-ព្រលានយន្តហោះអន្តរជាតិ ប្រវែងប្រហែល១០គីឡូម៉ែត្រ ដែលមហាជនទន្ទឹងរង់ចាំមើលសមិទ្ធផលជាស្នាដៃរបស់ក្រសួងសាធារណការ និងដឹកជញ្ជូន ពេលនេះបានប្រកាសដាក់ឲ្យដំណើរការជាបណ្ដោះអាសន្ន ដូចបានសន្យាកន្លងមកហើយ កាលពីព្រឹកថ្ងៃទី១០ មេសា ម្សិលមិញ ។
ថ្លែងក្នុងពិធីដាក់ឱ្យដំណើរការសាកល្បងនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន មានប្រសាសន៍ថា ព្រឹកនេះ ជាថ្ងៃប្រវត្តិសាស្ត្រដែលរាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន បានដាក់ដំណើរការជាបណ្តោះអាសន្ននូវរថភ្លើងដឹកអ្នកដំណើរភ្នំពេញ-ព្រលានយន្តហោះអន្តរជាតិភ្នំពេញ ។
លោកទេសរដ្ឋមន្ត្រី លើកឡើងជាសំណួរថា ៖« ហេតុអ្វីបានជាដាក់ឱ្យដំណើរការជាបណ្តោះអាសន្ន គឺដោយសារយើងប្រើប្រាស់រថភ្លើងដែលមានស្រាប់ ប្រើរថភ្លើងចាស់សាកល្បងសិន នៅពេលដំណើរការស្រួលបួល យើងនឹងអញ្ជើញសម្តេចតេជោ ហ៊ុន សែន ដាក់ឱ្យប្រើប្រាស់ជាផ្លូវការ ហើយពេលនោះ យើងមានរថភ្លើងថ្មី៣គ្រឿងនឹងមកដល់កម្ពុជាយើង ដែលបានដំឡើងនៅប្រទេសម៉ិកសុិក » ។
លោកបន្តថា ៖« ខ្ញុំខិតខំប្រឹងប្រែងដែរថា ឱ្យយកមក១គ្រឿងឱ្យបានដើម្បីដាក់ដំណើរការ តែដោយសារមានបញ្ហារញ្ជួយផែនដីនៅប្រទេសម៉ិកស៊ិក ទាំង៣គ្រឿងនេះមានការខូចខាតខ្លះត្រូវធ្វើឡើងវិញ ជាហេតុធ្វើឱ្យមានភាពយឺតយ៉ាវ តែអាចមកដល់កម្ពុជាយើងនៅក្នុងខែឧសភា ឬមិថុនាខាងមុខ នឹងដាក់ឱ្យដំណើរការរថភ្លើងទាំង៣នេះ » ។
បើតាមការបញ្ជាក់ពីលោកទេសរដ្ឋមន្ត្រី រថភ្លើងដឹកអ្នកដំណើរអាចផ្ទុកមនុស្សបានទាំងអង្គុយ និងឈរប្រមាណ១០០នាក់ ដែលអនុញ្ញាតឲ្យធ្វើដំណើរដោយឥតគិតថ្លៃ ចាប់ពីថ្ងៃទី១០ ខែមេសា រហូតដល់ថ្ងៃទី៣១ ខែកក្កដា ឆ្នាំ២០១៨ ។
លោក ទេសរដ្ឋមន្ត្រី ស៊ុន ចាន់ថុល បានថ្លែងថា ៖« រថភ្លើងដឹកអ្នកដំណើរនេះចំណាយពេលប្រមាណពី២២ទៅ៣០នាទី ចេញដំណើរពីស្ថានីយរថភ្លើងភ្នំពេញ ទៅព្រលានយន្តហោះ និងប្រតិបត្តិការ២៤ម៉ោងក្នុង១ថ្ងៃ ៧ថ្ងៃក្នុង១សប្ដាហ៍ ដោយចន្លោះនៃការចេញដំណើរទៅមកប្រហែល២៥ទៅ៣០នាទីម្ដង » ។
តាមសេចក្តីប្រកាសរបស់ក្រុមហ៊ុនរ៉ូយ៉ាល់រេលវេ ឱ្យដឹងថា រថភ្លើងថ្មីល្បឿនលឿនរបស់ក្រុមហ៊ុនរ៉ូយ៉ាល់រេលវេ នឹងត្រូវបញ្ជូនពីប្រទេសម៉ិកស៊ិកមកដល់ប្រទេសកម្ពុជាក្នុងរយៈពេល២ខែទៀត ហើយនឹងចាប់ផ្តើមដំណើរការនៅខែមិថុនា ខាងមុខ ។ រថភ្លើងដើរដោយថាមពលប្រេងម៉ាស៊ូតទាំង៣គ្រឿងនេះ នឹងធ្វើដំណើរចេញពីស្ថានីយបច្ចុប្បន្ន ដែលជាស្ថានីយរថភ្លើងមជ្ឈិម ហើយបន្តដំណើរតាមផ្លូវដែកចម្បងមានស្រាប់ប្រវែង៨,៤គីឡូម៉ែត្រ រួចបត់តាមផ្លូវដែកដែលស្របតាមផ្លូវ១០៥K មានប្រវែង១,៦គីឡូម៉ែត្រ ។
សេចក្តីប្រកាសដដែលបន្តថា គិតជាសរុបផ្លូវរថភ្លើងទាំង៣គ្រឿងនេះចំណាយពេល២៥នាទីប៉ុណ្ណោះ ដើម្បីដឹកជញ្ជូនអ្នកដំណើរតាមផ្លូវដែក ដែលមានប្រវែងសរុប១០គីឡូម៉ែត្រទៅមករវាងរាជធានីភ្នំពេញ និងព្រលានយន្តហោះ។ ប្រការល្អ គឺរថភ្លើងថ្មីដែលនឹងត្រូវបញ្ជូនមកដល់ស្រុកយើងក្នុងខែមិថុនាខាងមុខ ត្រូវបានផលិតឡើងតាមស្តង់ដាបច្ចេកវិទ្យារបស់សមាគមផ្លូវដែកអាមេរិកាំង ដែលពិភពលោកទាំងមូលទទួលស្គាល់ ពោលគឺរថភ្លើងនីមួយៗមានក្បាលម៉ាស៊ីន២ មុខ១ក្រោយ១ និងបានបំពាក់ដោយបច្ចេកវិទ្យាចុងក្រោយប្រកបដោយសុវត្ថិភាពមានកៅអីដូចនៅក្នុងយន្តហោះ ដែលអាចបត់បែន និងកែតម្រូវទៅតាមចិត្តចង់, មានបន្ទប់ទឹក, មានម៉ាស៊ីនត្រជាក់ពេញលេញ, ទ្វារស្វ័យប្រវត្តិ, កន្លែងដាក់អីវ៉ាន់នៅខាងលើក្បាលអ្នកដំណើរ និងនៅបាតរថភ្លើង, Wifi, ទូរទស្សន៍, ប្រព័ន្ធផ្តល់ព័ត៌មានតាមវីដេអូ និងអាចបើកក្នុងល្បឿនជាអតិបរិមា៨០គីឡូម៉ែត្រក្នុង១ម៉ោង ជាមួយនឹងសមត្ថភាពអាចដឹកអ្នកដំណើររហូតដល់ទៅ៥៦នាក់ ។
បើតាមលោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានថ្លែងថា ការមានផ្លូវរថភ្លើងនេះ ជាការជួយសម្រួលបញ្ហាចរាចរណ៍ ដែលកំពុងកកស្ទះនៅទីក្រុងភ្នំពេញ ហើយវាជួយលើកកម្ពស់សោភ័ណភាពក្នុងទីក្រុងផងដែរ ។ លោកបន្តថា ការវិនិយោគបែបនេះ មិនត្រឹមតែផ្តល់ផលចំណេញដល់បញ្ហាចរាចរណ៍ទេ តែក៏រួមចំណែកកាត់បន្ថយផលប៉ះពាល់បរិស្ថាន និងកាត់បន្ថយអត្រាគ្រោះថ្នាក់ចរាចរណ៍ផងដែរ ៕
ចែករំលែកព័តមាននេះ