រាជធានីភ្នំពេញ ៖ បុរសម្នាក់ស្រវឹងស្រាទើបតែចេញមកពីខួបកំណើតមិត្តភក្តិបានដើរទៅរករឿងប្រពន្ធនៅកន្លែងធ្វើការបារាំង ដល់អត់ឃើញប្រពន្ធបានស្រែកឡូឡានៅមុខហាង ស្រាប់តែមានបុរសម្នាក់
ទៀត ស្រវឹងស្រាដូចគ្នាបានសួរនាំ ហើយដកកាំភ្លើងបាញ់ចំនួន២គ្រាប់ ហើយជិះម៉ូតូចេញទៅបាត់ បង្កឲ្យមានការភ្ញាក់ផ្អើលកាលពីវេលាម៉ោង៤និង៤០នាទីទាបភ្លឺថ្ងៃទី១១ ខែមេសា ឆ្នាំ២០១៨ តាមបណ្តោយផ្លូវ១៣៦កែងផ្លូវលេខ៥ ស្ថិតនៅក្នុងសង្កាត់ផ្សារកណ្តាល១ ខណ្ឌដូនពេញ ។
ជនរងគ្រោះមានឈ្មោះ ឈាវ វណ្ណា ភេទប្រុស អាយុ២៤ឆ្នាំ ស្នាក់នៅផ្ទះលេខ៥ ផ្លូវ១៣០ សង្កាត់ផ្សារចាស់ ខណ្ឌដូនពេញ ។ ចំណែកជនបង្កមិនស្គាល់អត្តសញ្ញាណជិះម៉ូតូ SL ពណ៌ខ្មៅ គេចខ្លួនបាត់ ។
តាមប្រភពព័ត៌មានពីជនរងគ្រោះបានរៀបរាប់ប្រាប់ឲ្យដឹងថា មុនពេលកើតហេតុខ្លួនទើបតែចេញមកពីខួបកំណើតមិត្តភក្តិនៅខារ៉ាអូខេរ៉ូម៉ាតិច លុះពេលដល់ម៉ោងកើតហេតុខាងលើ ក្នុងស្ថានភាពស្រវឹងស្រាក៏បានដើរទៅរកប្រពន្ធដែលធ្វើការនៅបារបារាំង ស្ថិតនៅតាមផ្លូវ១៣៦កែងផ្លូវលេខ៥ ។ ពេលទៅដល់កន្លែងធ្វើការគាត់បានសួរសន្តិសុខយាមនៅទីនោះថា ឃើញប្រពន្ធគាត់អត់ ហើយសន្តិសុខប្រាប់ថា ប្រពន្ធគាត់អត់នៅទេ ចេញទៅក្រៅបាត់ហើយ គ្រាន់តែដឹងថា ប្រពន្ធចេញទៅក្រៅបាត់ហើយ គាត់ខឹងក៏ស្រែកឡូឡាពេញមុខហាង ស្របពេលនោះស្រាប់តែមានបុរសម្នាក់ទៀត ជាជនបង្កមិនស្គាល់អត្តសញ្ញាណដើរចេញពីក្នុងហាងផឹកស៊ីក្បែរនោះ បានដើរទៅសួរជនរងគ្រោះថា អូនមានរឿងអីបានជាស្រែកឡូឡាពេញផ្លូវអញ្ចឹង ពេលនោះគាត់បាននិយាយថា ចេះដឹងអី ធ្វើឲ្យជនបង្កខឹងដកកាំភ្លើងខ្លីចេញពីចង្កេះបាញ់ឡើងលើចំនួន២គ្រាប់ បង្កឲ្យមានការភ្ញាក់ផ្អើលដល់សមត្ថកិច្ចស្រាវជ្រាវជុំវិញកន្លែងកើតហេតុ រកឃើញទាំង២គ្រាប់ សំណាងល្អហើយ ដែលមិនមានអ្នករងរបួស ។
ចំណែកឯជនបង្កជិះម៉ូតូម៉ាក SL ពណ៌ខ្មៅមិនចាំស្លាកលេខគេចខ្លួនបាត់ស្រមោល ។
ក្រោយពេលកើតហេតុជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍ផ្សារកណ្តាល១ ដើម្បីឲ្យសមត្ថកិច្ចស្រាវជ្រាវតាមចាប់ជនដៃដល់មកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ