សាលាពេទ្យភូមិភាគនិមន្តព្រះសង្ឃ សូត្រមន្តលើករាសីអបអរសង្ក្រាន្តឆ្នាំថ្មី
- កំពត
ខេត្តកំពត ៖ ដើម្បីអបអរសាទរសង្ក្រាន្តឆ្នាំថ្មី ឆ្នាំច សំរិទ្ធស័ក ព,ស២៥៦២ ត្រូវនឹងថ្ងៃទី១៤ ខែមេសា ឆ្នាំ ២០១៨…
ខេត្តកំពត ៖ ដើម្បីអបអរសាទរសង្ក្រាន្តឆ្នាំថ្មី ឆ្នាំច សំរិទ្ធស័ក ព,ស២៥៦២ ត្រូវនឹងថ្ងៃទី១៤ ខែមេសា ឆ្នាំ ២០១៨ ដែលកាន់តែខិតឈានចូលមកដល់នាពេលខាងមុខឆាប់ៗនេះ។ នៅថ្ងៃ១០រោច ខែចេត្រ ឆ្នាំរកា នព្វស័ក ព,ស២៥៦១ ត្រូវនឹងថ្ងៃទី១០ ខែមេសា ឆ្នាំ២០១៨នេះ ចាប់តាំងពីម៉ោង៨ព្រឹក រហូតដល់ពេលល្ងាច នៅក្នុងបរិវេណសាលាពេទ្យភូមិភាគ ស្ថិតនៅក្នុងភូមិកំពង់បាយខាងជើង សង្កាត់កំពង់បាយ ក្រុងកំពត។ នាយកគ្រប់គ្រងសាលា បានធ្វើពិធីសង្ក្រាន្តដើម្បីបង្កភាពសប្បាយ រីករាយដល់សិស្ស និស្សិតសាលា ពេទ្យភូមិភាគដែលកំពុងបំពេញការសិក្សាជំនាញពេទ្យនៅសាលា ខាងលើ។
បើតាមកម្មវិធីដែលបានព្រៀងទុកគឺពេលព្រឹកវេលាម៉ោង៨និមន្ត ព្រះសង្ឃសូត្រមន្ត ចម្រើនព្រះបរិត្ត បង្សុកូល ដើម្បីបណ្តេញឧបទ្រពចង្រៃឆ្នាំចាស់ចេញឲ្យអស់ ទទួលយកពរសព្វសាធុការ ទេវតាឆ្នាំថ្មី ឆ្នាំច សំរិទ្ធស័ក ព,ស២៥៦២ ដែលនឹងឈានចូលមកដល់នាពេលឆាប់ៗខាងមុខនេះ។ បន្ទាប់ពីព្រះសង្ឃសូត្រមន្តចំរើនព្រះបរិត្តរួចមក កម្មវិធីបានបន្តលេងល្បែងប្រជាប្រិយ មានរាំវង់ រាំក្បាច់ សារ៉ាវ៉ាន់ ឡាំលាវ ម៉ាឌីហ្សាន់ និងល្បែងប្រជាប្រិយដូចជា ចោលឈូង បោះអង្គុញ ទាញព្រ័ត្រ លាក់កន្សែង និងល្បែងប្រជាប្រិយដែលជាវប្បធម៌ប្រពៃណីយជាតិខ្មែរយើងជាច្រើនមុខទៀត។
កម្មវិធីដែលសាលាពេទ្យបានប្រារព្ធធ្វើនៅពេលនេះ ប្រព្រឹត្តទៅក្រោមអធិបតីភាព លោក ឈុន សំណាង នាយកគ្រប់គ្រងសាលាសុខាភិបាលភូមិភាគ លោកនាយករង ប្រធានការិយាល័យរដ្ឋបាល រួមនឹងសិស្សនិស្សិតសាលាពេទ្យដែលបានចូលរួមសរុបចំនួន ៦៦០នាក់ ចូលរួមយ៉ាងសប្បាយ រីករាយនាឱកាសសង្ក្រាន្តដែលរៀបចំឡើង ដោយសាលាសុខាភិបាលភូមិភាគបានប្រារព្ធនៅថ្ងៃនេះ។ លោកសាស្ត្រាចារ្យ ឈុន សំណាង នាយកគ្រប់គ្រងសាលាសុខាភិបាលភូមិភាគកំពតបានថ្លែង មតិសំណេះសំណាលដល់សិស្ស និស្សិតសុខាភិបាលគ្រប់ថ្នាក់ និងគ្រប់ជំនាញពេទ្យទាំងអស់ ដែលបានចូលរួមពិធីសង្ក្រាន្តនាពេលនេះថា សិស្ស និស្សិតដែល សិក្សាសាលាសុខាភិបាលភូមិភាគនេះ សរុបចំនួន៩៤២នាក់ នារី៦៥៤នាក់។
ហើយចំនួនសិស្សសរុបខាងលើ មានសិស្សចំនួន៦៦០នាក់ រួមទាំងសាស្ត្រាបង្រៀនផងបានស្មគ្រ័ចិត្តនៅចូលរួមពិធីសង្ក្រាន្តដែលរៀបចំឡើងដោយសាលាផ្ទាល់។ ហើយសិស្ស និស្សិត ក្រៅពីនោះក្មួយៗបានទៅលេងស្រុកកំណើតរបស់ក្មួយៗ ដើម្បីជួបជុំក្រុមគ្រួសារ សាច់ញាតិ របស់ក្មួយៗ ចំណែកក្មួយៗដែលនៅ ចូលរួមសង្ក្រាន្តនៅពេលនេះក៏បានទទួល នូវការប្រោះព្រំពីព្រះសង្ឃដែលសាលា បាននិមន្តមកដើម្បីសូត្រមន្តលើករាសីដល់សាលា និងសិស្សនិស្សិតនាពេល នេះផងដែរ។ សម្រាប់កម្មវិធីសង្ក្រាន្តដែលធ្វើឡើងនៅសាលានាពេលនេះគឺចាប់ ពីចប់កម្មវិធីព្រះសង្ឃចម្រើនព្រះបរិត្តចប់ គឺចាប់ផ្តើមកម្មវិធីល្បែងប្រជាប្រិយ គ្រប់មុខ រាំលេងកម្សាន្តរហូតដល់ម៉ោង១១យប់ថ្ងៃដដែល៕
ចែករំលែកព័តមាននេះ