ខេត្តបន្ទាយមានជ័យ ៖ បន្ទប់ខារ៉ាអូខេ យីហោហ្គោលថោន១ ចំនួន២បន្ទប់ត្រូវបានអគ្គីភ័យឆាបឆេះ បង្កឲ្យមានការភ្ញាក់ផ្អើលនៅវេលាម៉ោង១២ថ្ងៃត្រង់ ថ្ងៃទី១០ ខែមេសា ឆ្នាំ២០១៨នេះ នៅភូមិក្បាលស្ពាន សង្កាត់ព្រព្រះពន្លា ក្រុងសិរីសោភ័ណ ខេត្តបន្ទាយមានជ័យ។ នៅក្នុងហេតុការណ៍នោះដែរ ក៏មានវត្ថមាន លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានចុះទៅដល់កន្លែងកើត ហេតុ ក្នុងនោះក៏មានរថយន្តពន្លត់អគ្គីភ័យចំនួន៥គ្រឿង ចុះធ្វើអន្តរាគមន៍បាញ់ទឹកពន្លត់។ បន្ទប់ខារ៉ាអូខេនោះ មានឈ្មោះ ឈុន ពៅ ភេទប្រុស អាយុ៤២ឆ្នាំ នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
តាមប្រភពព័ត៌មានដំបូងគេបានឃើញផ្សែងហុយៗ ចេញពីបន្ទប់ ខារ៉ាអូខេដោយលាយឡំជាមួយនឹងអណ្តាតភ្លើង ដែលរាលឆេះសម្ភារក្នុងបន្ទប់។ នៅពេលនោះគឺមិនមានច្រក ដើម្បីបាញ់ទឹកទេ ទាល់យកអេស្ការមកទម្លាយជញ្ជាំង និងវាយបុកទ្វារខាងមុខបន្ទប់ ទើបមានកន្លែងបាញ់ទឹកចូល។ សមត្ថកិច្ចបានឲ្យដឹងថា គឺប្រើរយៈពេល៣ម៉ោង ទើបគ្រប់គ្រងស្ថានការនោះបាន ដោយប្រើប្រាស់ទឹកអស់ចំនួន១០ឡាន។ នៅក្នុងហេតុការណ៍គ្រោះអគ្គីភ័យនេះដែរ គឺមិនមានរងគ្រោះដល់មនុស្សនោះទេ គ្រាន់ខូចខាតសម្ភារ នៅក្នុងបន្ទប់ប៉ុណ្ណោះ។ មូលហេតុដែលបង្កឲ្យមានអគ្គីភ័យនេះ គឺបណ្ដាលមកពីទុស្សេខ្សែភ្លើង។
ទាក់ទឹននឹងគ្រោះអគ្គីភ័យនេះ លោកឧត្តមសេនីយ៍ទោ អាត់ ខែម ស្នងការនគរបាលបាលខេត្ត បន្ទាយមានជ័យ បានអំពាវនាវដល់ប្រជាពលរដ្ឋទាំងអស់ ត្រូវប្រុងប្រយ័ត្នចំពោះអគ្គិភ័យ រដូវនេះ គឺជារដូវក្តៅហួតហែងងាយនឹងកើតមានអគ្គិភ័យឆាបឆេះ ការធ្វើសំណង់មិនថាបន្ទប់ខារ៉ាអូខេ ឬក្លឹបកម្សាន្តនោះទេ ទាមទារឲ្យមានបង្អួច ឬប្រឡោះមួយសម្រាប់កើតមានអគ្គិភ័យ ងាយស្រួលក្រុមការងារជួយអន្តរាគមន៍បាញ់ទឹកពន្លត់។ ជាក់ស្ដែងដូចជាបន្ទប់ខារ៉ាអូខេនេះ គឺគ្មានកន្លែងបាញ់ទឹក ទើបបង្កឲ្យជួបបញ្ហាខ្លះ ក្នុងការជួយអន្តរាគមន៍។ ចំពោះការតបណ្តាញអគ្គិសនី គឺត្រូវបានរកជាងជំនាញមកត ហើយបើខ្សែចាស់ត្រូវមានការផ្លាស់ប្តូរចេញចៀសវាងការទុស្សេ៕
ចែករំលែកព័តមាននេះ