ខេត្តបន្ទាយមានជ័យ ៖ លោកឧត្តមសេនីយ៍តទោ អាត់ ខែម ស្នងការនគរបាលខេត្តបន្ទាយមានជ័យ បានថ្លែងនៅក្នុងពិធីប្រកាសផ្ទេរភារកិច្ច តែងតាំងមុខដំណែង និងបំពាក់ឋានន្តរស័ក្តមន្ត្រីនគរបាលជាតិនៃ វរសេនាតូចការពារព្រំដែនគោកលេខ៨១៥-៨០៧-៩១១-៨៩១ និងអធិការដ្ឋាននគរបាលស្រុកម៉ាឡៃ នៃស្នងការដ្ឋាននគរបាលខេត្តបន្ទាយមានជ័យ សរុបចំនួន៧២នាក់ នៅថ្ងៃទី១០ ខែមេសា ឆ្នាំ២០១៨នេះ បានដាក់បទបញ្ជាដល់កងកម្លាំងនគរបាលទាំងអស់គឺត្រូវតែមានវិធានការតឹងរ៉ឹងបំផុត គឺនៅក្នុងខេត្ត បន្ទាយមានជ័យ ត្រូវហាមមិនឲ្យមានការលេងច្រកទឹកដាក់ថង់ ប៉េងប៉ោង គប់ទៅលើអ្នកដែលគេដើរ លេងកម្សាន្តសប្បាយ ជាដាច់ខាត នៅក្នុងឱកាសបុណ្យចូលឆ្នាំប្រពៃណីជាតិខាងមុខនេះ និងទប់ស្កាត់ ហើយបង្ក្រាបក្រុមក្មេងទំនើង ដែលបង្កការអុកឡុកក្នុងកម្មវិធីកម្សាន្តសប្បាយ របស់បងប្អូនប្រជាពលរដ្ឋ។
ជាមួយគ្នានោះដែរ ត្រូវសហការជាមួយកងកម្លាំងសមត្ថកិច្ចនៅក្នុងមូលដ្ឋាន អាជ្ញាធរដែនដី គ្រប់លំដាប់ថ្នាក់ ក្នុងការអនុវត្តគោលនយោបាយភូមិ-ឃុំ មានសុវត្ថិភាព ដើម្បីរក្សាសន្តិសុខសណ្តាប់ធ្នាប់ ក្នុងមូលដ្ឋានរបស់ខ្លួន។ ក្នុងនោះដែរលោកឧត្តមសេនីយ៍ស្នងការបានបញ្ជាក់ថា៖ រាល់បទល្មើសដែល កើតមាននៅក្នុងមូលដ្ឋាន គឺត្រូវតែរួមគ្នាគិត រួមគ្នាធ្វើ និងរួមគ្នាដោះស្រាយបង្ក្រាប ឲ្យខាងតែបាន និងត្រូវមានកិច្ចសហប្រតិបត្តិការល្អជាមួយសមត្ថកិច្ចប្រទេសជិតខាង ដើម្បីទប់ស្កាត់នូវបទល្មើសឆ្លងដែន គ្រប់ប្រភេទ។ នាឱកាសនោះដែរ លោក អែម សុខា អភិបាលស្រុកម៉ាឡៃ បានថ្លែងនូវការកោតសរសើរ ផងដែរ ដល់កងកម្លាំងនគរបាល ដែលកន្លងមកតែងបានជួយប្រជាពលរដ្ឋ ដែលរងគ្រោះដោយគ្រោះ ធម្មជាតិនៅក្នុងស្រុកម៉ាឡៃ ជាងនេះទៀតគឺបាន ទប់ស្កាត់ និងបង្ក្រាបរាល់បទល្មើសកើតឡើង ក្នុងភូមិសាស្ត្រស្រុកម៉ាឡៃ ដែលធ្វើឲ្យប្រជាពលរដ្ឋមានទំនុកចិត្ត ជឿជាក់មកលើកងកម្លាំង នគរបាលយើង។
លោកវរសេនីយ៍ឯក ម៉ក់ ឧត្តម នាយការិយាល័យបុគ្គលិក បានអានប្រកាស របស់ក្រសួងមហាផ្ទៃ និងសេចក្តីសម្រេចរបស់អគ្គស្នងការនគរបាលជាតិ ក្នុងនោះសម្រេចតែងតាំង និងបំពាក់ឋានន្តរស័ក្តមេបញ្ជាការរងនគរបាលការពារព្រំដែនគោកលេខ៨០៧ម្នាក់ និងបំពាក់ឋានន្តរស័ក្តជូនមន្ត្រីនគរបាលចំនួន៧០នាក់ ថ្នាក់អនុសេនីយ៍ឯក៥៣នាក់, ថ្នាក់អនុសេនីយ៍ទោ១៦នាក់ និងថ្នាក់ព្រិន្ទបាលទោម្នាក់។ បន្ទាប់មកគណៈអធិបតីក៏បានចែកជូនសារុង ដល់កងកម្លាំងនគរបាល អាជ្ញាធរឃុំ និងកម្លាំងការពារភូមិ ដែលចូលរួមម្នាក់ផងដែរ៕
ចែករំលែកព័តមាននេះ