ខេត្តកណ្ដាល ៖ ប្រជានេសាទ និងអ្នកចិញ្ចឹមត្រីតាមប៊ែរក្នុងទន្លេបាសាក់បានប្រាប់ឲ្យដឹងថា មួយរយៈចាប់ពីដើមខែមេសារហូតមកដល់ថ្ងៃទី១០ មេសានេះ ត្រីធម្មជាតិ និងត្រីចិញ្ចឹមក្នុងប៊ែរបានពុលងាប់ ជាបន្តបន្ទាប់ច្រើនណាស់សង្ស័យទឹកទន្លេបាសាក់មានជាតិគីមីពុលដែលគេបង្ហូរចេញពីក្នុងរោងចក្រ ។
ពលរដ្ឋសំណូមពរឱ្យមន្ត្រីជំនាញចុះត្រួតពិនិត្យខណៈទឹកនៅក្បែររោងចក្រមានក្លិនស្អុយរម៉ាស់ ប្រើលែងកើត ហើយត្រីធម្មជាតិ និងចិញ្ចឹមជាច្រើនតោនបានងាប់ជាបន្តបន្ទាប់ផងដែរ ។
លោក ឆាយ សែ នៅភូមិកំពង់ព្រីង ឃុំសិត្បូ៍ ស្រុកស្អាង ខេត្តកណ្តាលដែលនៅក្បែររោងចក្រមួយកន្លែង បានប្រាប់ថា រយៈពេលបីបួនខែមកហើយ បន្ទាប់ពីរោងចក្រនេះបង្ហូរទឹកស្អុយចូលទន្លេមក ទឹកនៅម្តុំនេះ ប្រើមិនកើតនោះទេ គឺក្លាយទៅជាពណ៌ខ្មៅស្អុយ និងរម៉ាស់ទៀតផង ហើយរោងចក្រនេះបង្ហូរទឹកចំនួន២កន្លែង គឺខាងក្រោយរោងចក្រ និងតាមប្រឡាយ៦៤ ។ ចំណែកឯលោកចាន់ ម្ចាស់ប៊ែត្រីម្នាក់ក្នុងភូមិបារ៉ែនលើ ឃុំស្វាយប្រទាល ស្រុកស្អាង បាននិយាយថា គាត់បានចិញ្ចឹមត្រីជាង១០ឆ្នាំមកហើយ និងមានចំនួន១៦ប៊ែរ មិនដែលជួបប្រទះបញ្ហាត្រីងាប់ដូច្នេះទេ បើងាប់ គឺងាប់កាលត្រីនៅតូចៗ និងតិចតួចបំផុត ។ ប៉ុន្តែឆ្នាំនេះ គឺងាប់គ្មានសល់តែម្តងទាំងអាធំទាំងអាតូច ហើយការងាប់នេះតាំងពីដើមខែមេសា មកដល់បច្ចុប្បន្ននេះ គឺងាប់ជាបន្តបន្ទាប់គ្មានសល់ឡើយ ពោលក្នុងមួយប៊ែរប្រមាណ២តោន ហើយបើតាមបទពិសោធន៍ គឺអាចបណ្តាលមកពីទឹកមានសារធាតុពុល ទើបបានជាងាប់ដូច្នេះ។
ជាមួយគ្នានោះដែរលោក សុខ និងលោកកាយ យូ ជនជាតិខ្មែរឥស្លាម នៅភូមិបារ៉ែនក្រោម ឃុំស្វាយប្រទាលបានត្អូញត្អែរថា ពួកគាត់ចិញ្ចឹមត្រីជាង៣០ឆ្នាំមកហើយ មិនដែលឃើញត្រីងាប់ដូច្នេះទេ ហើយមិនមែនតែងាប់តែត្រីចិញ្ចឹមរបសពួកគាត់នោះទេ សូម្បីតែត្រីធម្មជាតិក្នុងទន្លេក៏ពុលងាប់ដែរ ហើយត្រីដែលងាប់នោះ មិនអាចយកទៅកែឆ្នៃធ្វើប្រហុក ផ្អក បាននោះទេ គឺងាប់ឆាប់រលួយសាច់តែម្តង ។
ដូច្នេះសូមមន្ត្រីជំនាញមេត្តាជួយចុះមកពិនិត្យផង ចំពោះការបង្ហូរទឹកស្អុយពីរោងចក្រចូលទន្លេ បណ្តាលឱ្យងាប់ត្រីរបស់ពួកគាត់ និងសូមឱ្យរោងចក្រទាំងនោះ ផ្តល់នូវសំណងដល់ពួកគាត់ដែលបានខូចខាត ។
លោក អ៊ំ ឡេង មេឃុំសិត្បូ៍ បានទទួលស្គាល់ថា ពិតជាមានបង្ហូរទឹកស្អុយពីរោងចក្រចូលទន្លេប្រាកដមែន និងមានប្រមាណ៤ទៅ៥រោងចក្រ ហើយលោកក៏ធ្លាប់ធ្វើការកោះហៅដំណាងរោងចក្រជាច្រើនលើកដែរ ប៉ុន្តែ ខាងរោងចក្រ គឺមិនបានចូលរួមនោះទេ ។
លោកចាប សឿន មេឃុំស្វាយប្រទាលបានប្រាប់ឲ្យដឹងថា តាំងពី២-៣ថ្ងៃមុនមានប្រជាពលរដ្ឋរាយការ មកថា មានត្រីធម្មជាតិ និងត្រីចិញ្ចឹមក្នុងប៊ែររបស់ពលរដ្ឋបានងាប់បន្តបន្ទាប់ច្រើន មិនដឹងមូលហេតុច្បាស់លាស់ សង្ស័យទឹក ទន្លេមានជាតិពុល ។ លោកខឹម ពេញ នាយផ្នែករដ្ឋបាលជលផលបាសាក់បានប្រាប់ឱ្យដឹងថា ត្រីធម្មជាតិក្នុងទន្លេ និងត្រីចិញ្ចឹមរបស់ប្រជាកសិករពិតជាបានងាប់ច្រើនមែន រួមមានឃុំរកាខ្ពស់ ឃុំ ស្វាយប្រទាល និងខុំត្រើយស្លា ហើយពលរដ្ឋដែលរងផលប៉ះពាល់ដោយសារត្រីចិញ្ចឹមងាប់ មានប្រមាណ២០គ្រួសារ និងប្រមាណត្រីងាប់ច្រើនតោនឯណោះ ។ ជាមួយគ្នានោះលោកក៏បានដងទឹកទន្លេទុកផងដែរ និងរង់ចាំមើលខាងបរិស្ថានពិនិត្យសិន ទើបយកទឹកដែលយើងដងពីទន្លេទុកនោះទៅធ្វើការវិភាគ ហើយតាមការពិនិត្យឃើញមានលូបង្ហូរចូលទន្លេចំនួន៥កន្លែងនៅក្នុងឃុំសិត្បូ៍ ។
ប្រធានមន្ទីរបរិស្ថានខេត្តកណ្តាល លោក អូម ផាត់ មិនអាចទំនាក់ទំនងសុំការពន្យល់បាននោះទេ ខណៈដែលទូរសព្ទ័របស់លោកមិនអាចទាក់ទងបាន ៕
ចែករំលែកព័តមាននេះ