ខេត្ដសៀមរាប ៖ បន្ទាប់ពីប្រមុខរាជរដ្ឋាភិបាលកម្ពុជាបានដាក់ចេញនូវបទបញ្ជាយ៉ាងក្ដៅគគុកបង្ក្រាបទៅលើបទល្មើសព្រៃឈើនៅទូទាំងប្រទេស ធ្វើឱ្យសកម្មភាពរត់ពន្ធឈើខុសច្បាប់ ក៏ដូចជាឈើដែលមានប្រភពដីសម្បទានសេដ្ឋកិច្ចត្រូវបញ្ឈប់សកម្មភាពស្ទើរទាំងស្រុង ។ ក៏ប៉ុន្ដេសំរាប់តំបន់ដែនដីប្រវត្ដិសាស្ដ្រខេត្ដសៀមរាប នាពេលថ្មីៗ ចុងក្រោយនេះមានសកម្មភាពដឹកជញ្ជូនឈើជាលក្ខណៈទ្រុងទ្រាយធំត្រូវបានគេមើលឃើញថា ចាប់កំរើកឡើងវិញហើយ។យោងតាមសេចក្ដីរាយការណ៍បានឱ្យដឹងថា កាលពីព្រឹកថ្ងៃទី៧ កក្កដា ឆ្នាំ២០១០ មានរថយន្ដលំដាប់យក្សចំនួនពីរគ្រឿងផ្ទុកទៅដោយឈើពេញចូលមកលក់នៅដេប៉ូឈើចំនួនពីរក្នុងក្រុងសៀមរាប ទាំងព្រលឹមអុល ដោយក្រុមសមត្ថកិច្ចជំនាញរដ្ឋបាលព្រៃឈើបានអះអាងថា ជាឈើមានច្បាប់ត្រឹមត្រូវទាំងអស់ ។
នាយខណ្ឌរដ្ឋបាលព្រៃឈើខេត្ដសៀមរាប លោកទា គឹមសុទ្ធ បានថ្លែងប្រាប់តាមទូរស័ព្ទ កាលពីថ្ងៃទី៧ កក្កដា ថា ឈើដែលគេដឹកដាក់ដេប៉ូទាំងពីរនៅសង្កាត់សាលាកំរើកនោះ ជាឈើដែលមានលិខិតដឹកជញ្ជូនត្រឹមត្រូវ តាមច្បាប់ពុំមានអ្វីខុសប្រក្រតីនោះទេ។លោកទា គឹមសុទ្ធ បានបញ្ជាក់ទៀតថា ឈើដែលដឹកតាមរថយន្ដទាំងពីរគ្រឿងនោះជាឈើរបស់ក្រុមហ៊ុនរតនៈ ខេមអាហ្គ្រោ អ៊ិនដាសស្ទ្រី អិលធីឌី ដែលមានប្រភពចេញពីស្រុកសណ្ដាន់ ខេត្ដកំពង់ធំ ។ លោកអះអាងដូចជាច្បាស់លាស់ថា គ្មានអ្នកណាហ៊ានដឹកជញ្ជូនឈើដ៏ច្រើនសន្ធឹកសន្ធាប់បែបនេះ ដោយគ្មានលិខិតអនុញ្ញាតនោះទេ ក្នុងស្ថានការណ៍កំពុងតែក្ដៅគគុកបែបនេះឡើយ ហើយក៏គ្មានការបន្លំដាក់ លើសចំនួនដែលច្បាប់អនុញ្ញាតឱ្យដែរ ។
លោកហេង ដេត ជាអ្នករត់ការផ្លូវក្នុងការដឹកជញ្ជូនឈើទាំងរថយន្ដធំលំដាប់យក្ស របស់ក្រុមហ៊ុនរតនៈខេមអាហ្គ្រោ អ៊ិនដាសស្ទ្រី អិលធីឌី ពីខេត្ដកំពង់ធំ មកកាន់ខេត្ដសៀមរាបនោះ កាលពីវេលាម៉ោង១១និង ៤៥នាទី ថ្ងៃទី៨ កក្កដា នេះបានប្រាប់តាមទូរស័ព្ទថា រូបលោកបានចំណាយលុយមួយចំនួនតាមបែបមនោសញ្ចេតនាទៅឱ្យក្រុមសមត្ថកិច្ចចំនាញរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើន ដែលឈរជើងលើដងផ្លូវនៅពេលដែលរថយន្ដគាត់ដឹកឈើឆ្លងកាត់ ។ អ្វីដែលលោកហេង ដេត បានលើកឡើង អំពីការចំណាយលុយទៅឱ្យក្រុមសមត្ថកិច្ចនោះ ធ្វើឱ្យគេមានការសង្ស័យថា ចំនួនឈើពិតប្រាកដអាចត្រូវបានគេរួមគ្នាកំណត់លាក់បំពួននៅពេលមានការត្រួតពិនិត្យនូវឈើ ដែលមានចំនួនច្រើនលើសលប់ពីចំនួនដែលកំណត់ក្នុងលិខិតអនុញ្ញាតក៏ថាបាន ព្រោះឈ្មួញទំនងជាបានទិញទឹកចិត្ដក្រុមមន្ដ្រី ជំនាញអស់បាត់ទៅហើយតាមរយៈការផ្ដល់លុយនៅពេលរត់ការផ្លូវនោះ ។
លោកសូ ហៃ នាយផ្នែករដ្ឋបាលព្រៃឈើ បន្ទាយស្រី នៅព្រឹកថ្ងៃទី៨ កក្កដា នេះ ពុំបានធ្វើការពន្យល់ណាមួយជុំវិញការត្រួតពិនិត្យ ទៅលើចំនួនឈើរបស់ក្រុមហ៊ុនរតនៈ ខេមអាហ្គ្រោ អ៊ិនដាសស្ទ្រី អីលធីឌី នោះទេ ដោយលោកប្រាប់ដោយផ្ទាល់ថាជាប់រវល់ រៀបចំពិធីរុក្ខទិវានៅថ្ងៃស្អែកគ្មានពេលទំនេរបកស្រាយឡើយ ។ចំណែកលោកយឹម ស៊ីវ៉ន នាយសង្កាត់រដ្ឋបាលព្រៃឈើបាគង បានប្រាប់ថា ឈើដែលដឹកទំលាក់នៅក្នុងដេប៉ូទាំងពីរនោះ មានជា ប្រភេទឈើលេខពីរ សំរាប់បំរើឱ្យការសាងសង់ ហើយមានលិខិតអនុញាតចំនួនជាង៦០ម៉ែត្រគូប ដែលពេលនេះខាងជំនាញបានចាបិទលើក្រដាសដឹកជញ្ជូនរបស់ក្រុមហ៊ុននោះ រួចហើយដែរ ដើម្បីកុំឱ្យយកទៅដឹកសាជាថ្មី ទៀត។
ក្រុមអ្នកតាមដានទៅលើវិស័យព្រៃឈើ បានលើកឡើងថា ការដឹកជញ្ជូនឈើដែល មានលក្ខណៈទ្រុងទ្រាយធំរបស់ក្រុមហ៊ុនខាង លើចូលមកកាន់ខេត្ដសៀមរាបកាលពីព្រឹក ថ្ងៃទី៧ កក្កដា នេះជាសញាណថ្មីមួយក្នុង ការកំរើកឡើងវិញនូវការកាប់បំផ្លាញព្រៃ ឈើក្នុងតំបន់បន្ទាប់ពីមានការបង្ក្រាបយ៉ាង ចាស់ដៃតាមបទបញ្ជារបស់រាជរដ្ឋាភិបាល កម្ពុជា កាលពីពេលថ្មីៗ ។ក្រុមអ្នកតាមដានបានបន្ដទៀតថា កន្លងមកមានក្រុមហ៊ុនជាច្រើនដែលបានទទួលដីសម្បទានសេដ្ឋកិច្ចពីរដ្ឋាភិបាល ហើយយក ឱកាសនោះទៅកាប់បំផ្លាញព្រៃឈើដើម្បីធ្វើអាជីវកម្ម ក្រោមឡេះប្រមូលផល-អនុផល ព្រៃឈើបានមកពីការឈូសឆាយដី ដាំដំណាំ កសិ-ឧស្សាហកម្មផ្សេងៗ ហើយឆ្លៀត ឱកាសកាប់ឈើក្រៅតំបន់អនុញាតធ្វើឱ្យធនធានសម្បត្ដិធម្មជាតិរងនូវការគំរាមកំហែងយ៉ាងធ្ងន់ធ្ងរបំផុត ៕
ចែករំលែកព័តមាននេះ