រាជធានីភ្នំពេញ ៖ ក្រសួងសាធារណៈការ និងដឹកជញ្ជូន បានប្រកាសថា នៅប្រទេសកម្ពុជាមិនមែនជាប្រទេសទី១ទេ ដែលមានផ្លូវរថភ្លើងរត់លើផ្លូវថ្នល់នេះ គឺនៅប្រទេសគេលើពិភពលោកមានជាយូរមកហើយ ហើយប្រទេសកម្ពុជាយើងទើបតែមានជាលើកដំបូង ដូច្នេះសូមបងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់…
រាជធានីភ្នំពេញ ៖ ក្រសួងសាធារណៈការ និងដឹកជញ្ជូន បានប្រកាសថា នៅប្រទេសកម្ពុជាមិនមែនជាប្រទេសទី១ទេ ដែលមានផ្លូវរថភ្លើងរត់លើផ្លូវថ្នល់នេះ គឺនៅប្រទេសគេលើពិភពលោកមានជាយូរមកហើយ ហើយប្រទេសកម្ពុជាយើងទើបតែមានជាលើកដំបូង ដូច្នេះសូមបងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់ ។ ក្នុងពិធីបើកឲ្យប្រើប្រាស់ជាបណ្ដោះអាសន្ន ខ្សែរថភ្លើងដឹកអ្នកដំណើរភ្នំពេញ-ព្រលានយន្តហោះអន្តរជាតិភ្នំពេញ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនថ្លែងថា ដើម្បីកុំឲ្យប្រជាពលរដ្ឋមានការភាន់ច្រឡំនោះ ក្រុមហ៊ុនបានលាបថ្នាំពណ៌លឿង និងពណ៌ខ្មៅសងខាង និងកណ្ដាលពណ៌ខៀវ ដើម្បីបង្កលក្ខណៈងាយស្រួលដល់ប្រជាពលរដ្ឋស្រួលចំណាំថា មានផ្លូវរថភ្លើងរត់លើផ្លូវថ្នល់ ដោយសារផ្លូវរថភ្លើងនេះជាផ្លូវអាទិភាព ហើយបើគ្មានរថភ្លើងរត់នោះ បងប្អូនប្រជាពលរដ្ឋអាចបើកយានយន្តលើផ្លូវរថភ្លើងបានតាមសម្រួល ។
លោកបន្តថា ការលាបពណ៌ថ្នាំនៅលើផ្លូវរថភ្លើងនេះ អត់មានទេ នៅលើពិភពលោក មានតែកម្ពុជាមួយនេះឯង ហើយហេតុអ្វីខ្ញុំស្នើសុំឲ្យក្រុមហ៊ុនលាបថ្នាំ គឺដើម្បីឲ្យបងប្អូនរបស់យើងបានដឹង ។ នៅប្រទេសគេ គេឃើញហើយរថភ្លើងរត់លើផ្លូវថ្នល់យូរឆ្នាំមកហើយ ប៉ុន្តែនៅកម្ពុជាយើងមិនដែលឃើញនោះទេ ដូច្នេះខ្ញុំបានស្នើដល់ក្រុមហ៊ុនលាបថ្នាំពណ៌លឿង ពណ៌ខ្មៅនៅសងខាង និងពណ៌ខៀវនៅចំកណ្ដាល ដើម្បីឲ្យប្រជាពលរដ្ឋបានយល់ឃើញថា នេះជាផ្លូវរថភ្លើង ដូច្នេះដែលប្រើប្រាស់ផ្លូវនេះសូមមេត្តាប្រុងប្រយ័ត្ន រថភ្លើងបើកកណ្តាល រថភ្លើងមិនអាចឈប់ភ្លាមៗបានទេ សូមប្រុងប្រយ័ត្ន ។
ទេសរដ្ឋមន្ត្រី ស៊ុន ចាន់ថុល បានឲ្យដឹងទៀតថា ក្រុមការងារបានគិតគូរយ៉ាងយកចិត្តទុកដាក់ សព្វបែបយ៉ាងលើសេវារថភ្លើងសាធារណៈនេះ ដើម្បីបម្រើភាពងាយស្រួលដល់បងប្អូនប្រជាពលរដ្ឋ ដែលកិច្ចការនេះ គឺជាការយកចិត្តទុកដាក់របស់រាជរដ្ឋាភិបាល បានខិតខំប្រឹងប្រែងធ្វើជូនប្រជាពលរដ្ឋ ហើយការធ្វើកិច្ចការងារនេះបាន ដោយសារតែប្រទេសមានសុខសន្តិភាព ប៉ុន្តែបើប្រទេសកម្ពុជាគ្មានសុខសន្តិភាពនោះ យើងមិនអាចកសាងប្រទេសយើងបានទេ ។
លោកក៏បានអំពាវនាវដល់បងប្អូនប្រជាពលរដ្ឋទាំងអស់ ចូលរួមសាមគ្គីគ្នា ដើម្បីថែរក្សាសុខសន្តិភាពទុកឱកាសឲ្យរាជរដ្ឋាភិបាល បានកសាងប្រទេសជាតិមាតុភូមិរបស់យើង ទុកឱកាសឲ្យរាជរដ្ឋាភិបាលទាក់ទាញអ្នកវិនិយោគ មកបណ្ដាក់ទុននៅកម្ពុជា ទាក់ទាញភ្ញៀវទេសចរ នាំកសិផលរបស់កម្ពុជាចេញទៅប្រទេស ដើម្បីបង្កើតការងារជូនបងប្អូនប្រជាពលរដ្ឋបានធ្វើការងារ ។ សម្រាប់ការដាក់ឲ្យប្រើប្រាស់ជាបណ្តោះអាសន្ននេះ អនុញ្ញាតឲ្យប្រជាពលរដ្ឋអាចធ្វើដំណើរតាមរថភ្លើងដោយឥតគិតថ្លៃ ចាប់ពីថ្ងៃទី១០ ខែមេសា រហូតដល់ថ្ងៃទី៣១ ខែកក្កដា ឆ្នាំ២០១៨ ។ រថភ្លើងដឹកអ្នកដំណើរនេះ ចំណាយពេលប្រមាណ៣០នាទី ក្នុងការដឹកជញ្ជូនអ្នកដំណើរ ពីស្ថានីយរថភ្លើងភ្នំពេញទៅព្រលានយន្តហោះ និងអាចផ្ទុកអ្នកដំណើររួមទាំងអ្នកអង្គុយ និងអ្នកឈរប្រមាណ១០០នាក់ ។
នៅក្នុងរថភ្លើងមានដាក់ម៉ាស៊ីនត្រជាក់ ហើយប្រជាពលរដ្ឋដែលរស់នៅក្បែរព្រលានយន្តហោះ ហើយចង់ឡើងមករាជធានីភ្នំពេញ ក៏អាចប្រើប្រាស់រថភ្លើងនេះបានដែរ ។ ទេសរដ្ឋមន្ត្រី ស៊ុន ចាន់ថុល បានឲ្យដឹងថា ការដាក់ឲ្យដំណើរផ្លូវដែកថ្មី ចូលព្រលានយន្តហោះនេះ គឺដាក់ឲ្យប្រើប្រាស់រថភ្លើងចំនួន៣គ្រឿង ដែលបញ្ជាទិញពីប្រទេសម៉ិចស៊ិក ។ ជាមួយនឹងការដឹកជញ្ជូនថ្មីតាមផ្លូវដែកក្នុងរាជធានីភ្នំពេញនេះ នឹងជួយសម្រួលដល់អ្នកដំណើរទៅព្រលានយន្តហោះ មិនមានការព្រួយបារម្ភពីបញ្ហាកកស្ទះ និងគ្រោះថ្នាក់ចរាចរឡើយ ។ ក្បាលរថភ្លើងដែលបញ្ជាទិញពីប្រទេសម៉ិចស៊ិក ក៏អាចបើកទៅខេត្តព្រះសីហនុ នៅប៉ោយប៉ែត បានផងដែរ ដោយប្រើល្បឿន៨០គីឡូម៉ែត្រក្នុងមួយម៉ោង ។ ការដាក់ឲ្យដំណើររថភ្លើងនេះ មិនត្រឹមតែសម្រួលដល់ការធ្វើដំណើររបស់អ្នកត្រូវឡើងយន្តហោះប៉ុណ្ណោះទេ អ្វីដែលកាន់តែពិសេសទៀតនោះ អ្នកដែលធ្វើដំណើរទាំងអស់ត្រូវ បានត្រួតពិនិត្យទំនិញនៅស្ថានីយរថភ្លើងជាមុន ហើយមិនបាច់ទៅត្រួតពិនិត្យនៅអាកាសយានដ្ឋានទៀតនោះឡើយ ។
លោករដ្ឋមន្ត្រីក្រសួងសាធារណៈការ និងដឹកជញ្ជូន បានឲ្យដឹងថា ក្រសួងបានសហការណ៍ជាមួយអាកាសចរណ៍ស៊ីវិល រៀបចំឲ្យមានបញ្ជរសម្រាប់ត្រួតពិនិត្យទំនិញរបស់អ្នកដំណើរដែលត្រូវឡើងយន្តហោះ ឬ Check In នៅស្ថានីយរថភ្លើងតែម្តង ពោលរាល់អ្នកដំណើរមិនបាច់ចំណាយពេលទៅត្រួតពិនិត្យ ឬ Check In នៅព្រលានយន្តហោះទៀតនោះឡើយ ។ ប្រការនេះ នឹងធ្វើឲ្យអ្នកដំណើរកាន់តែងាយស្រួលមួយកម្រិតថែមទៀត ៕
ចែករំលែកព័តមាននេះ