រាជធានីភ្នំពេញ ៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ តម្លៃរថយន្ដឈ្នួលឯកជន, តាក់ស៊ី និងរថយន្ដទួរីស នៅតែឡើងថ្លៃដដែល បើទោះបីជាសាលារាជធានីភ្នំពេញ បានត្រៀមរថយន្ដរបស់រដ្ឋប្រមាណ៦០គ្រឿងជាស្រេចសម្រាប់ដឹកបងប្អូនទៅលេងស្រុកកំណើតដោយឥតគិតថ្លៃក៏ដោយ ។ នេះបើតាមការបញ្ជាក់ពីអ្នកបើករថយន្ដឈ្នួលពីភ្នំពេញទៅបណ្ដាខេត្តនានាកាលពីថ្ងៃទី៩ មេសា ម្សិលមិញ ។
លោក ង៉ែត សម្បត្តិ អ្នករត់តាក់ស៊ីភ្នំពេញ -តាកែវ បានឲ្យដឹងថា ជាទូទៅ ថ្ងៃបុណ្យទានខុសពីថ្ងៃធម្មតា ។ ពេលបុណ្យទានធំៗបែបនេះ អ្នកធ្វើដំណើរភាគច្រើន ឬស្ទើរតែទាំងអស់ គឺសម្រុកចេញពីភ្នំពេញទៅបណ្ដាខេត្ត ហើយពីបណ្ដាខេត្តមកវិញ ស្ទើរតែអត់មានអ្នកជិះទេ ។ អីចឹង ទើបរៀងរាល់ថ្ងៃបុណ្យទាន អ្នករត់តាក់ស៊ី និងរថយន្តឈ្នួលផ្សេងៗទៀតបានដំឡើងថ្លៃ តែការដំឡើងនេះមិនហួសហេតុពេកទេ ។
លោកនិយាយថា ៖« ចំពោះខ្ញុំដែលជាអ្នករត់តាក់ស៊ីប្រភេទរថយន្ដតូចនេះ ដំឡើងមិនច្រើនទេ ពោលគឺខុសពីថ្ងៃធម្មតាប្រមាណ៥.០០០រៀលប៉ុណ្ណោះ » ។
លោកបន្តថា បើទោះបីជាគម្រោងរបស់សាលាក្រុងបានផ្ដល់រថយន្តក្រុងជិះដោយឥតគិតថ្លៃក៏ដោយ ក៏មានអ្នកដំណើរខ្លះមករកជិះរថយន្តតាក់ស៊ីដែរ ព្រោះពួកគាត់ត្រូវការប្រញាប់ទៅស្រុកឲ្យបានឆាប់ ។ ម្យ៉ាងទៀត មនុស្សភាគច្រើនបានស្គាល់ចំណតនៅភ្នំពេញច្បាស់លាស់ទៅហើយ ខុសពីរថយន្តរបស់សាលាក្រុង ដែលបានផ្ដល់ជូន ត្រូវទៅរង់ចាំនៅកន្លែងចំណតមួយឆ្ងាយពីកន្លែងស្នាក់នៅរបស់ភ្ញៀវ ។
លោកថា ៖« អ្នកជិះរថយន្ដក្រុងរបស់រដ្ឋ អាចជាអ្នកមិនសូវមានលុយ ឬមានសមាជិកច្រើន ហើយត្រូវទៅឆ្ងាយ ដូចនេះ ទើបពួកគាត់ត្រូវការសន្សំលុយទុកសម្រាប់ជួបជុំបងប្អូននៅស្រុក ។ សម្រាប់អ្នកដែលមានលុយល្មមៗ គេអាចជិះរថយន្តឈ្នួល ឬតាក់ស៊ី ព្រោះជិះទៅដល់ផ្ទះតែម្ដង » ។
ចំណែកបុរសម្នាក់ជាអ្នកបើកបររថយន្តទួរីស ភ្នំពេញ-កំពត ក៏បានឲ្យដឹងដែរថា ការឡើងថ្លៃមិនខ្ពស់ហួសហេតុទេ ហើយការឡើងថ្លៃនេះ ក៏ដើម្បីទប់ទល់នឹងថ្លៃប្រេងពេលត្រឡប់មកភ្នំពេញវិញ ដោយរថយន្ដទទេដែរ ។
លោកនិយាយថា ៖« ពេលចូលឆ្នាំអីចឹងរថយន្តពីបណ្ដាខេត្តឡើងមកភ្នំពេញ អត់សូវមានអ្នកជិះទេ ព្រោះភាគច្រើនគេនៅស្រុកចូលឆ្នាំជាមួយបងប្អូន ។ អីចឹង ពេលចេញពីខេត្តមកភ្នំពេញ មានតែរថយន្ដទទេ លុះត្រាតែត្រឡប់ពីភ្នំពេញទៅខេត្តវិញ ទើបមានអ្នកជិះ អីចឹងហើយទើបត្រូវឡើងថ្លៃបន្តិចដើម្បីឲ្យរួចខ្លួន និងអាចចំណេញខ្លះ » ។
លោក ភឹង ចន្ថា បុគ្គលិកក្រុមហ៊ុនមួយនៅភ្នំពេញ និងមានស្រុកកំណើតនៅខេត្តបន្ទាយមានជ័យ បានឲ្យដឹងថា ក្នុងឱកាសបុណ្យចូលឆ្នាំខាងមុខនេះ លោកនឹងជ្រើសរើសយករថយន្តឈ្នួលឯកជនសម្រាប់ធ្វើដំណើរទៅលេងស្រុក ហើយទុកឱកាសឲ្យអ្នកមិនសូវមានលទ្ធភាពជាអ្នកជិះរថយន្តរបស់សាលាក្រុងវិញ ។
លោកបន្តថា ៖« សម្រាប់ខ្ញុំអាចមានលទ្ធភាពជិះរថយន្តឈ្នួលឯកជនបាន ព្រោះរថយន្តឯកជនលឿន និងមិនពិបាកទៅរកកន្លែងជិះដូចរថយន្តដែលសាលាក្រុងផ្ដល់ជូនដោយឥតគិតថ្លៃ នោះទេ ។ ម្យ៉ាងទៀត ការជិះរថយន្តឈ្នួលឯកជន គឺអាចចេញទៅពេលណាក៏បានដែរ ព្រោះគេមានម៉ោងចេញដំណើរច្រើនដង ។ ខ្ញុំចង់ទុកឲ្យអ្នកដែលមិនមានលទ្ធភាព ជាអ្នកជិះរថយន្តក្រុងរបស់រដ្ឋទៅចុះ ព្រោះអាចឲ្យពួកគេសន្សំថវិកាបានមួយចំនួនផងដែរ » ។
ចំណែកបងប្អូនកម្មករ-កម្មការិនីរោងចក្រមួយចំនួនក៏បានបញ្ជាក់ស្រដៀងគ្នាថា ពួកគាត់នឹងជ្រើសរើសយកសេវាកម្មរថយន្តឈ្នួលដដែល ពីព្រោះរថយន្តឈ្នួល ជាពិសេសទួរីស អ្នកបើកបរជាអ្នកនៅក្នុងស្រុកភូមិ ដូចនេះ ពួកគាត់នឹងមកយកដល់កន្លែងស្នាក់នៅ ហើយពេលទៅដល់ស្រុក ក៏ពួកគាត់ជូនដល់ផ្ទះដែរ ។ ចំណែករថយន្តក្រុងវិញ ត្រូវធ្វើដំណើរទៅកន្លែងជួបជុំម្ដង ហើយពេលដល់ខេត្ត ក៏ត្រូវជិះបន្តទៅផ្ទះ ដូចនេះ ត្រូវអស់លុយថ្លៃជិះទៅផ្ទះ ឬពិបាកបងប្អូនមកទទួលទៀតផង ៕
ចែករំលែកព័តមាននេះ