រដ្ឋធានីវ៉ាស៊ីនតោន ៖ លោកប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃអាទិត្យកន្លងមកថា លោកមើលឃើញការបញ្ចប់ជម្លោះពាណិជ្ជកម្មជាមួយចិន បន្ទាប់ពីប្រទេសទាំងពីរដាក់ពន្ធ និងគំរាមកំហែងដាក់គ្នាទៅវិញទៅមក ។…
រដ្ឋធានីវ៉ាស៊ីនតោន ៖ លោកប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃអាទិត្យកន្លងមកថា លោកមើលឃើញការបញ្ចប់ជម្លោះពាណិជ្ជកម្មជាមួយចិន បន្ទាប់ពីប្រទេសទាំងពីរដាក់ពន្ធ និងគំរាមកំហែងដាក់គ្នាទៅវិញទៅមក ។
លោកបាននិយាយនៅលើ Twitter ថា ៖«ប្រទេសចិននឹងដកឧបសគ្គពាណិជ្ជកម្មរបស់ខ្លួន ព្រោះវាជារឿងត្រឹមត្រូវដែលត្រូវធ្វើ ហើយកិច្ចព្រមព្រៀងនឹងសម្រេចលើបញ្ហាកម្មសិទ្ធិបញ្ញា » ។
លោកត្រាំ បានបន្ថែមថា ៖« លោក និងលោកប្រធានាធិបតីចិន ស៊ី ជិនពីង នឹងនៅតែជាមិត្តនឹងគ្នា មិនថាមានរឿងអ្វីកើតឡើងទាក់ទងនឹងជម្លោះពាណិជ្ជកម្មរបស់ពួកយើងទេ»។
គួរបញ្ជាក់ថា ទីផ្សារភាគហ៊ុនអាមេរិកបានធ្លាក់ចុះជាង២%កាលពីថ្ងៃសុក្រ បន្ទាប់ពីលោកត្រាំ ប្រកាសថា នឹងដាក់ពន្ធលើផលិតផលចិន ប្រមាណ១០០ប៊ីលានដុល្លារបន្ថែមទៀត ។
វិនិយោគិនមួយចំនួនគិតថា រដ្ឋាភិបាលលោកត្រាំ អាចនឹងប្រើប្រាស់វិធីនេះធ្វើជាយុទ្ធសាស្ត្រសម្រាប់ការចរចាជាមួយប្រទេសចិន ។
គួរបញ្ជាក់ថា អាជីវកម្មរបស់អាមេរិកបានស្នើឲ្យរដ្ឋាភិបាលដកថយ ។ ប៉ុន្តែទីប្រឹក្សាសេដ្ឋកិច្ចរបស់លោកត្រាំ កាលពីថ្ងៃអាទិត្យបានបដិសេធថា នឹងគ្មានសង្គ្រាម
ពាណិជ្ជកម្មទេ ហើយនិយាយថា លោកប្រធានាធិបតីអាមេរិកពិតជាមិនលេងសើចពីរឿងការដាក់ពន្ធឡើយ បើទោះជាបន្តការចរចាជាមួយប្រទេសចិនក្តី ។
លោក Peter Navarro ទីប្រឹក្សាសេដ្ឋកិច្ចម្នាក់ បាននិយាយថា ទោះជាមានការចរចាជាមួយប្រទេសចិនពិតមែន ប៉ុន្តែសហរដ្ឋអាមេរិកនឹងអនុវត្តពន្ធ ហើយទប់ស្កាត់ការវិនិយោគផ្សេងៗរបស់ប្រទេសចិន ៕
ចែករំលែកព័តមាននេះ