រាជធានីភ្នំពេញ ៖ គណៈបញ្ជាការឯកភាពខណ្ឌសែនសុខបានដាក់គោលដៅឆែកឆេរត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ដើម្បីទប់ស្កាត់បទល្មើស និងគ្រោះថ្នាក់ផ្សេងៗក្នុងមូលដ្ឋានបានធ្វើការឃាត់ម៉ូតូចំនួន២១គ្រឿងដែលមិនគោពរច្បាប់ចរាចរណ៍កាលពីវេលាម៉ោង៨យប់ ថ្ងៃទី០៩ ខែមេសា ឆ្នាំ២០១៨ នៅត្រង់ចំណុចខាងមុខស្ថានីយព្រេងឥន្ធនៈតេលា តាមបណ្តោយផ្លូវ២៧១ ស្ថិតក្នុងសង្កាត់អូបែកក្អម ខណ្ឌសែនសុខ ។
ប្រតិបត្តការនេះដឹកនាំដោយលោក ហោ វាសនា អភិបាលរងខណ្ឌសែនសុខតំណាងឲ្យលោក ម៉ូវ ម៉ានិត លោក រុណ ពង្សវិលិយ៉ា អធិការរងខណ្ឌ តំណាងលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌ និងកម្លាំងកងរាជអាវុហត្ថ និងសមត្ថកិច្ចពាក់ព័ន្ធជាច្រើននាក់ទៀត ។
លោក មូវ ម៉ានិត អភិបាលខណ្ឌបានមានប្រសាន៍ថា ការដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ផ្លូវគោកនេះគឺដើម្បីទប់ស្កាត់បទល្មើស និងគ្រោះផ្សេងៗដែលអាចកើតមានឡើងក្នុងមូលដ្ឋាន ។
ជាលទ្ធផលក្នុងការដាក់គោលដៅត្រួតពិនិត្យអាវុធជាតិផ្ទុះខាងលើគណៈបញ្ជាការកងឯកភាពខណ្ឌបានធ្វើការឃាត់ម៉ូតូចំនួន២១គ្រឿងដែលមិនគោពរច្បាប់ចរាចរណ៍ក្នុងនោះម៉ូតូដែលអត់មានកញ្ចក់មើលក្រោយចំនួន៣គ្រឿង និង១៨គ្រឿងទៀតជិះដោយអត់ពាក់មួកសុវត្ថិភាព ។ បច្ចុប្បន្នម៉ូតូទាំង២១គ្រឿងខាងលើត្រូវបានសមត្ថកិច្ចបញ្ជូនទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរងចាំធ្វើអប់រំ និងផាកពិន័យតាមច្បាប់ ៕
ចែករំលែកព័តមាននេះ