ខេត្តមណ្ឌលគិរី ៖ ប្តី-ប្រពន្ធមួយគូជាជនជាតិដើមភាគតិចព្នងបានស្លាប់ភ្លាមៗ នៅនឹងកន្លែងក្នុងថ្លុកឈាម ដោយបុរសជាប្តីបានកាប់ប្រពន្ធនឹងកាំបិតផ្គាក់ រួចបន្ទាប់មកក៏អារកខ្លួនឯងតាមក្រោយ ។ ហេតុការណ៍ដ៏រន្ធត់នេះ កើតឡើងកាលពីវេលាម៉ោង៩ព្រឹកថ្ងៃទី៧ មេសា នៅចំណុចរកាថ្មី ភូមិពូហ្យាម ឃុំសែនមនោរម្យ ស្រុកអូររាំង ។ លោក ប៊ូ ប៊ុនឈាត អធិការនគរបាលស្រុកអូររាំងបានឲ្យដឹងថា ករណីឃាតកម្មមួយនេះ
បង្កឡើងដោយឈ្មោះ ង្រើម វីន អាយុ៤៣ឆ្នាំ បានប្រើកាំបិតផ្គាក់កាប់ប្រពន្ធឈ្មោះ ក្លើយ សុកេ អាយុ៤០ឆ្នាំ ចំនួន២កាំបិត គឺចំបំពង់ក១កាំបិត និងកញ្ចឹងក១កាំបិត ពេលកំពុងបេះត្រួយស្អំ បណ្តាលឲ្យស្លាប់នៅក្រោមដើមស្អំជិតផ្ទះតែម្តង ។ គ្រួសារមួយនេះ មានកូនស្រី៣នាក់នៅក្នុងបន្ទុក ដែលកូនច្បងទើបមានអាយុ១៤ឆ្នាំ ។ លោកអធិការបន្តថា ក្រោយពីសម្លាប់ប្រពន្ធហើយ ជននេះមិនបានរត់គេចខ្លួនទៅណាទេ តែបានយកកាំបិតចុងស្រួចអារកសម្លាប់ខ្លួនឯង បណ្តាលឲ្យស្លាប់ទន្ទឹមគ្នាជាមួយសពប្រពន្ធនៅកន្លែងកើតហេតុតែម្តង។
ក្រោយពីទទួលបានព័ត៌មាននេះភ្លាម លោកឧត្តមសេនីយ៍ត្រី ឡោ សុខា បានចេញបទបញ្ជាភ្លាមៗឲ្យមន្ត្រីជំនាញនិងមន្ត្រីមូលដ្ឋានចុះទៅពិនិត្យនិងស្រាវជ្រាវយ៉ាងយកចិត្តទុកដាក់ដើម្បីស្វែងរកការពិត ទោះបីកន្លែងកើតហេតុស្ថិតនៅឆ្ងាយដាច់ស្រយាលក្នុងព្រៃក្តី ។ ជាលទ្ធផល សមត្ថកិច្ចបានដឹងពីមូលហេតុដែលជនដៃដល់សម្លាប់ប្រពន្ធរួចសម្លាប់ខ្លួនឯងនោះ គឺបណ្តាលមកពីបុរសជាប្តីមានសតិមិនល្អរយៈពេល៦ខែមកហើយ ។ នៅថ្ងៃកើតហេតុ ជំងឺធ្វើទុក្ខ ឯប្រពន្ធក៏មិនបានប្រុងប្រយ័ត្ន ខណៈកំពុងបេះបន្លែយកទៅស្លស្រាប់តែកើតមានករណីនឹកស្មានមិនដល់បែបនេះតែម្តង ។បន្ទាប់ពីចុះពិនិត្យកន្លែងកើតហេតុ ស្រាវជ្រាវសាកសួរសាក្សី ទើបសមត្ថកិច្ចសន្និដ្ឋានថា បុរសឈ្មោះ ង្រើម វីន ពិតជាកាប់សម្លាប់ប្រពន្ធ រួចធ្វើអត្តឃាតតាមក្រោយប្រាកដមែន និងបានប្រគល់សពទៅឲ្យសាច់ញាតិដើម្បីធ្វើបុណ្យតាមប្រពៃណី ។
នៅរសៀលថ្ងៃដដែលនោះ អាជ្ញាធរខេត្តនិងស្រុក បាននាំយកថវិកាចំនួន១,២លានរៀល និងអង្ករ១០០គីឡូក្រាម ដែលក្នុងនោះបានការឧបត្ថមពីលោក ស្វាយ សំអ៊ាង អភិបាលខេត្ត ថវិកា១លានរៀល អង្ករ៥0គីឡូក្រាម និងលោក នង ទុណ្ណារី អភិបាលស្រុក ថវិកា២០ម៉ឺនរៀល អង្ករ៥០គីឡូក្រាម ទៅប្រគល់ជូនគ្រួសារសពដើម្បីដោះស្រាយទុក្ខលំបាកមួយគ្រា ៕
ចែករំលែកព័តមាននេះ