ខេត្តប៉ៃលិន ៖ មុននេះ ធ្លាប់តែល្បីថា មានជនទំនើងលួចគប់បំបែកកញ្ចក់រថយន្ត ដែលបើកបរតាមផ្លូវនៅពេលយប់ តែពេលនេះបែរជាលេខមុខ អ្នកជិះរថយន្តយកដុំថ្មគប់ទៅលើអ្នកជិះម៉ូតូ បណ្តាលឱ្យដួលរងរបួសធ្ងន់ទៅវិញ ។ តាមពាក្យបណ្តឹងរបស់ស្ត្រីឈ្មោះ ស៊ន សៀង អាយុ៣៦ឆ្នាំ ជាកសិកររស់នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ដែលត្រូវជាម្តាយរបស់ជនរងគ្រោះឈ្មោះ នាក់ ម៉ានិត ភេទប្រុស អាយុ១៩ឆ្នាំ រងរបួសបែកក្បាលផ្នែកខាងមុខដេរអស់ជាង១០ថ្នេរ នគរបាលបានឃាត់ខ្លួនជនសង្ស័យចំនួន៣នាក់ ដែលធ្វើសកម្មភាពបើករថយន្តយកដុំថ្មគប់ទៅលើជនរងគ្រោះខាងលើ ដែលកំពុងតែជិះម៉ូតូឌុបមិត្តភក្តិ បណ្តាលឱ្យត្រូវក្បាលដួលម៉ូតូសន្លប់ស្តូកស្តឹង ។
ហេតុការណ៍បើករថយន្តយកដុំថ្មគប់ទៅលើជនរងគ្រោះនេះបានកើតនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី៥ ខែមេសា ស្ថិតនៅចំណុចមុខផែស្ងួត ឡោ ស៊ុនជាង តាមបណ្តោយផ្លូវជាតិលេខ៥៧A ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។ រហូតដល់រសៀលថ្ងៃទី៦ ខែមេសា នគរបាលបានធ្វើការឃាត់ខ្លួនជនសង្ស័យម្នាក់ និងបក្ខពួក២នាក់ ។
ប្រភពព័ត៌មានបានឱ្យដឹងថា មានករណីអំពើហិង្សាមួយបានកើតឡើងបង្កដោយអ្នកបើកបររថយន្តឈ្មោះ ប៊ុន ចាន់បូរ៉ា ភេទប្រុស អាយុ១៦ឆ្នាំ រស់នៅភូមិប៉ាហ៊ីខាងជើង សង្កាត់ប៉ៃលិន ក្រុងប៉ៃលិន ជាអ្នកលក់ដូរ និងបក្ខពួក២នាក់ទៀត មិនទាន់ស្គាល់អត្តសញ្ញាណ ដោយពួកគេបានធ្វើសកម្មភាពយកដុំថ្មគប់ចេញពីក្នុងរថយន្ត សំដៅទៅលើជនរងគ្រោះខាងលើ ដែលកំពុងតែជិះម៉ូតូជាមួយមិត្តភក្តិនៅតាមផ្លូវជាតិ បណ្តាលឱ្យចំក្បាលផ្នែកខាងមុខដួលម៉ូតូសន្លប់បាត់ស្មារតី ។
ប្រភពបន្តទៀតថា ក្រោយពេលកើតហេតុត្រូវបានមិត្តភក្តិរួមដំណើរដឹកយកមកសង្គ្រោះនៅមន្ទីរពេទ្យបង្អែកខេត្តប៉ៃលិន ។ នៅថ្ងៃបន្ទាប់នគរបាលនៃស្នងការដ្ឋានខេត្តបានធ្វើការស្រាវជ្រាវរហូតឈានដល់ឃាត់ខ្លួនល្មើសទាំង៣នាក់ បញ្ជូនទៅស្នងការដ្ឋាននគរបាលខេត្តដោះស្រាយតាមផ្លូវច្បាប់ ។ ចំណែកស្ត្រីម្នាក់ ឈ្មោះ ស៊ន សៀង អាយុ៣៦ឆ្នាំ ត្រូវជាម្តាយជនរងគ្រោះបានរៀបរាប់ថា កូនប្រុសរបស់គាត់មិនធ្លាប់មានគំនុំជាមួយជនទាំងនោះទេ គាត់សង្ស័យថា ប្រហែលជាពួកគេគប់ច្រឡំ ខណៈកូនប្រុសគាត់ជិះម៉ូតូជាមួយមិត្តភក្តិម្នាក់ឆ្ពោះទៅលិច ដើម្បីទៅលេងនៅព្រំដែន រហូតដល់រំលងអធ្រាត្រ ទើបនាំគ្នាជិះម៉ូតូត្រឡប់មកផ្ទះវិញស្រាប់តែក្រុមទំនើងទាំងនោះបើករថយន្តដេញគប់ទៅលើកូនប្រុសរបស់គាត់បណ្តាលឱ្យចំថ្ងាសដួលម៉ូតូសន្លប់បាត់ស្មារតី ហើយក៏ត្រូវមិត្តភក្តិដឹកទៅសង្គ្រោះភ្លាមៗរួចទូរស័ព្ទហៅគាត់ជាម្តាយឱ្យទៅមើល ។
លុះព្រឹកឡើងគាត់ក៏បានទៅដាក់ពាក្យបណ្តឹងនៅស្នងការដ្ឋានខេត្ត ឱ្យតាមរកជនល្មើសទាំងនោះ ចាប់ខ្លួនយកមកចាត់ការតាមផ្លូវច្បាប់។ ស្ត្រីដដែលបានបញ្ជាក់ថា ក្រោយពេលឃាត់ខ្លួនជនល្មើស គាត់ក៏សម្រួលជាមួយនឹងឪពុកម្តាយជនដៃដល់ ព្រោះស្គាល់រាប់អានគ្នា ដោយឱ្យគេបង់ប្រាក់ថ្លៃព្យាបាលរបួសកូនប្រុសរបស់គាត់ត្រឹមតែ៤០០ដុល្លារបញ្ចប់រឿងតែម្តង ៕
ចែករំលែកព័តមាននេះ