រាជធានីភ្នំពេញ ៖ ដោយមើលឃើញពីភាពជោគជ័យ និងទេពកោសល្យសិល្បៈ តារាចម្រៀងចំនួនបីដួងដែលសាងភាពភ្ញាក់ផ្អើលតាមរយៈបទចម្រៀងស្នាដៃខ្លួនឯង រួមមានកញ្ញាអេដា លោកហេង ពិទូ និងលោកសួនពិសិដ្ឋ ត្រូវស្ថានីយទូរទស្សន៍បាយ័នផ្តល់តំណែងដ៏សំខាន់មួយស្វែងរកពន្លកសិល្បៈកើតចេញពីកម្មវិធី The Melody ដែលស្ថានីយមួយនេះទើបតែបង្កើតឡើង ។
កាលពីរសៀលថ្ងៃទី៣ មេសា ឆ្នាំ២០១៨នាស្ថានីយទូរទស្សន៍បាយ័នស្ទឹងមានជ័យរៀបចំសន្និសីទសារព័ត៌មានមួយ ដើម្បីប្រកាសដល់សាធារណជនបានដឹងថា ក្រោយពិធីបុណ្យចូលឆ្នាំខ្មែរនឹងបង្ហាញកម្មវិធីប្រឡងចម្រៀងថ្មីមួយក្រោមការសម្រិតសម្រាំងយ៉ាងពិសេសពុំធ្លាប់មាន ជាស្នាដៃគំនិតខ្មែរផលិតឡើង ។ នាឱកាសនោះមានការចូលរួមពីតារាចម្រៀង ពិធីករប្រចាំស្ថានីយ អ្នកដឹកនាំ និងបណ្តាអ្នកសារព័ត៌មាន ។
កម្មវិធីថ្មីនេះមានឈ្មោះថា «The Melody »ជាកម្មវិធីដែលផ្តល់ឱកាសដល់បេក្ខជនបេក្ខនារីប្រឡងចម្រៀងបទ Original Song ដែលមិនត្រឹមតែយកបទទាំងនោះទេ ហើយបើបេក្ខជនចេះនិពន្ឋចម្រៀង និពន្ឋបទភ្លេងក៏មានឱកាសគឺមានគ្រូបង្វឹកចាំចង្អុលបង្ហាញដើម្បីបើកផ្លូវលើវិថីសិល្បៈ ។ ជាពិសេសបេក្ខជនត្រូវចម្រាញ់ជ្រើសរើសពីក្រុមគណៈកម្មការដែលល្បីឈ្មោះខាងចម្រៀងអូរីជីណល គឺលោកហេង ពិទូ កញ្ញាអេដា និងលោកសួន ពិសិដ្ឋ ។ ក្រៅពីនោះមានក្រុមតន្ត្រីករដ៏មានបទពិសោធន៍ចំនួន៦នាក់ទៀតរង់ចាំតាមដានវិនិច្ឆ័យដែលដាក់ឈ្មោះថា Composers ត្រូវសម្រេចប្រជុំជ្រើសរើសអ្នកដែលមានទេពកោសល្យ និងសមត្ថភាពសម្រាប់ទៅវគ្គបន្តបន្ទាប់ ។
កញ្ញាអេដាតារាចម្រៀងដែលជាប់ឈ្មោះថាតារាOriginal Songដ៏លេចធ្លោបានឲ្យដឹងថាបេក្ខជនត្រូវមានសិទ្ឋិចូលរួមប្រកួតបានចាប់ពីវ័យ១៦ឆ្នាំដល់៣៥ឆ្នាំ ។ លើសពីនេះបើគាត់ជាអ្នកចម្រៀង Original Song មិនមានឈ្មោះបោះសំឡេងជាអ្នកចម្រៀឯករាជ្យក៏មានសិទ្ឋិប្រឡងដែរ ។ បើមានសំឡេងល្អ តែខ្សោយការតែងនិពន្ឋទំនុកច្រៀង បទភ្លេងគឺកុំបារម្ភមានComposersចាំជួយ ។
លោកហេង ពិទូ ជាតារាចម្រៀង និងជាគណៈកម្មការនិយាយថា«សម្រាប់ខ្ញុំមានក្តីរំពឹងថាជោគជ័យដែរ តែមិនទាន់អាចថាទាំងស្រុងទេ ព្រោះជាកម្មវិធីលើកទី១ ប៉ុន្តែក្រោយពីបងប្អូនទស្សនាយល់ច្រើន ពិតជាឲ្យតម្លៃ ហើយបន្តគាំទ្រកម្មវិធីកើតចេញពីគំនិតកូនខ្មែរ ពិតៗ ។អ្វីដែលសំខាន់សូមបេក្ខជនដែលមានសមត្ថភាពអាចមកជាក្រុមក៏បាន មកប្រឡងទោលតែឯងក៏បាន ហើយបទចម្រៀងលើកមកច្រៀងបើចេះរៀបចំបញ្ចូលឧបករណ៍ភ្លេងខ្មែរដាក់នៅក្នុងបទចម្រៀងរឹតតែប្រសើរ »។
កម្មវិធី «the melody»មានរយៈពេលជាង៥ខែចាក់ផ្សាយនៅលើកញ្ចក់ទូរទស្សន៍បាយ័នចាប់ពីថ្ងៃទី២១ មេសា ឆ្នាំ២០១៨វេលាម៉ោង៨យប់ដល់១០យប់រាល់ថ្ងៃសៅរ៍ ។ បាយ័នមានជំហរផលិតស្នាដៃកូនខ្មែរក្រោយយល់ថាកម្មវិធីបរទេស ធំៗជាច្រើនវាយលុកនៅតាមទូរទស្សន៍ ៕
ចែករំលែកព័តមាននេះ