ប្រទេសលីប៊ី ៖ យោងតាមអត្ថបទវិភាគមួយថា ការបោះឆ្នោតប្រធានាធិបតីលីប៊ី ដែលអាចធ្វើមុនដំណាច់ឆ្នាំនេះក្រោមការឧបត្ថម្ភរបស់អង្គការសហប្រជាជាតិ(អ.ស.ប) នឹងអាចកំណត់ពីការវិលត្រឡប់របស់លោក SAIF AL ISLAM កូនប្រុសរបស់លោកមូអាម៉ា…
ប្រទេសលីប៊ី ៖ យោងតាមអត្ថបទវិភាគមួយថា ការបោះឆ្នោតប្រធានាធិបតីលីប៊ី ដែលអាចធ្វើមុនដំណាច់ឆ្នាំនេះក្រោមការឧបត្ថម្ភរបស់អង្គការសហប្រជាជាតិ(អ.ស.ប) នឹងអាចកំណត់ពីការវិលត្រឡប់របស់លោក SAIF AL ISLAM កូនប្រុសរបស់លោកមូអាម៉ា កាដាហ្វី មកកាន់អំណាចជាថ្មីឬយ៉ាងណា ។
មនុស្សជំនិតម្នាក់របស់កូនប្រុសលោកកាដាហ្វីរូបនេះ ទើបប្រកាសពីការឈរឈ្មោះរបស់គេ ។ មនុស្សជំនិតរូបនេះគឺលោក AYMEN BOURAS ក្នុងសន្និសីទសារព័ត៌មានមួយកាលពីថ្ងៃទី១៩ ខែមីនា នៅទីក្រុងទុយនីស រដ្ឋធានីទុយនីស៊ី ថ្លែងថា លោក SAIF AL ISLAM កូនប្រុសទី២របស់លោកមូអាម៉ា កាដាហ្វី នឹងជាបេក្ខជនក្នុងការបោះឆ្នោតប្រធានាធិបតីលីប៊ី ដែលនឹងរៀបចំធ្វើនាដំណាច់ឆ្នាំ២០១៨នេះ ក្រោមការឧបត្ថម្ភរបស់ អ.ស.ប ។
លោក AYMEN BOURAS បន្តថា លោក SAIF AL ISLAM KADHAFI តាមពិតទៅពុំចង់បានអំណាចទេ ក៏ប៉ុន្តែលោកឈរឈ្មោះធ្វើប្រធានាធិបតី ដើម្បីជួយសង្គ្រោះលីប៊ី ។ ទស្សនៈនយោបាយរបស់លោក គឺផ្តោតលើសន្តិសុខ និងសង្គមសម្រាប់លីប៊ី ។
លោកនឹងឈោងចាប់ដៃជាមួយអ្នកដែលចង់ឱ្យមានរឿងល្អសម្រាប់លីប៊ីក្នុងកម្រិតជាតិ
តំបន់ និងអន្តរជាតិ ។ លោកបញ្ជាក់ថា កូនប្រុសលោកកាដាហ្វីរូបនេះ នឹងចូលរួមក្នុងជីវិតនយោបាយរបស់ប្រទេស ដើម្បីកសាងលីប៊ីឡើងវិញ ។ កម្មវិធីនយោបាយរបស់លោកផ្តោតលើការកសាងប្រទេសឡើងវិញ ជាមួយជំនួយរបស់បណ្តាប្រទេសជិតខាងលីប៊ី ។
មនុស្សជំនិតរូបនេះបន្តថា លោក SAIF AL ISLAM ពេលនេះមានសេរីភាពទាំងស្រុងក្នុងការដើរហើរ ហើយមានសិទ្ធិតាមច្បាប់គ្រប់យ៉ាង ។ បច្ចុប្បន្ន លោកស្ថិតនៅក្នុងប្រទេសលីប៊ី ហើយលោកមិនចាកចេញចោលស្រុកឡើយ ។ កូនប្រុសលោកកាដាហ្វីរូបនេះ នឹងថ្លែងដោយផ្ទាល់ទៅកាន់ពលរដ្ឋលីប៊ីនាពេលខាងមុខឆាប់ៗនេះ ដើម្បីប្រកាសពីកម្មវិធីបោះឆ្នោតរបស់លោក ។
ចំណែកមេធាវីរបស់លោក SAIF AL ISLAM គឺលោក KHALED EL GHOUIL ថ្លែង
ថា បេក្ខជនរូបនេះនឹងដាក់សំណុំរឿងឈរឈ្មោះពេលបើកដំណើរការដាក់ពាក្យ ហើយលោកបញ្ជាក់ថា ពលរដ្ឋលីប៊ីមានសិទ្ធិធ្វើការជ្រើសរើស ។
យោងតាមកាសែត AL SHARQ AWSAT ថា លោក SAIF AL ISLAM KADHAFI ជាឥស្សរជននយោបាយទី២ ដែលប្រកាសរួចហើយពីការឈរឈ្មោះសម្រាប់ការបោះឆ្នោតប្រធានាធិបតីលីប៊ីនាពេលខាងមុខ បន្ទាប់ពីលោក ARIF ALI AL NAYEDH អតីតឯកអគ្គរដ្ឋទូតលីប៊ីប្រចាំអេមីរ៉ាត់អារ៉ាប់រួម ៕
ចែករំលែកព័តមាននេះ