រាជធានីភ្នំពេញ ៖ កាលពីថ្ងៃទី៥ មេសា ឆ្នាំ២០១១ នៅទីស្ដីការក្រសួងសុខាភិបាល លោកម៉ម ប៊ុនហេង រដ្ឋមន្ដ្រីក្រសួងសុខាភិបាល និងលោកគ្រីស្យង់ កូណង់ ឯកអគ្គរដ្ឋទូតបារាំងប្រចាំកម្ពុជា បានចុះហត្ថលេខាលើកិច្ចព្រមព្រៀងមួយស្ដីពីការផ្ដល់ជំនួយដល់សាកលវិទ្យាល័យវិទ្យាសាស្ដ្រសុខាភិបាល ដែលមានទឹកប្រាក់ចំនួន៨០០.០០០អឺរ៉ូ (ប្រហែល១,១៣៥លានដុល្លារ)
រាជធានីភ្នំពេញ ៖ កាលពីថ្ងៃទី៥ មេសា ឆ្នាំ២០១១ នៅទីស្ដីការក្រសួងសុខាភិបាល លោកម៉ម ប៊ុនហេង រដ្ឋមន្ដ្រីក្រសួងសុខាភិបាល និងលោកគ្រីស្យង់ កូណង់ ឯកអគ្គរដ្ឋទូតបារាំងប្រចាំកម្ពុជា បានចុះហត្ថលេខាលើកិច្ចព្រមព្រៀងមួយស្ដីពីការផ្ដល់ជំនួយដល់សាកលវិទ្យាល័យវិទ្យាសាស្ដ្រសុខាភិបាល ដែលមានទឹកប្រាក់ចំនួន៨០០.០០០អឺរ៉ូ (ប្រហែល១,១៣៥លានដុល្លារ)។
ជំនួយហិរញ្ញវត្ថុថ្មីរបស់ស្ថានទូតបារាំងនេះ មានគោលបំណងសំខាន់ចំនួនពីរ គឺជួយធ្វើឱ្យគុណភាពនៃការបង្រៀននៅសាកលវិទ្យាល័យវិទ្យាសាស្ដ្រសុខាភិបាលឈានដល់កម្រិតអន្ដរជាតិ និងជួយសាកលវិទ្យាល័យនេះឱ្យមានលទ្ធភាពបង្រៀនបន្ដ ដោយធនធានរបស់ខ្លួនផ្ទាល់។ មធ្យោបាយនានាដែលត្រូវបង្កើតឡើងតាមរយៈគម្រោងនេះ នឹងអនុញ្ញាតឱ្យធ្វើការបណ្ដុះបណ្ដាលសាស្ដ្រាចារ្យឱ្យបានចំនួនគ្រប់គ្រាន់ ព្រមទាំងធ្វើការបណ្ដុះបណ្ដាលដោយអនុវត្ដជាក់ស្ដែង ជាពិសេសតាមរយៈការចុះធ្វើកម្មសិក្សាគ្លីនិក ។
ដោយរួមចំណែកធ្វើការបណ្ដុះបណ្ដាលសាស្ដ្រាចារ្យផ្នែកសុខាភិបាលផង បង្កើតនូវមុខវិជ្ជាឯកទេសវេជ្ជសាស្ដ្រថ្មីផង និងកែលម្អការបណ្ដុះបណ្ដាលគ្រូពេទ្យជំងឺទូទៅផង គម្រោងនេះនឹងជួយគាំទ្រដល់ក្រសួងសុខាភិបាល និងសាកលវិទ្យាល័យវិទ្យាសាស្ដ្រសុខាភិបាល ក្នុងការធ្វើទំនើបកម្មប្រព័ន្ធសុខាភិបាលកម្ពុជា ។
កិច្ចព្រមព្រៀងថ្មីនេះជាផ្នែកមួយនៃកិច្ចសហប្រតិបត្ដិការផ្នែកឧត្ដមសិក្សា ដែលបានដាក់ឱ្យអនុវត្ដតាំងពីឆ្នាំ១៩៩៣ ដោយស្ថានទូតបារាំងក្នុងវិស័យសុខាភិបាល សំដៅបង្កើតឡើងវិញនូវឧត្ដមសិក្សាសាធារណៈប្រកបដោយគុណភាព ។ គម្រោងថ្មីនេះនឹងជួយពង្រឹងគម្រោងសុខាភិបាលចំនួនពីរទៀត ក្នុងចំនួនទឹកប្រាក់១,៧លានអឺរ៉ូ (ស្មើនឹង២,៤លានដុល្លារ) ដែលត្រូវ បានដាក់ឱ្យអនុវត្ដក្នុងអំឡុងឆ្នាំ២០០០-២០១០៕
ចែករំលែកព័តមាននេះ