រាជធានីភ្នំពេញ ៖ អតីតតារាភាពយន្តលោកចៅ ចណ្ណារី កំពុងតែរស់នៅក្នុងជីវភាពដុនដាបខ្លាំង ជាមួយនឹងវ័យចំណាស់ និងញាំញីដោយជំងឺ បន្ទាប់ពីលោកបោះបង់អាជីពសម្តែងជាច្រើនឆ្នាំកន្លងមក ។ លោកចៅ…
រាជធានីភ្នំពេញ ៖ អតីតតារាភាពយន្តលោកចៅ ចណ្ណារី កំពុងតែរស់នៅក្នុងជីវភាពដុនដាបខ្លាំង ជាមួយនឹងវ័យចំណាស់ និងញាំញីដោយជំងឺ បន្ទាប់ពីលោកបោះបង់អាជីពសម្តែងជាច្រើនឆ្នាំកន្លងមក ។
លោកចៅ ចណ្ណារី ត្រូវតារាកំប្លែងនាយ កុយ ប្រទះឃើញដោយចៃដន្យមួយនៅតាមផ្លូវក្នុងខេត្តក្រចេះ កាលពីពេល ថ្មីៗកន្លងមកនៅពេលអតីតតារាភាពយន្តរូបនេះឈរលក់ខោលអាវជជុះ ជាមួយរូបរាងស្លេកស្លាំង ខុសកាលពីលោកនៅសម្តែង ។
តារាកំប្លែងនាយកុយ ប្រាប់កោះសន្តិភាពថា លោកបានជួបជាមួយលោកចៅ ចណ្ណារី ដោយចៃដន្យនៅតាមដងផ្លូវ ហើយលោកស្ទើរតែមិនចង់ស្គាល់ថា ជាលោកចៅ ចណ្ណារី។ អតីតតារាភាពយន្តរូបនេះស្ថិតក្នុងសភាពរាងកាយស្គម ឈរលក់ខោអាវជជុះ នៅពីមុខផ្ទះដ៏តោកយ៉ាកមួយនាខេត្តក្រចេះ ។
បើតាមនាយកុយ អំឡុងពេលដែលលោកបានជួបនោះ លោកមិនសួរនាំដំណើរដើមទង ពីការរស់នៅដ៏កម្សត់របស់លោកចៅ ចណ្ណារី ទេ ដោយសារតែលោកគ្មានពេល ប៉ុន្តែលោកបានស្នើសុំឲ្យលោកមកភ្នំពេញ ដើម្បីឲ្យសមាគមសិល្បករខ្មែរជួយតាមលទ្ធភាព។
នាយកុយ លើកឡើងថា «ខ្ញុំបានស្នើឲ្យលោកចៅ ចណ្ណារី មកភ្នំពេញ ក្រែងមានឱកាសបានថតឡើងវិញ ប៉ុន្តែអតីតតារាសម្តែងរូបនេះហាក់មានការខ្មាសអៀន ក្នុងពេលដែលលោកកាន់តែមានវ័យចាស់ជរា និងប្រែរូបរាងខុសពីមុនឆ្ងាយ » ។
ក្នុងសភាពដែលឃើញលោកចៅ ចណ្ណារី ក្រលំបាកនេះ នាយកុយ បានប្រាប់លេខទូរស័ព្ទរបស់លោកទៅឲ្យអតីតតារាភាពយន្តរូបនេះសម្រាប់ទាក់ទង ពេលមកភ្នំពេញ ។ តាមគម្រោងលោកចៅ ចណ្ណារី នឹងមកភ្នំពេញនាពេលដ៏ខ្លីខាងមុខនេះ ដើម្បីពិនិត្យព្យាបាលជំងឺ។ ពេលនោះនាយកុយនឹងទាក់ទងទៅសមាគមសិល្បករខ្មែរដែលមានអ្នកនាងចន ចន្ទ័លក្ខិណា ជាប្រធាន ដើម្បីជួយដល់អតីតតារាភាពយន្តជើងចាស់រូបនេះទៅតាមលទ្ធភាព ។
លោកចាន់ ចណ្ណារី បានបង្ហាញវត្តមានសម្តែងចុងក្រោយតាមរយៈខ្សែភាពយន្តរឿង «កូនពស់កេងកង» របស់អ្នកដឹកនាំរឿងលោក ហ្វៃ សំអាង បន្ទាប់ពីតារារូបនេះបានសាងកេរ្តិ៍ឈ្មោះតាមរយៈខ្សែភាពយន្តខ្មែរតាំងពីអំឡុងឆ្នាំ៨០ និង៩០មក ។
លោកចៅ ចណ្ណារី តួសម្តែងជំនាន់គ្នាជាមួយ តារាជើងចាស់ជាច្រើនទៀតដូចជា លោកសម វិទ្យា ,លោកសម តារា ,លោកកេត សូបូរិទ្ធ, លោកយស បូវណ្ណៈ, លោកខៃ ប្រសិដ្ឋ, លោកខៃ ប្រសើរ និងលោកខ្លូត រតនា ជាដើម ។ លោកចៅ ចណ្ណារី កាលពីអំឡុងពេលនោះមានវ័យច្រើនជាងគេ ក្នុងចំណោមតារាសម្ដែងផ្នែកបុរស ។ លោកបានលាឈប់ពីការសម្តែងជាង២០ឆ្នាំមកហើយ ធ្វើឱ្យទស្សនិកជនសឹងតែភ្លេចមុខលោកទៅហើយ ។
បច្ចុប្បន្នលោកចៅ ចណ្ណារី មានវ័យ៦៤ឆ្នាំ កំពុងតែរស់នៅក្នុងជីវភាពដ៏លំបាក បន្ទាប់ពីលោកចាកចេញឆ្ងាយពីអាជីពសម្តែង និងបន្តជីវិតរស់នៅក្នុងភាពលាក់បាំងពីភ្នែកទស្សនិកជន ៕
ចែករំលែកព័តមាននេះ