ខេត្តកណ្ដាល ៖ សេចក្តីរាយការឲ្យដឹងថា កាលពីម៉ោង៩យប់ថ្ងៃទី០៧ ខែមេសា ឆ្នាំ២០១៨ មានករណីបុរសម្នាក់អង្គុយផឹកកាហ្វេនៅក្នុងហាងកាហ្វេមួយកន្លែង ស្ថិតនៅភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្តាល ស្រាប់តែគាំងបេះដូងស្លាប់ ។
ជនរងគ្រោះឈ្មោះ ឆឹង សុខុម ភេទប្រុស អាយុ៤១ឆ្នាំ មុខរបរគ្រូបង្រៀននៅសាលាបឋមសិក្សា ហ៊ុន សែន ខ្ពបវែង ទីលំនៅភូមិតាខ្មៅ សង្កាត់ព្រែកសំរោង ក្រុងតាខ្មៅ ។ ជនរងគ្រោះពាក់អាវសាច់ក្រណាត់ដៃវែងពណ៌ស បៃតង ប្រផេះ ឆ្នូត ស្លៀកខោសាច់ក្រណាត់ពណ៌ខ្មៅ ។
តាមការបំភ្លឺរបស់ឈ្មោះ ហេង លី ភេទស្រី អាយុ២៥ឆ្នាំ មុខរបរលក់កាហ្វេ ស្ថិតនៅភូមិកើតហេតុខាងលើ បានឲ្យសមត្ថកិច្ចដឹងថា នៅវេលាម៉ោង២រសៀលជនរងគ្រោះបានមកចូលហាងកាហ្វេដោយមានកាន់បាយ មួយប្រអប់ដែលជនរងគ្រោះបានទិញពីខាងក្រៅមក ។ ពេលមកដល់ហាងកាហ្វេគាត់បានអង្គុយហូបបាយនៅលើតុធម្មតា លុះពេលហូបបាយរួចគាត់ក៏បានហៅតែក្រូចឆ្មាមួយកែវបន្ទាប់មកអង្គុយផឹកបណ្តើរ និង មើលទូរទស្សន៍បណ្តើរ ។
រហូតដល់ម៉ោងប្រហែល៩យប់ហាងកាហ្វេតម្រូវរៀបចំកៅអីតុបិទហាងដូចថ្ងៃធម្មតា ពេលនោះក៏បានឃើញជនរងគ្រោះដេកនៅប៉ាវអ៊ីផ្អែក ម្ចាស់ហាងបាននាំគ្នាដាស់គាត់ឲ្យភ្ញាក់ម្តងហើយម្តងទៀតតែគាត់មិនភ្ញាក់ ទើបសង្ស័យបានប្តឹងទៅសមត្ថកិច្ចឲ្យចុះមកពិនិត្យបានដឹងថា ជនរងគ្រោះបានស្លាប់បាត់ទៅហើយ ។
តាមរយៈកាមេរ៉ាសុវត្ថិភាពក្នុងហាងមើល ឃើញថា ជនរងគ្រោះមានកាយវិការត្រដរខ្យល់មុនដាច់ខ្យល់ស្លាប់ ។ តាមការពិនិត្យសាកសពរបស់សមត្ថកិច្ចនគរបាលជំនាញបច្ចេកទេសខេត្តកណ្តាល និងផ្នែកពិនិត្យវិភាគកន្លែងកើតហេតុក្រុងតាខ្មៅ អាជ្ញាធរដែលពាក់ព័ន្ធ រួមទាំងលោកគ្រូពេទ្យកោសល្យវិច្ច័យខេត្តសន្និដ្ឋានថា នៅលើដងខ្លួនសាកសពមិនមានស្នាកស្នាមអ្វីគួរឲ្យកត់សំគាល់ឡើយ ដូច្នោះជនសង្ស័យពិតជាស្លាប់ដោយសារគាំងបេះដូងប្រាកដមែន ។ ក្រោយពិនិត្យបានចប់សព្វគ្រប់សពបានយករក្សាទុក នៅសាលមន្ទីរពេទ្យជ័យជំនះរង់ចាំក្រុមគ្រួសារដើម្បីទៅទទួលយកធើ្វបុណ្យតាមប្រពៃណី ៕
ចែករំលែកព័តមាននេះ