រាជធានីភ្នំពេញ ៖ នេះជាលើកទីមួយហើយនៃប្រវត្តិសាស្ត្ររបស់កម្ពុជា ក្នុងការដាក់ឲ្យដំណើរការសេវាដឹកអ្នកដំណើរតាមផ្លូវទឹករបស់រដ្ឋ ដោយចាប់ពីព្រែកព្នៅ ដល់ក្រុងតាខ្មៅ ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា ការដាក់ឱ្យដំណើរការគម្រោងដឹកអ្នកដំណើរតាមផ្លូវទឹកពីព្រែកព្នៅ-តាខ្មៅ នៅថ្ងៃនេះ (ថ្ងៃទី៦ មេសា ឆ្នាំ២០១៨) គឺជាថ្ងៃប្រវត្តិសាស្ត្រមួយ ដែលពីមុនមិនធ្លាប់មានទេសម្រាប់ប្រទេសកម្ពុជា ហើយក៏ជាការឆ្លើយតបតាមការសន្យាជាមួយប្រជាពលរដ្ឋនាពេលកន្លងមកដែរ ។
ថ្លែងក្នុងពិធីដាក់ដំណើរការកាណូតដឹកអ្នកដំណើរសាកល្បងពីព្រែកព្នៅ-តាខ្មៅ កាលពីម្សិលមិញ លោកទេសរដ្ឋមន្ត្រី មានប្រសាសន៍ថា ៖« ប្រវត្តិសាស្ត្រជាតិយើងពីមុនមិនដែលធ្លាប់មានទេ ការដឹកជញ្ជូនអ្នកដំណើរតាមកាណូតបែបនេះ ។ លើសពីនេះ ក៏ជាថ្ងៃឆ្លើយតបតាមការសន្យារបស់ក្រសួងសាធារណការ និងដឹកជញ្ជូន ជាមួយប្រជាពលរដ្ឋ យើងនឹងដាក់ឱ្យដំណើរការជាបណ្តោះអាសន្នឱ្យបានមុនចូលឆ្នាំខ្មែរ » ។
លោកបន្ដថា ៖« ម្យ៉ាងវិញទៀត សម្តេចតេជោ ហ៊ុន សែន នាយករដ្ឋមន្ត្រី បានអនុញ្ញាតឱ្យប្រជាពលរដ្ឋជិះដោយឥតគិតថ្លៃចាប់ពីថ្ងៃនេះរហូតដល់ដាច់ខែកក្កដាខាងមុខ ជាមួយកាណូត៣គ្រឿង ដោយក្នុង១គ្រឿងអាចផ្ទុកមនុស្សបានពីចាប់ពី៥៤ដល់៦០នាក់ ។
ស្ថានីយដែលអាចដឹកអ្នកដំណើរបានពេលនេះមានចំនួន៤កន្លែង ក្នុងចំណោមស្ថានីយទាំង៦ ចាប់ពីម៉ោង៥និង៣០នាទីព្រឹក រហូតដល់ម៉ោង៥និង៣០នាទីល្ងាច និងពីស្ថានីយមួយទៅស្ថានីយមួយទៀតអាចប្រើពេល១០នាទី និងឈប់ចតឲ្យអ្នកដំណើរចេញ-ចូលនៅស្ថានីយតិចជាង១០នាទី ដោយលើទូកនីមួយៗមានអាវពោងសុវត្ថិភាពសម្រាប់ការពារអាយុជីវិតបងប្អូនថែមទៀត » ។
លោកទេសរដ្ឋមន្ត្រីបញ្ជាក់ថា ៖« ស្ថានីយទាំងអស់មានចំនួន៦កន្លែង ក្នុងនោះមាន ស្ថានីយព្រែកព្នៅ, ឫស្សីកែវ, ផ្សារចាស់,ចតុមុខ, ច្បារអំពៅ និងតាខ្មៅ ប៉ុន្តែការដាក់ឱ្យដំណើរការសាកល្បងពេលនេះ យើងទើបតែដាក់៤ស្ថានីយទេ (លើកលែងតែស្ថានីយព្រែកព្នៅ និងស្ថានីយច្បារអំពៅ) ដោយសារការសាងសង់ពុំទាន់ចប់សព្វគ្រប់១០០%នៅឡើយ » ។
លោកលើកឡើងថា ៖« ក្រៅពីនេះ យើងខ្ញុំកំពុងតែគិតគូរពង្រីកខ្សែរត់បន្ថែមទៀត ដូចជា ទន្លេមេគង្គលើ ទៅដល់ស្ពានព្រែកតាមាក់, មេគង្គក្រោម អាចទៅដល់កំពង់ផែស្វយ័តភ្នំពេញ និងតាមទន្លេបាសាក់ យើងអាចបន្តពីតាខ្មៅទៅស្អាង និងកោះធំបាន ទៅតាមស្ថានភាពជាក់ស្តែងរបស់ប្រជាពលរដ្ឋដែលធ្វើដំណើរតាមផ្លូវទឹកនេះ ។
ម្យ៉ាងវិញទៀត យើងកំពុងតែខិតខំប្រឹងប្រែងឲ្យមានសេវាដឹកទំនិញតាមផ្លូវទឹកផងដែរ ទៅតាមអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន ជំរុញឲ្យមានការដឹកជញ្ជូនតាមផ្លូវទឹក ទាំងមនុស្ស និងទំនិញ ព្រោះប្រទេសជាតិយើងសម្បូរផ្លូវទឹកច្រើនណាស់ដែលពុំទាន់ប្រើអស់សក្ដានុពលនោះទេ » ។
ទីប្រឹក្សាជាន់ខ្ពស់ផ្នែកសេដ្ឋកិច្ចនៃក្រុមហ៊ុន Emerging Markets Consulting លោក ង៉ែត ជូ មានប្រសាសន៍កាលពីពេលថ្មីៗនេះថា គម្រោងដឹកអ្នកដំណើរតាមផ្លូវទឹកនេះ វានឹងផ្តល់ជាជម្រើសថ្មីមួយទៀតសម្រាប់អ្នកដំណើរ ហើយជាជម្រើសល្អ ។
លោកថ្លែងថា ៖« នៅពេលខាងមុខ បើការធ្វើដំណើរតាមផ្លូវគោកកាន់តែពិបាក និងចំណាយពេលច្រើននោះ ប្រជាពលរដ្ឋនឹងផ្លាស់ប្តូរឥរិយាបថរបស់ខ្លួនមកទទួលសេវាតាមផ្លូវទឹកវិញ ព្រោះអ្នកធ្វើដំណើរតែងតែចង់បានការធ្វើដំណើរមានភាពងាយស្រួលគ្រប់ពេល » ។
លោកទេសរដ្ឋមន្ត្រី មានប្រសាសន៍ថា ៖«ការធ្វើដំណើរតាមផ្លូវទឹកនេះ វាជួយកាត់បន្ថយការកកស្ទះ និងកាត់បន្ថយគ្រោះថ្នាក់នៅលើដងផ្លូវ ។ យើងអាចជិះពីស្ថានីយឫស្សីកែវ ទៅតាខ្មៅ ប្រសិនបើយើងជិះរថយន្ដ រ៉ឺម៉កកង់បី ឬម៉ូតូ អាចប្រើរយៈពេលជាង១ម៉ោងកន្លះ ទៅតាមការកកស្ទះចរាចរជាក់ស្តែង ប៉ុន្តែនៅលើផ្លូវទឹករបស់យើងនេះអត់មានការកកស្ទះអ្វីទាំងអស់ យើងទៅបានលឿនជាង ចំណាយពេលមិនដល់១ម៉ោង គឺយើងទៅដល់តាខ្មៅ ហើយចំណាយតិចទៀត » ។
លោកទេសរដ្ឋមន្ត្រីបន្ដថា ៖« ការធ្វើដំណើរតាមកាណូតនេះវាលឿនជាងរថយន្ត ប៉ុន្ដែយើងមិនបង្ខំឱ្យប្រជាពលរដ្ឋត្រូវតែជិះកាណូតទេ តែចង់ឱ្យប្រជាពលរដ្ឋជិះសាកល្បងមើលទៅ តើការជិះតាមប្រភេទណាមានសុវត្ថិភាពជាង ចំណាយតិចជាង និងលឿនជាង ទុកឱ្យប្រជាពលរដ្ឋជ្រើសរើស » ។
តាមការបញ្ជាក់របស់លោកទេសរដ្ឋមន្ត្រី ស៊ុន ចាន់ថុល បន្ទាប់ពីបញ្ចប់ការសាកល្បងរយៈពេល៤ខែនេះទៅ នឹងចាប់ផ្ដើមគិតថ្លៃសេវាដោយចាប់ពីព្រែកព្នៅដល់ក្រុងតាខ្មៅ មានតម្លៃត្រឹមតែ៥.៥០០រៀលប៉ុណ្ណោះ ៕
ចែករំលែកព័តមាននេះ