យោងទៅតាមសេចក្តីរាយការណ៍របស់អ្នកស្រាវជ្រាវបានឲ្យដឹងថា ការដែលស្ត្រីមានក្បាលពោះធំ ជាពិសេសមានរាងកាយដូចផ្លែប៉ោម គឺមានការប្រឈមខ្ពស់នឹងជំងឺគាំងបេះដូង ហើយខ្លាំងជាងមនុស្សដែលធាត់ជ្រុលទៅទៀត។ ខណៈពេលដែលការធាត់ជ្រុលធ្វើឲ្យប្រឈមខ្ពស់នឹងជំងឺគាំងបេះដូងទាំងប្រុសទាំងស្រី តែស្ត្រីដែលមានចង្កេះ ធំៗ និងត្រគាកធំទៀតនោះមានការប្រឈមនឹងជំងឺគាំងបេះដូងខ្ពស់ជាងបុរសដែលមានរាងដូចគ្នាទៅទៀត ។
អ្នកដឹកនាំការស្រាវជ្រាវ Sanne Peters និយាយថា ការស្រាវជ្រាវរបស់យើងបង្ហាញថា ការពិនិត្យទៅលើរបៀបដែលជាលិកាខ្លាញ់រាលដាលក្នុងរាងកាយ ជាពិសេសមនុស្សស្រី អាចជួយឲ្យយើងមើលឃើញកាន់តែច្បាស់នឹងការប្រឈមមុខនឹងជំងឺគាំងបេះដូង ជាងការវាស់ភាពធាត់ជ្រុលទូទៅដូចជា សន្ទស្សន៍ទម្ងន់ធៀបនឹងកម្ពស់ជាដើម ។
ការដែលមានរាងកាយដូចផ្លែសារី ដោយចង្កេះតូច តែធាត់នៅជុំត្រគាក មិនត្រូវបានចាត់ទុកថាប្រឈមនឹងជំងឺគាំងបេះដូងឡើយ ។ ថ្មីៗនេះ វាក៏មិនមានការព្យាបាលខាងផ្នែកវេជ្ជសាស្ត្រណាមួយដែលផ្តោតសំខាន់ទៅលើជាតិខ្លាញ់ច្រើនក្នុងក្បាលពោះដែរ ។
យ៉ាងណាមិញ ការដែលមានការពិនិត្យខ្លាំងក្លាទៅលើការប្រឈមនឹងជំងឺបេះដូងសរសៃឈាម និងជំងឺទឹកនោមផ្អែមលើអ្នកដែលមានរាងផ្លែប៉ោមប្រហែលជាអាចជួយពួកគេការពារជំងឺបេះដូងបាន ជាពិសេសស្ត្រីតែម្តង ។
យោងទៅតាមអង្គការសុខភាពពិភពលោកបានឲ្យដឹងថា ៤០ភាគរយនៃស្ត្រីនៅជុំវិញពិភពលោកគឺជាមនុស្សធាត់ និង១៥ភាគរយជាមនុស្សធាត់ជ្រុល ។ ការធាត់ជ្រុលបង្កើនការប្រឈមនឹងជំងឺគាំងបេះដូង ដែលរឿងនេះនឹងនាំឲ្យមនុស្សស្លាប់ច្រើនជាងគេនៅទូទាំងពិភពលោកដែរ ។ ការធាត់ជ្រុលក៏បង្កើនការកើតជំងឺដាច់សរសៃឈាមខួរក្បាល លើសសម្ពាធឈាម ទឹកនោមផ្អែម និងមហារីកមួយចំនួន ។
ហេតុផលមួយដែលអ្នកស្រាវជ្រាវគាំទ្ររឿងនេះគឺថា ស្ត្រីមានការប្រឈមមុខខ្ពស់ជាងបុរសដោយសារតែស្ត្រីមានអត្រាជាតិខ្លាញ់រាងកាយខ្ពស់ជាងបុរស ។ ដូច្នេះដើម្បីកាត់បន្ថយការប្រឈមមុខ ស្ត្រីគួរតែយល់ដឹងអំពីទម្ងន់ដែលស្ថិតក្នុងស្ថានភាពសុខភាពល្អ និងព្យាយាមសម្រកទម្ងន់នៅពេលដឹងថាខ្លួនឯងធាត់។
សេចក្តីរាយការណ៍នេះត្រូវបានចុះផ្សាយ ក្នុងសារព័ត៌មាន Journal of the American Heart Association ៕
ស្រង់ពីគេហទំព័រសុខភាព
ចែករំលែកព័តមាននេះ