ខេត្តស្វាយរៀង ៖ នៅព្រឹកថ្ងៃទី៧ ខែមេសា ឆ្នាំ២០១៨ លោកជំទាវឧបនាយករដ្ឋមន្ត្រី ម៉ែន សំអន អ្នកតំណាងរាស្ត្រមណ្ឌលស្វាយរៀងបានអញ្ជើញជាអធិបតីក្នុងពិធីជូនពរ អបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំច សំរឹទ្ធិស័ក ព.ស.២៥៦២ គ.ស.២០១៨ ដែលនឹងឈានចូលមកដល់ក្នុងពេលខាងមុខ ដែលពិធីនេះបានរៀបចំឡើងនៅ សាលាខេត្តស្វាយរៀង ដែលមានថ្នាក់ដឹកនាំ នៃខេត្តឡុងអាន ខេត្តតៃនិញ និងខេត្តស្វាយរៀងបានអញ្ជើញចូលរួម និងបានជូនពរគ្នាទៅវិញទៅមកក្នុងនាមជាខេត្តដែលមានព្រំដែនជាប់ជាមួយគ្នា ។
ថ្លែងនៅក្នុងពិធីនោះលោកស្រីក៏បានបញ្ជាក់ថា ការរៀបចំពីធីនេះគឺដើម្បីពង្រឹងនូវទំនាក់ទំនង និងកិច្ចសហប្រតិបត្តិការនៃប្រទេសទាំងពីរដែលមានព្រំដែននៅជាប់គ្នា ។ លោកជំទាវក៏បានថ្លែងអំណរគុណដល់ថ្នាក់ដឹកនាំនៃរាជារដ្ឋាភិបាលវៀតណាម ដែលបានរក្សានូវប្រពៃណី សាសនា ស្នាដៃដែលជាសមិទ្ធិផល នានា ជាពិសេសបានជួយឧបត្ថម្ភគាំទ្រលើការងារមនុស្សធម៌ សម្រាប់ជួយដល់ប្រជាពលរដ្ឋនៅខេត្តស្វាយរៀង ។
លោកស្រីក៏បានស្នើឲ្យអាជ្ញាធរគ្រប់លំដាប់ថ្នាក់ និងអាជ្ញាធរពាក់ព័ន្ធក្នុងខេត្ត ក៏ដូចជានៅទូទាំងប្រទេស ត្រូវបន្តពង្រឹងអនុវត្តន៍ការងារសន្តិសុខសណ្តាប់ធ្នាប់សង្គមឲ្យបានល្អក្នុងឱកាសបុណ្យចូលឆ្នាំថ្មីប្រពៃណីខ្មែរដែលនឹងជិតចូលមកដល់នាពេលខាងមុខនេះ គឺធ្វើយ៉ាងណាឲ្យប្រជាពលរដ្ឋបានសប្បាយរីករាយ និងត្រៀមក្នុងការជួយសង្គ្រោះបន្ទាន់នានា ដែលកើតឡើងជាយថាហេតុ ៕
ចែករំលែកព័តមាននេះ