រាជធានីភ្នំពេញ ៖ បច្ចុប្បន្ននេះ ការផ្គត់ផ្គង់លំនៅឋានពុំទាន់សមាមាត្រនឹងតម្រូវការនៅឡើយ ស្របពេលកំណើនប្រជាសាស្ត្រ និងអ្នកចំណូលមធ្យមកើនឡើងឥតឈប់ឈរ។ ប៉ុន្មានឆ្នាំចុងក្រោយនេះ គេសង្កេតឃើញថា សកម្មភាពសាងសង់បុរី និងការពុះជ្រៀកដីឡូត៍លក់កាន់តែមានសន្ទុះខ្លាំងឡើងគ្រប់ទីកន្លែង ពិសេសនៅជាយរាជធានីភ្នំពេញ សូម្បីតែកន្លែងបញ្ចុះសពដែលមានសុទ្ធតែផ្នូរគួរឲ្យខ្លាចនោះ បច្ចុប្បន្ននេះក្លាយជាបុរី និងដីឡូត៍អស់ហើយដែរ។ ចំណែកប្រជាពលរដ្ឋកំពុងតែរកទទួលទានយ៉ាងរលូន លែងខ្លាចខ្មោចដូចកាលពីជំនាន់ដើមទៀតហើយ ។
បើតាមទំនៀមទម្លាប់ខ្មែរកាលពីបុរាណ បានប្រកាន់យកនូវអបិយជំនឿខ្លាំងណាស់ទៅលើការសាងសង់លំនៅឋានសម្រាប់រស់នៅ ហើយមុននឹងសាងសង់ បានរត់រកគ្រូទស្សន៍ទាយគន់គូរមើលពីទីតាំងដែលត្រូវសង់នោះយ៉ាងល្អិតល្អន់បំផុត ។ និយាយរួម ពុំមែនចេះតែហ៊ានសាងសង់ផ្តេសផ្ដាសដោយចិត្តឯងទេ ជាពិសេស ទីតាំងស្ថិតនៅជិតផ្នូរឬម៉ុងខ្មោច និងជិតខ្ទមអ្នកតា ជាដើម ។ ប៉ុន្តែបើក្រឡេកមកមើលសម័យទំនើបបច្ចុប្បន្នវិញ ដីធ្លីមានតម្លៃថ្លៃកប់ពពក ពិសេសនៅតំបន់សក្ដានុពលសេដ្ឋកិច្ច មិនថាជាទីវាលស្មសានដែលជាទីកន្លែងបញ្ចុះសពទេ បានប្រែក្លាយជាទីប្រជុំជន មានការសាងសង់ផ្ទះសម្បែងរស់នៅយ៉ាងត្រជាក់ត្រជុំសុខដុមរមនាយ៉ាងកក់ក្តៅក្រោមដំបូលសន្ដិភាព និងការអភិវឌ្ឍដែលមានថ្នាក់ដឹកនាំប្រទេសប្រកបដោយគតិបណ្ឌិត ។
ជាក់ស្ដែង នៅជិតទីលានបញ្ចុះសពដ៏ធំមួយនៅមុខវត្តតាភេម ដែលមួយផ្នែកស្ថិតក្នុងសង្កាត់កំបូល និងមួយផ្នែកទៀតស្ថិតក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ គឺមានម៉ុងខ្មោចរាប់ម៉ឺន ដែលតាំងពីដើមមក គ្មានអ្នកណាហ៊ានទៅសង់ផ្ទះរស់នៅទេ តែមកដល់សម័យនេះ មានអ្នកទៅរស់នៅជិតៗនោះបណ្ដើរៗហើយ។ មិនតែប៉ុណ្ណោះ ក៏មានទាំងការពុះដីឡូត៍លក់ និងបង្កើតបុរីសាងសង់ផ្ទះល្វែងលក់ថែមទៀត ។ កន្លែងខ្លះគ្រាន់តែសង់របងខណ្ឌ ដើម្បីបិទបាំងមិនឲ្យមើលឃើញម៉ុងខ្មោចនៅក្បែរផ្ទះប៉ុណ្ណោះ រីឯកន្លែងខ្លះទៀត មិនទាំងបានសាងសង់របងផង ក៏នៅតែលក់ដាច់យ៉ាងគគ្រឹកគគ្រេង ហើយអ្នករកស៊ីពុះដីឡូត៍លក់នៅទីនោះ ក៏កំពុងត្រូវប៉ាន់ដែរ ។
អ្នកពុះដីឡូត៍លក់ដែលសុំអត្ថាធិប្បាយដោយមិនបញ្ចេញឈ្មោះ បានប្រាប់ថា ៖« ខ្ញុំបានពុះដីឡូត៍លក់នៅម្ដុំក្បែរទីលានបញ្ចុះសពជិតវត្តតាភេម សង្កាត់ត្រពាំងក្រសាំង គឺលក់ដាច់បានគួរសម ។ ដីនៅទីនោះក្នុង១ឡូត៍ មានតម្លៃចាប់ពី៧ពាន់ទៅ១៥.០០០ដុល្លារ ហើយមានអតិថិជនទៅទិញជាបន្តបន្ទាប់ ក្រោយពុះជាឡូត៍រួច គឺលក់អស់ មិនដែលសល់ឡើយ » ។
លោកបន្តថា កាលពីមុន លោកនឹកស្មានថា ការទិញដីជិតម៉ុងខ្មោច ហើយពុះជាឡូត៍លក់មិនដាច់ទេ ប៉ុន្តែផ្ទុយទៅវិញ គ្រាន់តែចាប់ផ្ដើមចាក់ដីមិនទាន់បានពុះជាឡូត៍ស្រួលបួលផង មានអតិថិជនទៅកក់លុយមុនបាត់ទៅហើយ ។
តាអាចារ្យបុណ្យសព និងពិធីបុណ្យផ្សេងៗ ដែលមានទីលំនៅក្នុងភូមិរំដួលខាងត្បូង សង្កាត់ស្នោរ ខណ្ឌពោធិ៍សែនជ័យ មានប្រសាសន៍ថា តាមទំនៀមទម្លាប់ និងអបិយជំនឿតាំងពីដូនតាមក គឺតែងប្រកាន់មិនហ៊ានសង់ផ្ទះនៅជិតផ្នូរ ឬម៉ុងខ្មោចមែន ដោយខ្លាចរស់នៅពុំបានសុខ និងមានឧបទ្រពចង្រៃ ជាដើម ប៉ុន្តែទាំងនោះគ្រាន់តែជាអបិយជំនឿតៗគ្នាប៉ុណ្ណោះ ។
លោកតា ហ៊ី ស៊ន ថែមទាំងបានពន្យល់ថា ៖« បើតាមព្រះពុទ្ធសាសនា គ្មានជំនឿបែបនេះទេ ការសាងសង់នៅជិតផ្នូរ ឬម៉ុងខ្មោច គ្មានបញ្ហាអ្វីឡើយ ប៉ុន្តែមុននឹងសាងសង់ យើងត្រូវធ្វើពិធីក្រុងពលីបួងសួងឧបកិច្ចសុំសេចក្ដីសុខពីម្ចាស់ទឹក ម្ចាស់ដី ព្រៃព្រឹក្សា និងព្រលឹងខ្មោចព្រាយបិសាចនៅទីនោះជាមុនសិន ទើបបានសេចក្ដីសុខ ចម្រុងចម្រើន ។ ជាក់ស្ដែង នៅក្នុងភូមិរំដួល កាលពីដើមឡើយ មានទីតាំងមួយចំនួនជាកន្លែងបូជា ឬបញ្ចុះសពដែរ ប៉ុន្តែបច្ចុប្បន្ន បានក្លាយទៅជាកន្លែងសាងសង់លំនៅឋានអស់ហើយ ដូច្នេះ គ្មានបញ្ហាទេ » ។
ដោយឡែក ព្រះតេជគុណ វណ្ណ គង់នៅវត្តពោធិ៍វ័ន សង្កាត់ស្នោរ ខណ្ឌពោធិ៍សែនជ័យ បានមានថេរដីកាដូចគ្នានឹងលោកអាចារ្យដែរ ដោយព្រះអង្គបានលើកឡើងពីអបិយជំនឿដែលកើតឡើងនៅក្នុងសង្គមខ្មែរតាំងពីបុរាណមក ។ ពេលសាងសង់ផ្ទះសម័យមុន គេមិនហ៊ានសង់នៅជិតផ្នូរខ្មោចឡើយ ព្រោះខ្លាចមិនបានសេចក្តីសុខ និងមានរឿងរកាំរកូសផ្សេងៗ ប៉ុន្តែការពិត គ្មានបញ្ហាទេ ឲ្យតែមុនពេលសាងសង់ យើងធ្វើពិធីក្រុងពលីបួងសួងឧបកិច្ចសុំសេចក្ដីសុខពីម្ចាស់ទឹក ម្ចាស់ដី ព្រៃព្រឹក្សា និងព្រលឹងខ្មោចព្រាយបិសាចជាមុនសិន គឺរស់នៅបានសុខហើយ ។
ចំណែកស្ត្រីម្នាក់សុំមិនបញ្ចេញឈ្មោះ និងសុំឲ្យហៅគាត់ថា ម៉ាក់សាយ័ន្ត ជាអ្នករស់នៅជិតម៉ុងខ្មោច ស្ថិតនៅខាងលិចសាលាសង្កាត់ត្រពាំងក្រសាំង និយាយថា អ្នកស្រីមានដើមកំណើតនៅខេត្តព្រៃវែង និងបានមករស់នៅទីនេះជិត១០ឆ្នាំមកហើយ ។
អ្នកស្រីថា ៖« ខ្ញុំរស់នៅទីនេះ បានសុខសប្បាយ មិនដែលឃើញខ្មោចលង ឬមានទុក្ខកង្វល់អ្វីទេ មិនថាតែខ្ញុំទេ អ្នកជិតខាងក៏ដូចគ្នាដែរ គឺគ្មានបញ្ហាអ្វីផង » ។
អ្នកស្រីលើកឡើងថា កាលពីទើបមករស់នៅប៉ុន្មានឆ្នាំមុន ដីនៅទីនេះក្នុង១ឡូត៍ ទំហំ៥ម៉ែត្រគុណនឹង២០ម៉ែត្រ មានតម្លៃត្រឹមតែជាង១ពាន់ដុល្លារប៉ុណ្ណោះ ប៉ុន្តែឥឡូវនេះ ឡើងដល់ជាង១ម៉ឺន ឬ២ម៉ឺនដុល្លារហើយ ។
អ្នកស្រីថា ៖« កាលពីជំនាន់ដើម មនុស្សមិនហ៊ានរស់នៅជិតខ្មោចទេ ប៉ុន្តែបច្ចុប្បន្នមិនដូច្នោះឡើយ គឺរកតែដីនៅមិនបានផង បើគ្មានលុយទិញដីទេ ប្រាកដជាយ៉ាប់ហើយ ព្រោះដីកំពុងឡើងថ្លៃកប់ពពក មិនថាដីនៅក្បែរផ្នូរខ្មោច ឬឆ្ងាយពីផ្នូរខ្មោចទេ សុទ្ធតែរស់នៅបាន និងមានតម្លៃទាំងអស់ » ។
ទាក់ទងនឹងទីស្មសានក្លាយជាបុរី និងដីឡូត៍នេះ អ្នកជំនាញមើលឃើញថា ដោយសារតម្រូវការលំនៅឋានចេះតែកើនឡើង ស្របពេលដែលតំបន់នោះសម្បូរដោយរោងចក្រ និងការងារ ទន្ទឹមនឹងការផ្គត់ផ្គង់នៅមិនគ្រប់គ្រាន់ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting មានប្រសាសន៍កាលពីថ្ងៃទី៦ មេសា ម្សិលមិញថា នៅពេលតម្រូវការលំនៅឋានបន្តកើនឡើងនៅក្នុងតំបន់នោះ នឹងធ្វើឲ្យការរស់នៅរបស់ប្រជាពលរដ្ឋ បង្ខំប្រជ្រៀតគ្នាកាន់តែច្រើនទៅៗ ធ្វើឱ្យមនុស្សលែងខ្លាចខ្មោចទៀតហើយ ។
លោកមានប្រសាសន៍យ៉ាងដូច្នេះថា ៖«វាទាក់ទងនឹងតម្រូវការនៃការរស់នៅ ព្រោះមនុស្សចេះតែកើនឡើង តែការផ្គត់ផ្គង់ថយចុះ (ដីតូច) ធ្វើឲ្យមនុស្សចេះតែប្រជ្រៀតគ្នារស់នៅ។ ម្យ៉ាងទៀត នៅក្បែរតំបន់ទាំងនោះវាសម្បូររោងចក្រ និងការងារ » ។
លោកបន្តថា ៖« ការផ្គត់ផ្គង់ដីថយទៅៗ ហើយតម្រូវការលំនៅឋានចេះតែរីកឡើងពី
មួយឆ្នាំទៅមួយឆ្នាំនៅក្នុងតំបន់ដែលសម្បូរ រោងចក្រនិងការងារនេះ នឹងធ្វើឱ្យមនុស្សចេះតែប្រមូលផ្ដុំគ្នាទៅរស់នៅទីនោះកាន់តែ ច្រើនឡើងៗ។ អីចឹង មានអ្វីត្រូវខ្លាចខ្មោច មានតែ ខ្មោចខ្លាចមនុស្សវិញ » ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ