ខេត្តបន្ទាយមានជ័យ ៖ លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងថាបន្ទាប់ពីទទួលបណ្តឹងពីនារីឈ្មោះ ស.ស អាយុ២៤ឆ្នាំ ជាបុគ្គលិកក្រុមហ៊ុន មួយនៅក្រុងប៉ោយប៉ែតបានអះអាងប្រាប់សមត្ថកិច្ចថា នៅវេលាម៉ោង៨ព្រឹកថ្ងៃទី០១ ខែមេសា ឆ្នាំ២០១៨ ខ្លួនបានបាត់ម៉ូតូ១គ្រឿងម៉ាកឃ្លីក ពណ៌ខ្មៅ ដែលបានចាក់សោរ.កទុកនៅកន្លែងធ្វើការលុះរសៀលខ្លួនចេញមកវិញស្រាប់តែបាត់ម៉ូតូ ហើយក៏បានឲ្យក្រុមហ៊ុនជួយឆែកកាម៉ារ៉ាសុវត្ថិភាពឃើញមនុស្សម្នាក់ឈរក្បែរម៉ូតូហើយជិះម៉ូតូចេញ ។
បន្ទាប់ពីទទួលបណ្តឹងកម្លាំងនគរបាលក្រុងប៉ោយប៉ែតបានធ្វើការស៊ើបអង្កេតស្រាវជ្រាវតាមវិធានការជំនាញនិងបានបញ្ជាក់រូបភាពពីកាម៉ារ៉ាសុវត្ថិភាពទើបឈានទៅចាប់ឃាត់ខ្លួនជនសង្ស័យម្នាក់ឈ្មោះ ស៊ូ ខរី ភេទប្រុស អាយុ៣៨ឆ្នាំ ជាជនជាតិខ្មែរឥស្លាម មានទីលំនៅមិនពិតប្រាកដ និងឈ្មោះ ប៊ិន វុទ្ធី ភេទប្រុស អាយុ៤៦ឆ្នាំ នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ព្រមទាំងដកហូតបានម៉ូតូម៉ាកអាយខុន ពណ៌សលាយទឹកក្រូច ស៊េរីឆ្នាំ២០១១ ហើយធ្វើការសាកសួរទើបបន្តទៅដកហូតម៉ូតូម៉ាកឃ្លីក ពណ៌ខ្មៅ ពីឈ្មោះ ចៅ ដានី ភេទស្រី អាយុ២៦ឆ្នាំ មុខរបរម្ចាស់ហាងខារ៉ាអូខេ ដែលឈ្មោះ ស៊ូ ខរី បញ្ចាំច្រៀងខារ៉ាអូខេ ។ ជាមួយគ្នានោះដែរសមត្ថកិច្ចបានបន្តធ្វើការឆែកឆេរនៅផ្ទះរបស់ឈ្មោះ ប៊ិន វុទ្ធី និងរកឃើញព្រមទាំងបានដកហូតម៉ូតូចំនួន៣គ្រឿងដែលទទួលបញ្ចាំពីអ្នកផ្សេងផងដែរ ។
លោកវរសេនីយ៍ទោ ខែម សោភ័ណ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យបានឲ្យដឹងថា នៅចំពោះមុខសមត្ថកិច្ចជនសង្ស័យឈ្មោះ ស៊ូ ខិរន បានសារភាពថា ខ្លួនគេពិតជាបានលួចម៉ូតូម៉ាកឃ្លីកនោះមែន ។
ចំណែកឈ្មោះ ប៊ិន វុទ្ធី ដែលទទួលប្រកបរបរទទួលបញ្ចាំគ្មានច្បាប់នេះបានសារភាពថា នៅថ្ងៃទី០៤ ខែមេសា ឆ្នាំ២០១៨ មានឈ្មោះ ម៉ាត់ អារ៉ាហ្វិន និងឈ្មោះ ស៊ូ ខរី ទាំង២នាក់នឹងគេធ្លាប់ស្គាល់រយៈពេល៦ខែមកហើយ បានយកម៉ូតូម៉ាកអាយខុន ពណ៌សលាយទឹកក្រូចពាក់ផ្លាកលេខ ប.មានជ័យ.IP0603 ស៊េរីឆ្នាំ២០១១ មកលក់ឲ្យតម្លៃ៦ពាន់បាត(លុយថៃ) ។
កាលពីថ្ងៃទី០៤ ខែមីនា ឆ្នាំ២០១៨ ខ្លួនក៏បានទទួលបញ្ចាំម៉ូតូ១គ្រឿងម៉ាកស្គុបពី ស៊េរីឆ្នាំ២០១៥ ពណ៌ទឹកប្រាក់ផងដែរ ចំណែកម៉ូតូ៣គ្រឿងដែលសមត្ថកិច្ចឆែកឆេររកឃើញនឹងផ្ទះនោះ គឺគេទទួលបញ្ចាំពីអ្នកផ្សេង ។
ដោយផ្អែកតាមចម្លើយសារភាពរបស់ជនសង្ស័យជាអ្នកលួច និងអ្នកទទួលបញ្ចាំនៅថ្ងៃទី០៧ ខែមេសា ឆ្នាំ២០១៨ កម្លាំងនគរបាលជំនាញការិយាល័យព្រហ្មទណ្ឌកំរិតស្រាល បានរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមនីតិវិធី ៕
ចែករំលែកព័តមាននេះ