រាជធានីភ្នំពេញ ៖ បន្ទាប់ពីឃើញថា ចំនួនអ្នកស្លាប់ដោយសារគ្រោះថ្នាក់ចរាចរណ៍ចេះតែកើតឡើងក្នុងរដូវបុណ្យជាតិធំៗនោះ សម្តេចក្រឡាហោម ស ខេងបានអំពាវនាវដល់ពលរដ្ឋទាំងអស់ធ្វើការបើកមានការប្រុងប្រយ័ត្នខ្ពស់ ពេលធ្វើដំណើរទៅលេងស្រុក ។ មានប្រសាសន៍ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១១…
រាជធានីភ្នំពេញ ៖ បន្ទាប់ពីឃើញថា ចំនួនអ្នកស្លាប់ដោយសារគ្រោះថ្នាក់ចរាចរណ៍ចេះតែកើតឡើងក្នុងរដូវបុណ្យជាតិធំៗនោះ សម្តេចក្រឡាហោម ស ខេងបានអំពាវនាវដល់ពលរដ្ឋទាំងអស់ធ្វើការបើកមានការប្រុងប្រយ័ត្នខ្ពស់ ពេលធ្វើដំណើរទៅលេងស្រុក ។ មានប្រសាសន៍ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១១ កាលពីថ្ងៃទី៦ ខែមេសា ឆ្នាំ២០១៨ នៅភូមិអូឌឹម សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
តាមបណ្តោយផ្លូវជាតិលេខ៤ សម្តេចក្រឡាហោមបានមានប្រសាសន៍ក្នុងទិវាចរាចរណ៍សប្តាហ៍ថា ស្ថានភាពគ្រោះថ្នាក់ចរាចរណ៍បច្ចុប្បន្ន គឺជាបញ្ហាប្រឈមចំពោះមុខ និងយូរអង្វែងដែលបង្កឡើងដោយសារការបើកបរលើសល្បឿនកំណត់ការមិនគោរពសិទ្ធិអាទិភាព មិនគោរពសញ្ញាចរាចរណ៍ ការវ៉ាជែងដោយប្រថុយប្រថាន ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាពពេលធ្វើដំណើរតាមម៉ូតូ និងមិនពាក់ខ្សែក្រវ៉ាត់សុវត្ថិភាពពេលធ្វើដំណើរតាមរថយន្តបានបង្កឱ្យមានគ្រោះថ្នាក់ចរាចរណ៍ដែលមានសភាពធ្ងន់ធ្ងរ បណ្តាលឱ្យរបួសពិការ ឬបាត់បង់ជីវិតមនុស្សយ៉ាងអាណោចអាធម្ម រួមជាមួយនឹងការខូចខាតទ្រព្យសម្បត្តិរដ្ឋ និងឯកជនយ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើននៅក្នុងសង្គមកម្ពុជា ។
សម្តេចបញ្ជាក់ថា ដើម្បីទប់ស្កាត់កាត់បន្ថយគ្រោះថ្នាក់ចរាចរណ៍ក្នុងឱកាសចូលឆ្នាំប្រពៃណីជាតិឆ្នាំចសំរឹទ្ធិស័ក ព.ស ២៥៦២ ដែលនឹងប្រព្រឹត្តទៅចាប់ពីថ្ងៃទី១៤-១៥-១៦ ខែមេសា ឆ្នាំ២០១៨នេះ ក្នុងនាមរដ្ឋាភិបាល និងគណៈកម្មាធិ ការជាតិសុវត្ថិភាពចរាចរណ៍ផ្លូវគោក សម្តេចបានអំពាវនាវដោយផ្ទាល់ ដល់អ្នកប្រើប្រាស់ផ្លូវ និងអ្នកធ្វើដំណើរតាមផ្លូវថ្នល់ សូមចូលរួមអនុវត្តឱ្យបាននូវអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីថា « ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍» ។
សម្តេចបន្តថា សូមចូលរួមយកចិត្តទុកដាក់នូវវិធានការ ដើម្បីទប់ស្កាត់គ្រោះថ្នាក់ចរាចរណ៍ដូចខាងក្រោម៖
១.អ្នកបើកបរម៉ូតូ និងអ្នកធ្វើដំណើរទាំងអស់ ត្រូវពាក់មួកសុវត្ថិភាពឱ្យបានត្រឹមត្រូវគ្រប់ៗគ្នាទោះជិតឆ្ងាយ ។
២.មុនពេលបើកបរយានជំនិះ ត្រូវត្រួតពិនិត្យបច្ចេកទេសឱ្យបានម៉ត់ចត់ និងលើកកម្ពស់ស្មារតីប្រុងប្រយ័ត្នជានិច្ច ។
៣.អ្នកបើកបររថយន្ត និងអ្នករួមដំណើរជាមួយទាំងអស់ ត្រូវពាក់ខ្សែក្រវ៉ាត់សុវត្ថិភាពឱ្យបានគ្រប់ៗគ្នា ។
៤.អ្នកបើកបរម៉ូតូ និងអ្នករួមដំណើរទាំងអស់ ត្រូវពាក់មួកសុវត្ថិភាពឱ្យបានល្អ មិនថាជិតឬ ឆ្ងាយ
៥.សូមបន្ថយល្បឿនបើកបរទៅតាមស្ថានភាពផ្លូវ និងស្ថានភាពចរាចរណ៍ដូចជា ផ្លូវកោង…ជាដើម ។
៦.មុននឹងវ៉ាជែង ត្រូវដឹងច្បាស់ថា ផ្លូវខាងមុខទំនេរអាចវ៉ាជែងដោយសុវត្ថិភាព កុំប្រថុយប្រថាន។
៧.ពេលបើកបរត្រូវប្រកាន់ស្តាំជានិច្ច និងគោរពសិទ្ធិអាទិភាព គឺត្រូវបន្ថយល្បឿន ។
៨.បើពិសារគ្រឿងស្រវឹង កុំបើកបរ បើបើកបរ កុំពិសាគ្រឿងស្រវឹង ។ ព្រោះបើស្រវឹងអ្នកបើកបរនឹងបាត់ភាពម្ចាស់ការលើខ្លួនឯង ។
៩.ចំពោះរថយន្តដឹកអ្នកដំណើរ ឬដឹកទំនិញមិនត្រូវផ្ទុកមនុស្ស ឬទំនិញលើសច្បាប់កំណត់ ។
១០.ក្នុងករណីមានគ្រោះថ្នាក់ចរាចរណ៍កើតឡើងស្នើប្រជាពលរដ្ឋគ្រប់រូប មេត្តាអត់ធ្មត់ ខន្តី អាធ្យាស្រ័យ ជៀសវាងការប្រើអំពើហិង្សា ត្រូវរួមគ្នាដោះស្រាយតាមនីតិវិធីច្បាប់ ។
សូមជម្រាបថា បើតាមការសង្កេតក្នុងរដូវបុណ្យចូលឆ្នាំ ពិសេសនោះបុណ្យជាតិធំៗបញ្ហាគ្រោះថ្នាក់ចរាចរណ៍កើតឡើង ដោយបានធ្វើឲ្យបាត់បង់ជីវិត និងអ្នករបួសជាដើម ៕
ចែករំលែកព័តមាននេះ