ខេត្តកណ្ដាល ៖ ព័ត៌មានបឋមបានឲ្យដឹងថា កាលពីវេលាម៉ោង០៧និង១៥នាទីព្រឹក ថ្ងៃទី០៧ ខែមេសា ឆ្នាំ២០១៨ មានករណីប្រជាពលរដ្ឋបានប្រទះឃើញសាកសពស្ត្រីម្នាក់អណ្ដែតទឹកនៅច្រាំងមាត់ទន្លេមេគង្គ ចំណុចដីរបស់ឈ្មោះ ប៉ោង ឡាង ភូមិពាមតាឯក ឃុំពាមឧកញ៉ាអុង ស្រុកល្វាឯម ខេត្តកណ្តាល ។ មានកាត់សម្គាល់ខ្លួនមួយជាប់នឹងខ្លួនសាកសពមានឈ្មោះ ហ៊ាន ផល្លា ភេទស្រី ។
តាមសម្ដីឈ្មោះ ប៉ាន់ ប៉េង ភេទប្រុស អាយុ៥០ឆ្នាំ មានទីលំនៅភូមិពាមតាឯក ឃុំពាមឧកញ៉ាអុង ស្រុកល្វាឯម ខេត្តកណ្ដាល បានរៀបរាប់ប្រាប់សមត្ថកិច្ចឲ្យដឹងថា រូបគាត់បានដើរទៅបត់ជើងនៅមាត់ច្រាំងទន្លេ រួចក៏មានក្លិនស្អុយភាយៗ គាត់ក៏ឈរមើលពីលើច្រាំងមាត់ទន្លេទៅ ហើយបានឃើញសាកសពអណ្ដែតនៅមាត់ទឹក ។ ពេលឃើញដូច្នោះបានដើរទៅរាយការណ៍ឲ្យសមត្ថកិច្ចប៉ុស្តិ៍ពាមឧកញ៉ាអុង បានដឹង និងបាននាំកម្លាំងទៅកាន់កន្លែងកើតហេតុ ។
បន្ទាប់កម្លាំងការិយាល័យជំនាញខេត្ត ស្រុក ប៉ុស្តិ៍ ក្រុមប្រឹក្សាឃុំ ភូមិ និងវេជ្ជបណ្ឌិតផ្នែកបច្ចេកទេស មន្ទីរពេទ្យបង្អែកស្រុក បានចុះទៅធ្វើការពិនិត្យសាកសព ។ ក្រោមការពិនិត្យសាកសពមានសម្លៀកបំពាក់ធម្មតា អាវសមូលដៃសងខាង ខោយឺតជើងវែងពណ៌ខៀវ ។ ដូចនេះការសន្និដ្ឋានតាមលទ្ធផល នៃការពិនិត្យរបស់ការិយាល័យជំនាញ និងគ្រូពេទ្យ សាកសពមិនមានស្លាកស្នាមអ្វីគួរកត់សម្គាល់ទេ សាកសពអាចស្លាប់ដោយសារលង់ទឹក ។ ក្រោយពីការពិនិត្យចប់សព្វគ្រប់ សាកសពបានប្រគល់ជូនក្រុមប្រឹក្សាឃុំពាមឧកញ៉ាអុងបញ្ចុះនៅកន្លែងកើតហេតុ ដើម្បីរង់ចាំស្រាវជ្រាវរកសាច់ញាតិ ៕
ចែករំលែកព័តមាននេះ