ខេត្តបន្ទាយមានជ័យ ៖ អាវុធហត្ថក្រុងប៉ោយប៉ែត ឃាត់ខ្លួនជនសង្ស័យចំនួន១នាក់ ពីបទជួញដូរសារធាតុញៀន និងកាន់កាប់អាវុធដោយខុសច្បាប់ ដោយអនុលោមតាមការណែនាំរបស់លោក សេង គីមឡាក់ ព្រះរាជអាជ្ញារងអមសាលាដំបូងខេត្ត នៅវេលាម៉ោង១០យប់ ថ្ងៃទី០៥ ខែមេសា ឆ្នាំ២០១៨ នៅចំណុចភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានចុះប្រតិបត្តិការណ៍បង្ក្រាបករណីជួញដូរសារធាតុញៀន និងកាន់កាប់អាវុធកែច្នៃដោយខុសច្បាប់ និងឃាត់ខ្លួនជនសង្ស័យបានចំនួនម្នាក់ ។
ជាមួយនិងចុះប្រតិបត្តិការណ៍បង្ក្រាបករណីសង្ស័យខាងលើ កម្លាំងមូលដ្ឋានក្រុងប៉ោយប៉ែត បានឃាត់ខ្លួនជនសង្ស័យម្នាក់ឈ្មោះ ណេង វង្សពិទូ ភេទប្រុស អាយុ២៨ឆ្នាំ បច្ចុប្បន្នរស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត រួមជាមួយវត្ថុតាងរួមមាន គ្រឿងញៀនមេតំហ្វេតាមីនទឹកកក ចំនួន៨កូនថង់តូច ស្មើ១២.៦៣ក្រាម គ្រឿងញៀនមេតំហ្វេតាមីនគ្រាប់ចំនួន៤៤២គ្រាប់ ទូរស័ព្ទដៃចំនួន១គ្រឿង (ម៉ាកណូគា ពណ៌ខ្មៅ) ជញ្ជីងសម្រាប់ថ្លឹងគ្រឿងញៀន១គ្រឿង កាំភ្លើងប៊ិចបាញ់គ្រាប់ឡុក១ដើម គ្រាប់កាំភ្លើងខ្លីម៉ាកឡុក១គ្រាប់ ប្រាក់ខ្មែរចំនួន១២៧,០០០រៀល ឧបករណ៍សម្រាប់ជក់គ្រឿងញៀនមួយចំនួន និងថង់សម្រាប់ច្រកគ្រឿងញៀនមួយចំនួនទៀត ។
លោកវរសេនីយ៍ត្រី នួណ នីណារ៉ូ បានឲ្យដឹងថា លោកវរសេនីយ៍ត្រី នួន នីណារ៉ូ បានបន្តថា ក្រោយធ្វើការសាកសួរលោកបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានបញ្ជាក់ថា យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត មន្ត្រីជំនាញបានធ្វើការសាកសួរបន្ថែម ចម្លើយសារភាព វត្ថុតាង និងធ្វើតេស្តលើសារធាតុញៀន ជនសង្ស័យខាងលើពិតជាបានជួញដូរនូវសារធាតុញៀន រួមទាំងកាន់កាប់អាវុធកែច្នៃដោយខុសច្បាប់ ពិតប្រាកដមែន បច្ចុប្បន្នកម្លាំងជំនាញបានកសាងសំណុំរឿងបញ្ជូនជនសង្ស័យ រួមជាមួយវត្ថុតាងទៅតុលាការ ដើម្បីចាត់ការទៅតាមនីតិវិធីហើយដែរ ៕
ចែករំលែកព័តមាននេះ