ខេត្តបន្ទាយមានជ័យ ៖ បុរសម្នាក់ត្រូវបានស្លាប់ភ្លាមៗ ដោយសាររន្ទះបាញ់ ខណៈពេលចេញទៅត្រងទឹកភ្លៀង ។ ហេតុការណ៍គួរឲ្យភ្ញាក់នេះបានកើតឡើងនៅវេលាម៉ោង១១និង៣០នាទីរំលងអធ្រាត្រ ថ្ងៃទី០៥ ខែមេសា ឆ្នាំ២០១៨ នៅភូមិប្រសាទត្បែង ឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ ។
តាមប្រភពព័ត៌មានពីនគរបាលមូលដ្ឋានបានឲ្យដឹងថា ៖ ជនរងគ្រោះមានឈ្មោះ ហ៊ុល ត្រឺត ភេទប្រុស អាយុ៥០ឆ្នាំ មានទីលំនៅភូមិស្វាយស ឃុំពន្លៃ ស្រុកភ្នំស្រុក ខេត្តបន្ទាយមានជ័យ ។ ជនរងគ្រោះបានទៅនៅដុតអុសធ្យូងស្នាក់នៅផ្ទះបងថ្លៃឈ្មោះ សន យ៉ោម ភេទប្រុស អាយុ៥១ឆ្នាំ នៅភូមិកើតហេតុខាងលើ ។
មុនពេលកើតហេតុ មានភ្លៀងយ៉ាងខ្លាំងលាយឡំជាមួយផ្គររន្ទះ ពេលនោះជនរងគ្រោះបានត្រងទឹកភ្លៀងដាក់ពាង ស្រាប់តែរន្ទះបាញ់ បណ្ដាលឲ្យស្លាប់នៅកន្លែងកើតហេតុតែម្តង ។ ប្រភពដដែលបានបញ្ជាក់ថា សាកសពបងប្អូនដឹកមកធ្វើបុណ្យនៅលំនៅដ្ឋានវិញនៅភូមិស្វាយសឃុំពន្លៃ ស្រុកភ្នំស្រុក នាព្រឹកថ្ងៃទី០៦ ខែមេសា ឆ្នាំ២០១៨ ដើម្បីរៀបចំធ្វើបុណ្យតាមប្រពៃណី ទាំងក្តីសោកស្តាយ និងអាឡោះអាល័យ ៕
ចែករំលែកព័តមាននេះ