ខេត្តបន្ទាយមានជ័យ ៖ ប្រតិភួក្រសួងមហាផ្ទៃ ចុះសួរសុខទុក្ខ និងនាំយកអំណោយជាគ្រឿងឧបភោគបរិភោគមកប្រគល់ជូនកម្លាំងនគរបាល ៤វរសេនាតូច ចំណុះស្នងការដ្ឋាននគរបាលខេត្តបន្ទាយមានជ័យ ដើម្បីឲ្យដឹងពីសុខទុក្ខរបស់កងកម្លាំងនគរបាលនៅជួរមុខកំពុងការពារខ្សែបន្ទាត់ព្រំដែន ។ លោក…
ខេត្តបន្ទាយមានជ័យ ៖ ប្រតិភួក្រសួងមហាផ្ទៃ ចុះសួរសុខទុក្ខ និងនាំយកអំណោយជាគ្រឿងឧបភោគបរិភោគមកប្រគល់ជូនកម្លាំងនគរបាល ៤វរសេនាតូច ចំណុះស្នងការដ្ឋាននគរបាលខេត្តបន្ទាយមានជ័យ ដើម្បីឲ្យដឹងពីសុខទុក្ខរបស់កងកម្លាំងនគរបាលនៅជួរមុខកំពុងការពារខ្សែបន្ទាត់ព្រំដែន ។
លោក សក់ សេដ្ឋា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងប្រតិភូមិរួមដំណើរ នៅថ្ងៃទី០៦ ខែមេសា ឆ្នាំ២០១៨ បានបានចុះសំណេះសំណាល និងសាកសួរសុខទុក្ខដល់កងកម្លាំងនគរបាលវរសេនាតូចការពារព្រំដែនគោកទាំង៤ចំណុះ ស្នងការដ្ឋាននគរបាលខេត្តបន្ទាយមានជ័យ មានវរសេនាតូចការពារព្រំដែនគោកលេខ៨៩១, ៩១១, ៨០៧, ៨១៥ និងនាំយកអំណោយជាគ្រឿងឧបភោគបរិភោគ និងភេសជ្ជៈ មកប្រគល់ជូនផងដែរ ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំច សំរិទ្ធស័ក ព.ស ២៥៦២ នេះ ។
ក្រោមការចង្អុលដឹកនាំរបស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងគណៈបញ្ជាការកងឯកភាពខេត្ត សម្ដីលើភារកិច្ចរក្សាការពារសន្តិសុខសណ្ដាប់ធ្នាប់សង្គម តាមខ្សែបន្ទាត់ព្រំដែន ស្របតាមដំណាក់កាល នៃការរីកចម្រើនរបស់ប្រទេសជាតិ ក្រោមការដឹកនាំប្រកបដោយគតិបណ្ឌិតដ៏ឈ្លាសវៃរបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កម្លាំងនគរបាលវរសេនាតូចការពារព្រំដែនគោកទាំង៤ បានខិតខំយកចិត្តទុកដាក់អនុវត្តន៍តួនាទី ការពារបូរណភាពទឹកដី និងបានសហការណ៍ជាមួយអង្គភាពពាក់ព័ន្ធ ការពាររក្សាសន្តិសុខ សុវត្ថិភាព តាមខ្សែបន្ទាត់ព្រំដែន យាមល្បាតទប់ស្កាត់ បង្ក្រាបបទល្មើសឆ្លងដែនគ្រប់ប្រភេទ ទប់ស្កាត់ការធ្វើចំណាកស្រុកខុសច្បាប់ ។
ទន្ទឹមនោះ បានចូលរួមចំណែកជួយដល់ប្រជាពលរដ្ឋក្រីក្រ រងគ្រោះដោយអគ្គិភ័យ ទឹកជំនន់ ខ្សល់ព្យុះ ខ្សល់កន្ត្រាក់ និងជួបនូវឧបប្បទ្វវហេតុផ្សេងៗ ។ មានប្រសាសន៍សំណេះសំណាល និងសួរសុខទុក្ខនាឱកាសនោះ លោក សក់ សេដ្ឋា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថា ៖ កងកម្លាំងនគរបាលការពារភូមិសាស្ត្រ នៃខេត្តបន្ទាយមានជ័យនេះ បានបញ្ជាក់ឲ្យឃើញថា នៅទីនេះកងកម្លាំងនគរបាលវរការពារព្រំដែនទាំងអស់ បានខិតខំយកចិត្តទុកដាក់ ធ្វើពលិកម្មគ្រប់បែបយ៉ាងដើម្បីការពារទឹកដីរបស់យើង រួមជាមួយនឹងការពារសុខសន្តិភាព ស្ថេរភាព និងសន្តិសុខ សណ្ដាប់ធ្នាប់ ក្នុងភូមិសាស្ត្រខេត្តបន្ទាយមានជ័យនេះ ហើយការពារកោះសន្តិភាព ស្ថេរភាព នៅតាមតំបន់ព្រំដែន បានបង្កលក្ខណៈសម្បត្តិដល់ប្រជាពលរដ្ឋយើងចេញចូលឆ្លងកាត់ព្រំដែន ដើម្បីប្រកបរបរទទួលទាន ក៏ដូចជាការដឹកទំនិញឆ្លងកាត់ព្រំដែន ដែលយើងចាត់ទុកថា ខេត្តបន្ទាយមានជ័យ គឺជាច្រករបៀងយ៉ាងសំខាន់ មិនមែនតែសម្រាប់ប្រទេសកម្ពុជាយើងទេ នៅទីនេះគឺជាច្រករបៀងសេដ្ឋកិច្ចរបស់អាស៊ានដោយសារយើងមានផ្លូវជាតិ៥ ដែលបច្ចុប្បន្នេះរាជរដ្ឋាភិបាលកំពុងតែធ្វើការអភិវឌ្ឍផ្លូវជាតិលេខ៥នេះ ឲ្យទៅជាផ្លូវហាយវេរបស់អាស៊ាន ។
ដូចនេះកងកម្លាំងនគរបាលខេត្តបន្ទាយមានជ័យទាំងអស់ ក្រោមការដឹកនាំដោយផ្ទាល់របស់លោកស្នងការ ក៏ដូចជាគណៈអភិបាលខេត្ត តាមរយៈគណៈបញ្ជាការឯកភាពខេត្ត ពិជាបានរួមចំណែកយ៉ាងធំធេង ក្នុងការរក្សាបាននូវសុខសន្តិភាព ស្ថេរភាព និងការអភិវឌ្ឍន៍ ។ លោករដ្ឋលេខាធិការបានបញ្ជាក់ថា រហូតមកដល់ពេលប្រទេសជាតិយើងនៅតែរក្សានូវសុខសន្តិភាព ស្ថេរភាព និងការអភិវឌ្ឍរីកចម្រើនឥតឈប់ឈរ ក្រោមការដឹនាំប្រកបដោយគតិបណ្ឌិតរបស់ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ហើយក្នុងក្របខ័ណ្ឌនៃក្រសួងមហាផ្ទៃ ក្រោមការដឹកណាំរបស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ យើងក៏បានបំពេញនូវកិច្ចការងារនានាជាច្រើន នៅក្នុងក្រមខ័ណ្ឌក្នុងការពង្រឹងកងកម្លាំងនគរបាល ទាំងនគរបាលការពារព្រំដែន និងនគរបាលទាំងអស់ផងដែរ ។
ម្យ៉ងវិញទៀត ក្រសួងមហាផ្ទៃមានភារកីចសំខាន់ធំ២គឺ ទី១.ការរក្សាសន្តិសុខសណ្ដាប់ធ្នាប់សាធារណៈ នៅក្នុងក្របខ័ណ្ឌសង្គម និងជាតិទាំងមូល ដែលយើងចែកចេញ២ផ្នែក មួយផ្នែករក្សាសន្តិសុខ សណ្តាប់ធ្នាប់សាធារណៈតាមតំបន់ព្រំដែន តាមរយៈកងវរសេនាតូចនគរបាលការពារព្រំដែន ក្នុងកិច្ចប្រតិបត្តិការណ៍ជាមួយកងយោធពលខេមរភូមិន្ទ ដើម្បីរក្សាបាននូវអធិបតេយ្យជាតិបូរណភាពទឹកដីរបស់យើង ។
ទន្ទឹមនេះនៅក្នុងផ្ទៃប្រទេសកងកម្លាំងនគរបាលខិតខំពង្រឹងការពារសន្តិសុខ ដើម្បីផ្តល់ភាពកក់ក្តៅ សុវត្ថិភាពជូនសង្គមក៏ដូចជាប្រជាពលរដ្ឋគ្រប់ៗរូបក្នុងការប្រកបរបរទទួលទានក៏ដូចជាជីវភាពរស់នៅប្រចាំថ្ងៃ ។ ទីពីរគឺការពង្រឹងការគ្រប់គ្ររដ្ឋបាលដែនដី ឬក៏រដ្ឋបាលថ្នាក់ក្រោមជាតិចាប់ពីខេត្ត ក្រុង ស្រុក ឃុំ សង្កាត់ ភូមិទូទាំងប្រទេស ដើម្បីរដ្ឋបាលទាំងនេះរួមចំណែក ក្នុងការដឹកនាំរក្សាសន្តិសុខសណ្តាប់ធ្នាប់សាធារណៈ ក៏ដូចជាការអភិវឌ្ឍន៍សង្គម និងសេដ្ឋកិច្ចនៅមូលដ្ឋាន ។
បន្ទាប់មកគណៈអធិបតីក៏បានប្រគល់អំណោយដល់វរេសនាតូចការពារព្រំដែនគោកទាំង៤ ក្នុងនោះមួយអង្គភាពទទួលបានថវិការ៣លានរៀល, មី៣៤កេសធំ, ស្រាបៀរ២០កេស, ទឹកសុទ្ធ៥៤កេស, ត្រីងៀត៥០គីឡូក្រាម, ត្រីខ១៧កេស និងកងកម្លាំងទាំង៤វរសេនាតូចម្នាក់ៗទទួលបានថវិកា៥ម៉ឺនរៀល ៕
ចែករំលែកព័តមាននេះ